ନୂଆଦିଲ୍ଲୀ: ତିରୁପତି ମନ୍ଦିରରେ ପ୍ରସାଦ ଭାବରେ ମିଳୁଥିବା ଲଡୁରେ ପଶୁ ଚର୍ବି ମିଶୁଥିଲା । ଏହା ସହ ନିମ୍ନମାନର ସାମଗ୍ରୀରେ ପ୍ରସ୍ତୁତ ହେଉଥିଲା ଲଡୁ। ତିରୁପତି ମନ୍ଦିର ଉପରେ ଆସ୍ଥା ରଖିଥିବା କୋଟି କୋଟି ଶ୍ରଦ୍ଧାଳୁଙ୍କ ପ୍ରତି ଏହା ବିଶ୍ବାସଘାତ । ଏପରି ସାଂଘାତିକ ଅଭିଯୋଗ ଆଣିଛନ୍ତି ଖୋଦ ଆନ୍ଧ୍ର ପ୍ରଦେଶ ମୁଖ୍ୟମନ୍ତ୍ରୀ ଚନ୍ଦ୍ରବାବୁ ନାଇଡ଼ୁ । ଆନ୍ଧ୍ର ପ୍ରଦେଶର ପୂର୍ବତନ ୱାଇଏସ୍‌ଆର କଂଗ୍ରେସ ସରକାରଙ୍କ ଉପରେ ସାଂଘାତିକ ଅଭିଯୋଗ ଆଣି ସେ ପ୍ରବଳ ବର୍ଷିଛନ୍ତି । ଚନ୍ଦ୍ରବାବୁ ନାଇଡୁ କହିଛନ୍ତି, ରାଜ୍ୟରେ ଜଗନ ସରକାର ଥିବା ବେଳେ ମନ୍ଦିର ପ୍ରସାଦରେ ନିମ୍ନମାନର ସାମଗ୍ରୀ ସାଙ୍ଗକୁ ପଶୁ ଚର୍ବି ମିଶା ଯାଉଥିବା ଜାଣିବାକୁ ପାଇଥିଲି । ଏହା ମୋତେ ଚକିତ କରିଥିଲା । ଏହି ମନ୍ଦିର ଉପରେ କୋଟି କୋଟି ଭକ୍ତ ଆସ୍ଥା ପ୍ରକଟ କରୁଥିବା ବେଳେ ଏପରି କରିବା ନିମନ୍ତେ ସେ ଲଜ୍ଜାବୋଧ କରିବା ଉଚିତ ଥିଲା ।

 ଏନଡିଏ ଦଳ ବୈଠକରେ ଚନ୍ଦ୍ରବାବୁ ନାଇଡ଼ୁ କହିଛନ୍ତି, ତିରୁପତିର ଶ୍ରୀ ଭେଙ୍କଟେଶ୍ୱର ସ୍ୱାମୀ ମନ୍ଦିରରେ ଲଡୁ ପ୍ରସାଦ ରୂପେ ଲଗା ଯାଇଥାଏ । ଗତ ସରକାର ଅମଳରେ ଏହି ଲଡୁକୁ ଘିଅ ବଦଳରେ ପଶୁ ଚର୍ବିରେ ତିଆରି କରାଯାଉଥିଲା ।  ଏହି ମନ୍ଦିରର ପରିଚାଳନା ଭାର ତିରୁମାଳା ତିରୁପତି ଦେବସ୍ଥାନମ ଉପରେ ନ୍ୟସ୍ତ । ମୁଖ୍ୟମନ୍ତ୍ରୀ ନାଇଡୁ କହିଛନ୍ତି, ଏବେ କିନ୍ତୁ ତିରୁପତି ଲଡୁ ଶୁଦ୍ଧ ଘିଅରେ ପ୍ରସ୍ତୁତ ହେଉଛି । ଫଳରେ ଏହାର ମାନରେ ପରିବର୍ତ୍ତନ ହୋଇଛି । ସେପଟେ ଚନ୍ଦ୍ରବାବୁ ନାଇଡୁଙ୍କ ପରେ ତାଙ୍କ ପୁଅ ଏବଂ ଆଇଟି ମନ୍ତ୍ରୀ ନାରା ଲୋକେଶ ମଧ୍ୟ ପୂର୍ବତନ ଜଗନ ମୋହନ ରେଡ୍ଡୀଙ୍କ ସରକାର ଉପରେ ବର୍ଷିଛନ୍ତି । ତିରୁପତି ମନ୍ଦିର ଲଡୁ ପଶୁ ଚର୍ବିରେ ତିଆରି ହେଉଛି ଜାଣିବା ପରେ ମୁଁ ମର୍ମାହତ ହୋଇଥିଲି ବୋଲି ନାରା ଲୋକେଶ କହିଛନ୍ତି । 

ଟିଡିପି ସରକାରର ଏପରି ଅଭିଯୋଗରେ କଡ଼ା ପ୍ରତିକ୍ରିୟା ରଖିଛି ୱାଇଏସ୍‌ଆର କଂଗ୍ରେସ । ଦଳର ନେତା ଏବଂ ରାଜ୍ୟସଭା ସାଂସଦ ୱାଇବି ରେଡ୍ଡି ମୁଖ୍ୟମନ୍ତ୍ରୀଙ୍କ ଏହି ଅଭିଯୋଗକୁ ଅତ୍ୟନ୍ତ ଦୁର୍ଭାଗ୍ୟଜନକ ବୋଲି କହିଛନ୍ତି । ଏପରି କରି ମୁଖ୍ୟମନ୍ତ୍ରୀ ମନ୍ଦିରର ପବିତ୍ରତା ପ୍ରତି ଅଙ୍ଗୁଳି ନିର୍ଦ୍ଦେଶ କରିଥିବା ସେ ଅଭିଯୋଗ କରିଛନ୍ତି । 

ସେ ଆହୁରି କହିଛନ୍ତି, କୌଣସି ବ୍ୟକ୍ତି ମନ୍ଦିରର ପ୍ରସାଦକୁ ନେଇ ଏପରି ଶବ୍ଦ ପ୍ରୟୋଗ କରିବା କିମ୍ବା ଅଭିଯୋଗ ଉଠାଇବା ଉଚିତ ନୁହେଁ । ଚନ୍ଦ୍ରବାବୁ ନାଇଡୁଙ୍କ କଥା ପ୍ରମାଣିତ କରୁଛି ଯେ, ରାଜନୈତିକ ଲାଭ ନିମନ୍ତେ ସେ ଯେକୌଣସି ବି ସ୍ତରକୁ ଖସି ପାରନ୍ତି। ଲୋକଙ୍କ ମନରେ ତିରୁପତିଙ୍କ ପ୍ରତି ଥିବା ଆସ୍ଥାକୁ ପୁନଃ ସ୍ଥାପନ ନିମନ୍ତେ ମୁଁ ନିଜ ପରିବାର ସହ ପହଞ୍ଚି ଭଗବାନଙ୍କ ସମ୍ମୁଖରେ ଶପଥ ନେବାକୁ ପ୍ରସ୍ତୁତ। ଚନ୍ଦ୍ରବାବୁ ନାଇଡୁ କ’ଣ ନିଜ ପରିବାର ସହ ଏପରି କରିବାକୁ ପ୍ରସ୍ତୁତ କି ବୋଲି ପ୍ରଶ୍ନ କରିଛନ୍ତି ସାଂସଦ ୱାଇବି ରେଡ୍ଡି ।