ପ୍ରୟାଗରାଜ ୩୧/୦୧: ପ୍ରୟାଗରାଜ ମହାକୁମ୍ଭର ଅନେକ ଫଟୋ ଓ ଭିଡିଓ ସୋସିଆଲ ମିଡିଆରେ ଭାଇରାଲ ହେଉଛି । ଏହି କ୍ରମରେ ଏକ ଭିଡିଓରେ ବାବାଙ୍କ ନକଲ କରି ସାଙ୍ଗରେ ଚାଲୁଥିବା ଜଣେ ବ୍ୟକ୍ତିଙ୍କୁ ବାବା ଚାପୁଡ଼ା ମାରୁଥିବା ଦେଖିବାକୁ ମିଳିଛି । ମହାକୁମ୍ଭରେ ଶ୍ରଦ୍ଧାଳୁ ଆସ୍ଥାର ବୁଡ଼ ପକାଉଥିବା ବେଳେ କିଛି ୟୁଟ୍ୟୁବର ହାତରେ ମୋବାଇଲ ଫୋନ୍ ଧରି ଭିଡିଓ କରି ପ୍ରସିଦ୍ଧ ହେବାକୁ ପ୍ରୟାସ କରୁଛନ୍ତି । ଏକ୍ସ ପ୍ଲାଟ୍ଫର୍ମରେ ଶେୟାର କରାଯାଇଥିବା ଭିଡିଓର କ୍ୟାପ୍ସନରେ ଉଲ୍ଲେଖ ହୋଇଛି ‘ଭାଇ ବାବାଙ୍କ ନକଲ କରିବାକୁ ଚେଷ୍ଟା କଲେ, ତାଙ୍କୁ ଏକ ଚାପୁଡ଼ା ମିଳିଲା ।’ ବାବା ଯେଉଁ ବ୍ୟକ୍ତିଙ୍କୁ ଚାପୁଡ଼ା ମାରିଲେ, ସେ ଜଣେ ୟୁଟ୍ୟୁବର । ଗୋଟିଏ ହାତ ଉପରକୁ ଉଠାଇ ମହାକାଳ ଗିରୀ ବାବାଙ୍କ ନକଲ କରି କଣ୍ଟେଣ୍ଟ୍ କ୍ରିଏଟ୍ କରିବାକୁ ସେ ଚେଷ୍ଟା କରୁଥିଲେ । ଭିଡିଓ ସାମ୍ନାକୁ ଆସିବା ପରେ ସୋସିଆଲ ମିଡିଆ ୟୁଜର୍ ଭିନ୍ନ ଭିନ୍ନ ପ୍ରତିକ୍ରିୟା ଦେଉଛନ୍ତି ।
କିଛି ବାବାଙ୍କ ଚାପୁଡ଼ା ମାରିବାର କାରଣ ପଚାରୁଛନ୍ତି, ଆଉ କିଛି ଏହାକୁ ଠିକ୍ ବୋଲି କହୁଛନ୍ତି । ୟୁଟ୍ୟୁବରଙ୍କୁ ଚାପୁଡ଼ା ମାରିଥିବା ମହାକାଳ ଗିରୀ ବାବା ଗତ ୯ ବର୍ଷରୁ ନିଜର ଗୋଟିଏ ହାତ ଉପରକୁ କରି ରଖିଛନ୍ତି । ବାବା ମଧ୍ୟପ୍ରଦେଶରୁ ମହାକୁମ୍ଭକୁ ଆସିଛନ୍ତି । ଗୋବଂଶ ରକ୍ଷା ଓ ଧର୍ମ ରକ୍ଷା ପାଇଁ ବାବା ଆଜୀବନ ସଂକଳ୍ପ ନେଇଛନ୍ତି । ଏହି ତପସ୍ୟା ଯୋଗୁ ତାଙ୍କ ହାତର ନଖ ଖୁବ୍ ବଢ଼ିଯାଇଛି । କିନ୍ତୁ ତପସ୍ୟାରେ ନଖ କଟାଯାଏ ନାହିଁ । ଏହି ସାଧନା ଯୋଗୁ ଲୋକେ ତାଙ୍କୁ ହଠଯୋଗୀ ମଧ୍ୟ କହୁଛନ୍ତି ।
