ଲକ୍ଷ୍ନୌ: ମହାକୁମ୍ଭ ସମୟରେ ଗଙ୍ଗା ନଦୀର ଜଳକୁ ନେଇ ଆସିଥିବା ରିପୋର୍ଟରେ ସତ୍ୟତା ନଥିବା କହିଛନ୍ତି ଉତ୍ତର ପ୍ରଦେଶର ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ । କୋଟି କୋଟି ଶ୍ରଦ୍ଧାଳୁ ବୁଡ଼ ପକାଉଥିବା ସଙ୍ଗମ ଜଳରେ ମାରାତ୍ମକ ଜୀବାଣୁ ଥିବା ନେଇ କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି) ରିପୋର୍ଟ ଦେବା ପରେ ବିବାଦ ମୁଣ୍ଡ ଟେକିଛି । ସେପଟେ ଏହି ରିପୋର୍ଟ ଭୁଲ୍‌ ବୋଲି କହିଛନ୍ତି ମୁଖ୍ୟମନ୍ତ୍ରୀ ଆଦିତ୍ୟନାଥ । 

ରାଜ୍ୟ ବିଧାନସଭାରେ ଯୋଗୀ ଆଦିତ୍ୟନାଥ କହିଛନ୍ତି, ଉତ୍ତର ପ୍ରଦେଶ ପ୍ରଦୂଷଣ ନିୟନ୍ତ୍ରଣ ବୋର୍ଡ ଜଳର ଗୁଣବତ୍ତା ନିରନ୍ତର ଭାବରେ ତଦାରଖ କରୁଛି। ତ୍ରିବେଣୀ ଜଳର ଗୁଣବତ୍ତା ବିଷୟରେ ପ୍ରଶ୍ନ ଉଠାଯାଉଛି । ସଙ୍ଗମ ଏବଂ ଏହାର ଆଖପାଖରେ ଥିବା ସମସ୍ତ ପାଇପ୍ ଏବଂ ଡ୍ରେନ୍ ଟ୍ୟାପ୍ କରାଯାଇଛି । ବିଶୋଧନ ପରେ ହିଁ ପାଣି ଛଡାଯାଉଛି।  ୟୁପି ପ୍ରଦୂଷଣ ନିୟନ୍ତ୍ରଣ ବୋର୍ଡ ଜଳର ଗୁଣବତ୍ତା ବଜାୟ ରଖିବା ପାଇଁ ନିରନ୍ତର ତଦାରଖ କରୁଛି ।’  ପ୍ରୟାଗରାଜର ଗଙ୍ଗା ନଦୀରେ 'ମଳ କୋଲିଫର୍ମ' ଜୀବାଣୁର ଚିନ୍ତାଜନକ ସ୍ତର ଚିହ୍ନଟ କରିଥିବା କେନ୍ଦ୍ରୀୟ ପ୍ରଦୂଷଣ ନିୟନ୍ତ୍ରଣ ବୋର୍ଡ (ସିପିସିବି)ର ଏକ ରିପୋର୍ଟକୁ ନେଇ ବିବାଦ ମଧ୍ୟରେ ମୁଖ୍ୟମନ୍ତ୍ରୀ ଆଦିତ୍ୟନାଥ ଏହି ମନ୍ତବ୍ୟ ଦେଇଛନ୍ତି ।

ଉତ୍ତର ପ୍ରଦେଶ ବିଧାନସଭାରେ ମୁଖ୍ୟମନ୍ତ୍ରୀ ରାଜ୍ୟ ପ୍ରଦୂଷଣ ନିୟନ୍ତ୍ରଣ ବୋର୍ଡର ଆଜିର ରିପୋର୍ଟକୁ ଆଧାର କରି କହିଛନ୍ତି ଯେ, ‘ବାୟୁକେମିକାଲ ଅକ୍ସିଜେନ୍‌ର ଚାହିଦା ୩ ରୁ କମ୍ ଥିବା ବେଳେ ଦ୍ରବୀଭୂତ ଅମ୍ଳଜାନ ପ୍ରାୟ ୮-୯ ରହିଛି । ଏହାର ଅର୍ଥ ହେଉଛି ସଙ୍ଗମ ଜଳ କେବଳ ସ୍ନାନ ପାଇଁ ନୁହେଁ ବରଂ 'ଆଚମନ' ପାଇଁ ମଧ୍ୟ ଉପଯୁକ୍ତ ।’ ସେହିଭଳି ନଦୀ ଜଳରେ କୋଲିଫର୍ମ ଜୀବାଣୁ ବୃଦ୍ଧି ପାଇବାର ସମସ୍ୟା ଉପରେ ମୁଖ୍ୟମନ୍ତ୍ରୀ ଆଦିତ୍ୟନାଥ କହିଛନ୍ତି ଯେ, ଏହାର ଅନେକ କାରଣ ହୋଇପାରେ ଯେପରିକି ସ୍ୱେରେଜ୍ ଲିକେଜ୍ ଏବଂ ପଶୁପକ୍ଷୀଙ୍କ ମଳ। ପ୍ରୟାଗରାଜରେ କୋଲିଫର୍ମର ପରିମାଣ ପ୍ରତି  ୧୦୦ ମିଲି ଜଳରେ ୨୫୦୦ MPNରୁ କମ୍ ରହିଛି ।  ଏହାର ଅର୍ଥ ହେଉଛି ଏହି ମିଥ୍ୟା ଅଭିଯାନ କେବଳ ମହାକୁମ୍ଭକୁ ବଦନାମ କରିବା ପାଇଁ ହେଉଛି । ଏନଜିଟି ଅନୁସାରେ, କୋଲିଫର୍ମ ୧୦୦ମିଲି ଜଳରେ ୨୦୦ ଏମପିଏନରୁ କମ୍ ରହିଛି ବୋଲି କହିଛନ୍ତି ମୁଖ୍ୟମନ୍ତ୍ରୀ ଯୋଗୀ ଆଦିତ୍ୟନାଥ ।