ଚନ୍ଦାହାଣ୍ଡି,୪/୨ :  ଆନ୍ଧ୍ରପ୍ରଦେଶରେ ଦୁର୍ଘଟଣାରେ ମୃତ୍ୟୁ ହୋଇଥିବା ଚନ୍ଦାହାଣ୍ଡି ଥାନା ଅଧିନ ଖଇରଭାଡ଼ି ଗ୍ରାମର ଦାଦନ ଶ୍ରମିକ ରୋହିତ ଗୌଡ଼ଙ୍କ ସ୍ତ୍ରୀ ଖିରମଣିଙ୍କୁ ୭ହଜାର ଟଙ୍କାର ସହାୟତା ରାଶି ପ୍ରଦାନ କଲେ ଚନ୍ଦାହାଣ୍ଡି ତହସିଲଦାର ସହଦେଵ କୂତୃକା l ଏହାସହ ମୃତକ ପରିବାରର ସମସ୍ୟା ନେଇ ପଚାରି ବୁଝିଥିଲେ l ମୃତକ ଦାଦନ ଶ୍ରମିକ ରୋହିତ ଗୌଡ଼ଙ୍କୁ ବର୍ତ୍ତମାନ ସୁଧା ପ୍ରଶାସନ ଜବକାର୍ଡ ପ୍ରଦାନ କରି ନ ଥିବା ସହ ଆନ୍ଧ୍ରରୁ ଶବ ଆଣିବା ପାଇଁ   ପ୍ରଶାସନ କୌଣସି ସହାୟତା କରି ନ ଥିବାରୁ ବ୍ୟକ୍ତିଗତ ୨୦ହଜାର ଏବଂ ଗାଡ଼ି ମାଲିକ ୨୫୦୦୦ଟଙ୍କା ଦେବାରୁ ଶବ ଆସିଥିବା ନେଇ ଗ୍ରାମବାସୀ ତୀବ୍ର ଅସନ୍ତୋଷ୍ଟ ପ୍ରକାଶ କରିଥିଲେ l 

ଦାଦନ ମୃତ୍ୟୁ ଖବର ବିଭିନ୍ନ ଗଣମାଧ୍ୟମରେ ପ୍ରକାଶ ପାଇଥିଲେ ମଧ୍ୟ ଶ୍ରମ ଅଧିକାରୀଙ୍କ ଦେଖା ଦର୍ଶନ ନ ମିଳିବା ନେଇ ଏଠାରେ ତୀବ୍ର ଅସନ୍ତୋଷ ପ୍ରକାଶ ପାଇଛି l ଏ ନେଇ ଜିଲ୍ଲାପାଳ ତୁରନ୍ତ ଦୃଷ୍ଟି ଦେବାକୁ ଗ୍ରାମବାସୀ ଦାବି କରିଛନ୍ତି l ପ୍ରକାଶ ଯେ, ଗତ ୨୬ତାରିଖ ଖଇରଭାଡି ଗ୍ରାମର ରୋହିତ ଚନ୍ଦାହାଣ୍ଡି ଅଞ୍ଚଳର ୪ଜଣ ଯୁବକ ସହ ମିଶି  ଦାଦନ ଖଟିବା ପାଇଁ ହାଇଦ୍ରାବାଦ ଯାଇଥିଲେ l ଆନନ୍ଦପୂରମଠାରେ ରାସ୍ତା ପାର ହେଉଥିବା ସମୟରେ ରୋହିତକୁ ଟ୍ରକ ଧକ୍କା ଦେବା ଫଳରେ ସେଠାରେ ହିଁ ତାର ମୃତ୍ୟୁ ହୋଇ ଶବ ରାସ୍ତାରେ ପଡିଥିଲା l ରାସ୍ତାରୁ ଶବ ଜବତ କରି ପୋଲିସ ପରିବାର ଳୋକଙ୍କୁ ଖବର ଦେଇଥିବାରୁ ପରିବାର ଲୋକେ ସେଠାକୁ ଯାଇ ଏତଲା ଦେବା ପରେ ଶବ ବ୍ୟବଚ୍ଛେଦ କରି ଗାଁକୁ ଆଣିଥିଲେ l