ପାଟଣାଗଡ଼ ୫/୭ (ଆପ୍ର) ପାଟଣାଗଡ଼ ବ୍ଳକରେ ସମିତି ସଭ୍ୟସଭ୍ୟା ଓ ଏନ୍ଏସି ରେ କାଉନସିଲର ମାନଙ୍କ ଆନ୍ଦୋଳନ ନବମ ଦିନରେ ପହଞ୍ଚିଛି । ଏହି ଆନ୍ଦୋଳନ ଧିରେ ଧିରେ ଉଗ୍ରରୂପ ନେଉଛି । ବ୍ଳକ କାର୍ଯ୍ୟାଳୟ ସମ୍ମୁଖରେ ଧାରଣାରେ ବସିଥିବା ସମିତି ସଭ୍ୟସଭ୍ୟା ମାନେ ଶନିବାର ବ୍ଳକ କାର୍ଯ୍ୟାଳୟକୁ ସମ୍ପୁର୍ଣ୍ଣ ଭାବେ ବନ୍ଦ କରିଦେଇଥିଲେ । ପରେ ଆନ୍ଦୋଳନ କାରିମାନେ ଶାନ୍ତିପୂର୍ଣ୍ଣ ଭାବେ ଧାରଣାରେ ବସିଥିଲେ । ଯାହାଫଳରେ ବିଡ଼ିଓ ସୁମନ ମିଞ୍ଜ ଙ୍କ ସମେତ ବ୍ଳକର ଅନ୍ୟାନ୍ୟ ବିଭାଗୀୟ କର୍ମଚାରୀ ମାନେ ଅଫିସ ବାହାରେ ବସିରହିଥିଲେ । ଅପରପକ୍ଷରେ ୯ ଦିନ ହେଲା ସରକାରୀ କାର୍ଯ୍ୟ ବ୍ଳକ ଓ ଏନ୍ଏସିରେ ସମ୍ପୁର୍ଣ୍ଣ ଭାବେ ଠପ୍ ହୋଇପଡିଥିବାରୁ ଲୋକଙ୍କ କୈ।ଣସି କାମ ହୋଇ ପାରୁନାହିଁ । ଯାହାଫଳରେ ବିଭିନ୍ନ କାମପାଇଁ ବ୍ଳକ ଓ ଏନ୍ଏସି କୁ ଆସୁଥିବା ମହିଳା ଓ ପୁରୁଷ ମାନେ ବହୁ ଅସୁବିଧାର ସମ୍ମୁଖୀନ ହୋଇ ଘରକୁ ଫେରୁଥିବାର ଦେଖିବାକୁ ମିଳୁଛି ।
ଏହି ଧାରଣାରେ ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀଙ୍କ ସମେତ ସମିତି ସଭ୍ୟସଂଘ ସଭାପତି ଗୋବିନ୍ଦ ମେହେର, ଫଟାମୁଣ୍ଡା ସମିତି ସଭ୍ୟ ଜୟନ୍ତ କୁମ୍ଭାର ଙ୍କ ସମେତ ଅନ୍ୟ ସମିତି ସଭ୍ୟସଭ୍ୟାମାନେ ଧାରଣାରେ ବସିଥିଲେ । ସେହିପରି ଏନ୍ଏସି କାର୍ଯ୍ୟଳୟ ସମ୍ମୁଖରେ ଧାରଣା ଜାରୀ ରହିଥିବା ବେଳେ ଅଧ୍ୟକ୍ଷା ମାନସୀ ବିଶ୍ଵାଳଙ୍କ ସମେତ ଅନ୍ୟ ୧୧ ଜଣ କାଉନସିଲର ଧାରଣାରେ ବସିଛନ୍ତି।
ପ୍ରକାଶ ଥାଉକି,ଗତ ଆଠ ମାସ ହେଲା ବ୍ଳକ ଓ ଏନ୍ଏସି ଅଞ୍ଚଳରେ ସମସ୍ତ ପ୍ରକାର ଉନ୍ନୟନମୂଳକ କାମ ଠପ୍ ହୋଇଯାଇଛି। ଏନେଇ ସମିତି ସଭ୍ୟସଭ୍ୟା ଓ କାଉନସିଲର ମାନେ ବିଡ଼ିଓ, ଏନ୍ଏସି ଇଓ, ଉପଜିଲ୍ଲାପାଳ, ପରିଶେଷରେ ଜିଲ୍ଲାପାଳଙ୍କୁ ମଧ୍ୟ ଅଭିଯୋଗ କରି ନିରାଶ ହେବାପରେ ଆନ୍ଦୋଳନକୁ ଓହ୍ଲେଇ ଥିଲେ ।
