ନୂଆଦିଲ୍ଲୀ,୧୯/୦୯: ବିସିସିଆଇର ପୂର୍ବତନ ସଭାପତି ତଥା ଭାରତୀୟ କ୍ରିକେଟ ଦଳର ପୂର୍ବତନ ଅଧିନାୟକ ସୌରଭ ଗାଙ୍ଗୁଲିଙ୍କୁ ମିଳିଛି ସାଇବର ଧମକ। ଏହାକୁ ନେଇ ସେ ପୋଲିସର ଦ୍ୱାରସ୍ଥ ହୋଇଛନ୍ତି। ଏନେଇ କୋଲକାତା ପୋଲିସ ନିକଟରେ ସେ ସାଇବର ଧମକ ଏବଂ ମାନହାନୀ ଅଭିଯୋଗ ଦାଖଲ କରିଛନ୍ତି। ବୁଧବାର ସୌରଭ ଗାଙ୍ଗୁଲିଙ୍କ ସଚିବ ତରଫରୁ ଥାନାରେ ଅଭିଯୋଗ ହୋଇଛି। 

ସୂଚନା ମୁତାବକ,ଇ-ମେଲ ଜରିଆରେ ଜଣେ ମୃଣମୟ ଦାସ ନାମକ ବ୍ୟକ୍ତି ସହ ଜଡିତ ସାଇବର ଧମକ ଓ ମାନହାନୀ ମାମଲରେ ଏହି ଅଭିଯୋଗ ଦାଖଲ କରାଯାଇଛି। ଏହି ବ୍ୟକ୍ତି ସୋସିଆଲ ମିଡିଆ ପ୍ଲାଟଫର୍ମରେ ଏକ ଭିଡିଓ ପୋଷ୍ଟ କରିଛନ୍ତି। ଏହା ସୌରଭ ଗାଙ୍ଗୁଲିଙ୍କୁ ଟାର୍ଗେଟ କରି ବ୍ୟବହୃତ ହୋଇଛି ଯାହା ତାଙ୍କ ପ୍ରତିଷ୍ଠା ପାଇଁ କ୍ଷତିକାରକ ବୋଲି ଅଭିଯୋଗରେ କୁହାଯାଇଛି। ସେପଟେ ଜଣେ ପୁଲିସ ଅଧିକାରୀ କହିଛନ୍ତି ଯେ, ସୌରଭ ଗାଙ୍ଗୁଲିଙ୍କ ସଚିବ ମଙ୍ଗଳବାର ରାତିରେ କୋଲକାତା ପୋଲିସର ସାଇବର ବିଭାଗକୁ ଏକ ଇ-ମେଲ ପଠାଇ ଅଭିଯୋଗ କରିଛନ୍ତି। ଗାଙ୍ଗୁଲିଙ୍କ ସଚିବ ଇ-ମେଲ ସହିତ ଏକ ଭିଡିଓ ଲିଙ୍କ ମଧ୍ୟ ସେୟାର କରିଛନ୍ତି। ଏହି  ଇ-ମେଲ ଆମେ ପାଇଛୁ ଏବଂ ପୂରା ଘଟଣାର ଯାଞ୍ଚ ପରେ ତଦନ୍ତ ଜାରି ରହିଛି ବୋଲି କହିଛନ୍ତି ପୋଲିସ ଅଧିକାରୀ ।