ନବରଙ୍ଗପୁର, ୨୫/୦୧: ବ୍ୟବସାୟୀଙ୍କ ଘରେ ପଶି ମାରଣାସ୍ତ୍ର ଦେଖାଇ ୧୪ ଲକ୍ଷ ଟଙ୍କା ସହ ୩୦ ଗ୍ରାମ ସୁନା ଅଳଙ୍କାର ଲୁଟ ଘଟଣାରେ ପୋଲିସକୁ ମିଳିଲା ସଫଳତା । ଘଟଣାର ୧୨ ଦିନ ମଧ୍ୟରେ ୨ ଜଣ ଅଭିଯୁକ୍ତଙ୍କୁ ଗିରଫ କରିଛି ନବରଙ୍ଗପୁର ପୋଲିସ । ସେମାନଙ୍କ ଠାରୁ ୧୧ ଲକ୍ଷ ୨୩ ହଜାର ଟଙ୍କା ଓ ୩୦ ଗ୍ରାମ ସୁନା ଜବତ କରିଛି ପୋଲିସ । ନବରଙ୍ଗପୁର ଜିଲ୍ଲାରେ ଏଭଳି ଘଟଣା ଘଟିଥିବାର ଖବର ସାମ୍ନାକୁ ଆସିଛି ।
ସୂଚନା ମୁତାବକ, ଜାନୁଆରୀ ୧୩ ତାରିଖରେ ଦୁଇଜଣ ଚୋର ଛୁରୀ ଧରି ନବରଙ୍ଗପୁର ସହର ସ୍ଥିତ ଦାରୁବନ୍ଧ ସାହିରେ ରହୁଥିବା ତେଜରାତି ବ୍ୟବସାୟୀ ସରୋଜ ମହାନ୍ତିଙ୍କ ଘର ଭିତରକୁ ପଶିଥିଲେ । ସେ ସମୟରେ ଘର ମାଲିକ ସରୋଜ ଅନୁପସ୍ଥିତ ଥିଲେ । ଏହାର ଫାଇଦା ନେଇ ସରୋଜଙ୍କ ସ୍ତ୍ରୀ ଅମିତା ମହାନ୍ତିଙ୍କ ବେକରେ ଗାମୁଛା ବାନ୍ଧିବା ସହ ଛୁରୀ ଦେଖାଇ ଆଲମାରୀରେ ଥିବା ୧୪ ଲକ୍ଷ ଟଙ୍କା ସହ ୩୦ ଗ୍ରାମ ସୁନା ଅଳଙ୍କାର ଲୁଟିନେଇ ଚମ୍ପଟ ମାରିଥିଲେ । ଏହାପରେ ସ୍ଥାନୀୟ ନବରଙ୍ଗପୁର ଆଦର୍ଶ ଥାନାରେ ପରିବାର ପକ୍ଷରୁ ଅଭିଯୋଗ ହେବାପରେ ଘଟଣା ସ୍ଥଳରେ ନବରଙ୍ଗପୁର ଏସପି ପହଞ୍ଚି ଘଟଣାର ତଦନ୍ତ କରିଥିଲେ । ତେବେ ଏହି ଘଟଣାର ୧୨ ଦିନ ମଧ୍ୟରେ ୨ ଜଣ ଲୁଟେରାକୁ ପୋଲିସ ଗିରଫ କରିଛି ।
