ନୂଆଦିଲ୍ଲୀ: ଦିଲ୍ଲୀ ମୁଖ୍ୟମନ୍ତ୍ରୀ ରେଖା ଗୁପ୍ତାଙ୍କ ଶପଥ ଗ୍ରହଣ ଉତ୍ସବରେ ରାଜନୈତିକ ବାଦବିବାଦ ମଧ୍ୟ ଦେଖିବାକୁ ମିଳିଛି। ଗୁରୁବାର ରାମଲୀଳା ମୈଦାନରେ ଅନୁଷ୍ଠିତ ସମାରୋହରୁ ଆମ ଆଦମୀ ପାର୍ଟି ଦୂରତା ବଜାୟ ରଖିଥିଲା। ଶପଥ ଗ୍ରହଣ ସମାରୋହର ମଞ୍ଚରେ ପୂର୍ବତନ ମୁଖ୍ୟମନ୍ତ୍ରୀ ଆତିଶୀ ଏବଂ ଅରବିନ୍ଦ କେଜରିୱାଲଙ୍କ ସମେତ କୌଣସି ଆପ ନେତାଙ୍କୁ ଦେଖିବାକୁ ମିଳିନଥିଲା।

ଏହି ପ୍ରସଙ୍ଗରେ ବିଜେପି କହିଛି ଯେ, ପୂର୍ବତନ ମୁଖ୍ୟମନ୍ତ୍ରୀ ଆତିଶୀ ଏବଂ ଆମ ଆଦମୀ ପାର୍ଟିର ରାଷ୍ଟ୍ରୀୟ ସଂଯୋଜକ ଅରବିନ୍ଦ କେଜରିୱାଲଙ୍କୁ ଶପଥ ଗ୍ରହଣ ସମାରୋହକୁ ନିମନ୍ତ୍ରଣ କରାଯାଇଥିଲା । ହେଲେ ଶପଥ ଗ୍ରହଣ ଉତ୍ସବରେ AAPର କୌଣସି ନେତା ପହଞ୍ଚି ନାହାଁନ୍ତି।

ତଥାପି, ବୁଧବାର ଦିନ ପୂର୍ବତନ ମୁଖ୍ୟମନ୍ତ୍ରୀ ଅରବିନ୍ଦ କେଜରିୱାଲ ଏବଂ ଆତିଶୀ ରେଖା ଗୁପ୍ତାଙ୍କୁ ବିଜେପି ବିଧାୟକ ଦଳର ନେତା ନିର୍ବାଚିତ ହେବା ନେଇ ଅଭିନନ୍ଦନ ଜଣାଇଥିଲେ। କେଜରିୱାଲ କହିଥିଲେ ଯେ,"ଦିଲ୍ଲୀର ମୁଖ୍ୟମନ୍ତ୍ରୀ ହେବା ପାଇଁ ରେଖା ଗୁପ୍ତାଙ୍କୁ ଅନେକ ଅନେକ ଅଭିନନ୍ଦନ। ମୁଁ ଆଶା କରୁଛି ଯେ, ସେ ଦିଲ୍ଲୀବାସୀଙ୍କୁ ଦେଇଥିବା ସମସ୍ତ ପ୍ରତିଶ୍ରୁତି ପୂରଣ କରିବେ। ଦିଲ୍ଲୀବାସୀଙ୍କ ବିକାଶ ଏବଂ କଲ୍ୟାଣ ପାଇଁ ପ୍ରତ୍ୟେକ କାର୍ଯ୍ୟରେ ଆମେ ତାଙ୍କୁ ସମର୍ଥନ କରିବୁ।

ଆତିଶୀ କହିଛନ୍ତି, "ମୁଖ୍ୟମନ୍ତ୍ରୀ ହେବା ପାଇଁ ମୁଁ ରେଖା ଗୁପ୍ତାଙ୍କୁ ଅଭିନନ୍ଦନ ଜଣାଉଛି।" ମୁଁ ଆଶା କରୁଛି ଯେ ବିଜେପି ଦିଲ୍ଲୀବାସୀଙ୍କୁ ଦେଇଥିବା ସମସ୍ତ ପ୍ରତିଶ୍ରୁତି ପୂରଣ କରିବ। ଦିଲ୍ଲୀର ବିକାଶ କାର୍ଯ୍ୟ ପାଇଁ ଆମ ଆଦମୀ ପାର୍ଟି ସବୁବେଳେ ବିଜେପିକୁ ସମର୍ଥନ ଦେବାକୁ ପ୍ରସ୍ତୁତ।

ଏହା ସହିତ, ସେ ମହିଳା ମାନଙ୍କୁ ପ୍ରତିମାସରେ ୨୫ଶହ ଟଙ୍କା ଦେବାର ପ୍ରତିଶ୍ରୁତି ମନେ ପକାଇ ଦେଇଥିଲେ। ଆତିଶୀ କହିଛନ୍ତି, "ଆମେ ଆଶା କରୁଛୁ ଯେ ବିଜେପି ଦ୍ୱାରା ମହିଳା ମାନଙ୍କୁ ପ୍ରତିଶୃତି ଦିଆଯାଇଥିବା ମାସିକ ଅଢେଇ ହଜାର ଟଙ୍କା ୮ ମାର୍ଚ୍ଚରେ ସମସ୍ତ ମହିଳାଙ୍କ ଆକାଉଣ୍ଟକୁ ଯିବ।