ନୂଆଦିଲ୍ଲୀ: ଦିଲ୍ଲୀର ଇନ୍ଦିରା ଗାନ୍ଧୀ ଅନ୍ତର୍ଜାତୀୟ ବିମାନ ବନ୍ଦରରେ ଏକ ବଡ଼ ଦୁର୍ଘଟଣା ଟଳିଯାଇଛି । ବେଙ୍ଗାଲୁରୁକୁ ଉଡ଼ାଣ ଭରିବାକୁ ଥିବା ଇଣ୍ଡିଗୋର ଏକ ବିମାନର ଟେଲ ଷ୍ଟ୍ରାଇକ୍ (ବିମାନ ପଛଭାଗ ରନଓ୍ବେରେ ଘଷି ହୋଇଯିବା) ହୋଇଛି । ଏହି ଘଟଣା ସେପ୍ଟେମ୍ବର ୯ରେ ହୋଇଥିବା କୁହାଯାଉଛି । ଟେଲ୍ ଷ୍ଟ୍ରାଇକ୍ ସଂପର୍କରେ ସୂଚନା ମିଳିବା ପରେ ବେସାମରିକ ବିମାନ ଚଳାଚଳ ନିର୍ଦ୍ଦେଶାଳୟ (ଡିଜିସିଏ) ଇଣ୍ଡିଗୋ ବିମାନର ଉଡ଼ାଣ ବାତିଲ କରିଛନ୍ତି । ଏହା ସହ ବିମାନର ପାଇଲଟଙ୍କୁ ନିଲମ୍ବିତ କରିଛନ୍ତି । ମାମଲାର ଛାନଭିନ ଲାଗି ଡିଜିସିଏ ନିର୍ଦ୍ଦେଶ ଦେଇଛନ୍ତି ।
ମିଳିଥିବା ସୂଚନା ଅନୁସାରେ, ଇଣ୍ଡିଗୋ ଏୟାର ଲାଇନର ଫ୍ଲାଇଟ୍ 6E-6054 ଆଇଜିଆଇ ଏୟାରପୋର୍ଟରୁ ସେପ୍ଟେମ୍ବର ୯ ତାରିଖ ଦିନ ୩.୪୦ରେ ବେଙ୍ଗାଲୁରୁ ପାଇଁ ଉଡ଼ାଣ ଭରୁଥିଲା । ଉଡ଼ାଣ ଭରିବା ସମୟରେ ଏୟାରବସ୍ ଏ-୩୨୧ ଟେଲ ଷ୍ଟ୍ରାଇକ୍ର ସମ୍ମୁଖୀନ ହୋଇଥିଲା । ଏହା ପରେ ବିମାନଟିକୁ ପୁନଃ ଲ୍ୟାଣ୍ଡିଂ କରାଯାଇଥିଲା । ଏନେଇ ସୂଚନା ମିଳିବା ପରେ ଡିଜିସିଏ ବିମାନ ସମେତ ପାଇଲଟଙ୍କୁ ନିଲମ୍ବିତ କରିଛନ୍ତି । ଏହା ସହ ପାଇଲଟଙ୍କୁ କାରଣ ଦର୍ଶାଅ ନୋଟିସ୍ ଜାରି କରିଛନ୍ତି ଡିଜିସିଏ ।
ସୂଚନାଯୋଗ୍ୟ, ଗତବର୍ଷ ଇଣ୍ଡିଗୋର ଏକ ବିମାନ ଅହମ୍ମଦାବାଦରେ ଟେଲ୍ ଷ୍ଟ୍ରାଇକ୍ର ସମ୍ମୁଖୀନ ହୋଇଥିଲା । ଏହି ମାମଲାରେ ଦୃଢ଼ କାର୍ଯ୍ୟାନୁଷ୍ଠାନ ଗ୍ରହଣ କରି ଡିଜିସିଏ ବିମାନର ପାଇଲଟଙ୍କୁ ୩ ମାସ ପର୍ଯ୍ୟନ୍ତ ସସପେଣ୍ଡ କରିଥିଲେ । ଏହା ସହ ଇଣ୍ଡିଗୋ ଏୟାର ଲାଇନ୍ ଉପରା ୩୦ ଲକ୍ଷ ଟଙ୍କାର ଜରିମାନା ଲଗାଇଥିଲେ ଡିଜିସିଏ । ଗତବର୍ଷ ଟେଲ୍ ଷ୍ଟ୍ରାଇକର ସମ୍ମୁଖୀନ ହୋଇଥିବା ବିମାନ ଏୟାରବସ୍ ୩୨୧ ଥିଲା । ।
