ପାଟଣାଗଡ, ୩|୭(ଆପ୍ର) : ପାଟଣାଗଡ଼ ବ୍ଳକରେ ସମିତି ସଭ୍ୟସଭ୍ୟା ଓ ଏନ୍ଏସିରେ କାଉନସିଲରମାନଙ୍କ ଆନ୍ଦୋଳନ ଗୁରୁବାର ସପ୍ତମ ଦିନରେ ପହଞ୍ଚିଛି। ସଂଘର ଜିଲ୍ଲା ସଭାପତି ଗୋପାଳ ବାଗ ଓ ସମ୍ପାଦକ ମୁରଲି କୁମ୍ଭାରଙ୍କ ନେତୃତ୍ବରେ ଏକ ଆଠ ଜଣିଆ ପ୍ରତିନିଧି ଦଳ ଆନ୍ଦୋଳନ ସ୍ଥଳରେ ପହଞ୍ଚି ଧାରଣାରତ ସମିତି ସଭ୍ୟସଭ୍ୟାଙ୍କୁ ସମର୍ଥନ ଜଣାଇଥିଲେ। 

ବ୍ଳକ ଉପାଧ୍ୟକ୍ଷା ଲକ୍ଷ୍ମୀ ମାଝୀ, ସମିତି ସଭ୍ୟସଂଘ ସଭାପତି ଗୋବିନ୍ଦ ମେହେର, ଫଟାମୁଣ୍ଡା ସମିତି ସଭ୍ୟ ଜୟନ୍ତ କୁମ୍ଭାର ଙ୍କ ସମେତ ଅନ୍ୟ ସମିତି ସଭ୍ୟସଭ୍ୟା ଧାରଣାରେ ବସିଥିଲେ। ସେହିପରି ଏନ୍ଏସି ରେ ଗତ କାଲି ଅତିରିକ୍ତ ଜିଲ୍ଲାପାଳ ସେବନ କେରକେଟାଙ୍କୁ ଇଓ ଦାୟିତ୍ୱ ଦିଆଯାଇଛି। ଏନ୍ଏସି କାର୍ଯ୍ୟଳୟ ସମ୍ମୁଖ ରେ ଧାରଣା ଜାରୀ ରହିଥିବା ବେଳେ ଅଧ୍ୟକ୍ଷା ମାନସୀ ବିଶ୍ଵାଳ ଙ୍କ ସମେତ ଅନ୍ୟ ୧୧ ଜଣ କାଉନସିଲର ଧାରଣାରେ ବସିଛନ୍ତି। 

ପ୍ରକାଶ ଥାଉକି,ଗତ ଆଠ ମାସ ହେଲା ବ୍ଳକ ଓ ଏନ୍ଏସି ଅଞ୍ଚଳରେ ସମସ୍ତ ପ୍ରକାର ଉନ୍ନୟନମୂଳକ କାମ ଠପ୍ ହୋଇଯାଇଛି। ଏନେଇ ସମିତି ସଭ୍ୟସଭ୍ୟା ଓ କାଉନସିଲର ମାନେ ବିଡ଼ିଓ, ଏନ୍ଏସି ଇଓ, ଉପଜିଲ୍ଲାପାଳ,  ଜିଲ୍ଲାପାଳଙ୍କୁ ମଧ୍ୟ ଅଭିଯୋଗ କରି ନିରାଶ ହେବାପରେ ଆନ୍ଦୋଳନକୁ ଓହ୍ଲେଇ ଥିଲେ।