ଚନ୍ଦାହାଣ୍ଡି,୨୪/୧ : ନବରଙ୍ଗପୁର ଜିଲ୍ଲା ଚନ୍ଦାହାଣ୍ଡି ବ୍ଲକ କାର୍ଯ୍ୟାଳୟରେ ବିଭିନ୍ନ ବିଭାଗୀୟ ଅଧିକାରୀ ଏବଂ କର୍ମଚାରୀ ମରୁଡିର ସମସ୍ୟାକୁ ନେଇ  ଚନ୍ଦାହାଣ୍ଡି ବିଡିଓ ରାମକୃଷ୍ଣ ନାୟକଙ୍କୁ ଭେଟି ଆଲୋଚନା କଲେ ସାଂସଦ ପ୍ରତିନିଧି   ବସନ୍ତ ମାଝି ଏବଂ ବିଜେପି ପ୍ରତିନିଧି ଦଳ l ଏଠାରେ ବିଭିନ୍ନ ବିଭାଗୀୟ ଅଧିକାରୀ ଏବଂ କର୍ମଚାରୀ ପଦବୀ ଖାଲି ପଡ଼ିଥିବା ଫଳରେ ବ୍ଲକର ଜନସାଧାରଣଙ୍କ ବିକାଶ ମୂଳକ କାର୍ଯ୍ୟ କରିବା ପାଇଁ ବିଶେଷ ଅସୁବିଧା ଦେଖା ଦେଉଥିବା ନେଇ ବିଡିଓ ରାମକୃଷ୍ଣ ନାୟକ ସାଂସଦ ପ୍ରତିନିଧି ଏବଂ ବିଜେପି ପ୍ରତିନିଧି ଦଳକୁ ପ୍ରକାଶ କରିବା ସହ ଏ ବାବଦରେ ଜିଲ୍ଲାକୁ ରିପୋର୍ଟ ଦେଇଥିବା ନେଇ ସୂଚନା ଦେଇଥିଲେ l ଏଠାରେ ଖୁବଶୀଘ୍ର କର୍ମଚାରୀ ଏବଂ ଅଧିକାରୀ ପୂରଣ ପାଇଁ ସାଂସଦଙ୍କ ଦୃଷ୍ଟି ଆକର୍ଷଣ କରାଯିବ ବୋଲି ସାଂସଦ ପ୍ରତିନିଧି ବସନ୍ତ ମାଝି ଗଣମାଧ୍ୟମକୁ ପ୍ରକାଶ କରିଛନ୍ତି l

ପ୍ରକାଶ ଯେ, ଚନ୍ଦାହାଣ୍ଡି ବ୍ଲକ କାର୍ଯ୍ୟାଳୟରେ ଏବିଡିଓ ପଦବୀ ଖାଲି ପଡ଼ିଥିବାରୁ ଏଠାରେ ଜନସାଧାରଣଙ୍କ ବିକାଶ କାର୍ଯ୍ୟରେ ବିଶେଷ ଅସୁବିଧା ଦେଖାଦେଉଛି l ମଙ୍ଗଳ ସମ୍ପ୍ରସାରଣ ଅଧିକାରୀ ପଦବୀ ଖାଲି ପଡିବା ଫଳରେ   ଆଦିବାସୀ ଏବଂ ହରିଜନ କଲ୍ୟାଣ କାର୍ଯ୍ୟ ଠିକ ଭାବରେ ହୋଇ ପାରୁ ନ ଥିବାବେଳେ ଏକାଉଣ୍ଟ ଅଧିକାରୀ ପଦବୀ ଦୀର୍ଘ ଦିନ ହେବ ଖାଲି ପଡିଥିବାରୁ ଏଠାରେ ବିଭିନ୍ନ ବିଭାଗର ଅର୍ଥ ଠିକ ଭାବରେ ହିସାବ ହୋଇପାରୁନି l ଏହା ବ୍ୟତୀତ ଚନ୍ଦାହାଣ୍ଡି ବ୍ଲକରେ ୭ଟି ପଞ୍ଚାୟତର ପିଇଓ ପଦବୀ ଖାଲିପଡ଼ିଥିବା ନେଇ ଜିପିଡିଓ ବାନାମ୍ଭର ଦାଶ ପ୍ରକାଶ କରିଛନ୍ତି l  

୩ଟି ପଞ୍ଚାୟତକୁ ଜଣେ ପିଇଓମାନଙ୍କୁ ଦାୟିତ୍ୱ ଦିଆଯାଇଥିବାରୁ ପଞ୍ଚାୟତସ୍ତରରେ ଲୋକଙ୍କ ବିଭିନ୍ନ ଉନ୍ନୟନମୂଳକ କାର୍ଯ୍ୟରେ ବାଧା ଆସୁଥିବା ନେଇ ଶ୍ରୀ ଦାଶ ସୂଚନା ଦେଇଥିଲେ l ୧୪ଟି ପଂଚାୟତରେ ରୋଜଗାର ସହାୟକ ପଦବୀ ଖାଲି ପଡ଼ିଥିବାରୁ ପଞ୍ଚାୟତରେ ଏନଆରଜିଏସ କାର୍ଯ୍ୟରେ ବିଶେଷ ବାଧା ଦେଖାଦେଉଛି l ଏ ଦିଗରେ ଜିଲ୍ଲା ପ୍ରଶାସନ ଏକ ସ୍ୱତନ୍ତ୍ର ଦୃଷ୍ଟି ଦେଇ ପଦକ୍ଷେପ ନେବାକୁ ବିଭିନ୍ନ ମହଲରେ ଦାବି କରାଯାଇଛି l ଏହି ଅବସରରେ ବରିଷ୍ଠ ନେତା ଭରତ ବାଗ, ଶ୍ୟାମ ସୁନ୍ଦର ମାଝି, ଭୋଦେବ ବାଗ, କାର୍ତ୍ତିକ ମାଳି, ପ୍ରମୁଖ ବିଜେପିର ପ୍ରତିନିଧି ଦଳ ଉପସ୍ଥିତ ଥିଲେ l