ନୀଳଗିରି, ୨୪/୧ : ନୀଳଗିରି ବ୍ଲକ ତଥା ଔପଦା ବ୍ଲକରେ ଏବେ ବିଭିନ୍ନ ଧାନ ମଣ୍ଡିରେ ଚାଷୀଙ୍କୁ କରାଯାଉଛି ଶୋଷଣ । ୮ ରୁ ୧୦ପ୍ରତିଶତ କଟାଯାଉଥିବାବେଳେ ମିଲରଙ୍କ ମନମାନି କ୍ରମଶଃ ବୃଦ୍ଧି ପାଇବାରେ ଲାଗିଛି । ଯୋଗାଣ ମନ୍ତ୍ରୀଙ୍କ ତାଗିଦ ସତ୍ବେ ମିଲରମାନେ କିଛି ସରକାରୀ ଅଧିକାରୀଙ୍କୁ ହାତବାରିସୀ କରି ଚାଷୀଙ୍କୁ ଶୋଷଣ କରୁଛନ୍ତି । ଆଜି ଏଭଳି କିଛି ଅଭିଯୋଗ ପାଇ ନୀଳଗିରି ବିଧାୟକ ସନ୍ତୋଷ ଖଟୁଆ ଦକ୍ଷିଣ ନରସିଂହପୁର ଧାନ ମଣ୍ଡିକୁ ଅଚାନକ ପରିଦର୍ଶନ କରି ଚାଷୀଙ୍କ ସମସ୍ୟା ବୁଝିଛନ୍ତି । ଔପଦା ବ୍ଲକ ଦକ୍ଷିଣ ନରସିଂହପୁର ପଞ୍ଚାୟତରେ ଥିବା ସେବା ସମବାୟ ସମିତି ପରିସରରେ ଧାନ କିଣା ହେଉଥିବାବେଳେ ଚାଷୀଙ୍କୁ ହେଉଥିଲା କଟନୀ ଛଟନୀ।
ଉନ୍ନତ ମାନର ଧାନ ଆଣିଥିବା ଚାଷୀମାନେ କାହିଁକି ଏତେ ପ୍ରତିଶତ କଟାଯାଉଛି କହି ପରିଦର୍ଶନ କରିଥିଲେ । ଏହି ଧାନ ମଣ୍ଡିରେ ଧାନ ବେପାରୀମାନେ ସକ୍ରିୟ ଥିବାବେଳେ ମିଲର ଓ ସରକାରୀ ଅଧିକାରୀଙ୍କୁ ଧରି କିଛି ଚାଷୀଙ୍କୁ ହାତ ବାରିସୀ କରି ତାଙ୍କର କଳା ସାମ୍ରାଜ୍ୟ ବିସ୍ତାର କରିଥିଲେ । ହେଲେ ଯେଉଁମାନେ ପ୍ରକୃତ ଚାଷୀ ଭଲ ଧାନ ଆଣି ମଧ୍ୟ ଶୋଷଣର ଶିକାର ହେଉଥିଲେ ଘଟଣାକୁ ନେଇ କାର୍ଯ୍ୟରତ ସେକ୍ରେଟାରୀ ମଧ୍ୟ ଚୁପ ରହିବା ସହ କିଛି ଚାଷୀଙ୍କୁ ନାଲି ଆଖି ଦେଖାଉଥିବା ଅଭିଯୋଗ ହୋଇଥିଲା।
ସ୍ଥାନୀୟ ବିଧାୟକ ସନ୍ତୋଷ ଖଟୁଆ ଖବରପାଇ ଧାନ ମଣ୍ଡିକୁ ଆଜି ଅଚାନକ ପରିଦର୍ଶନ କରି ଚାଷୀଙ୍କ ସମସ୍ୟା ବୁଝିଥିଲେ। ଏପରିକି କମ୍ପ୍ୟୁଟର ମଧ୍ୟ ଯାଞ୍ଚ କରିବା ସହ ଧାନର ମାନ ଅଧିକାରୀଙ୍କ ଆଗରେ ଯାଞ୍ଚ କରିଥିଲେ । ତେବେ ଚାଷୀଙ୍କୁ ଶୋଷଣ କଲେ ରାଜ୍ୟସରକାରଙ୍କ ନିର୍ଦେଶରେ କଠୋର କାର୍ଯ୍ୟନୁଷ୍ଠାନ ହେବ ବୋଲି ଚେତାବନୀ ଦେବା ସହ ଆଇନ ଅନୁସାରେ କାମ କରିବାକୁ ନିର୍ଦେଶ ଦେଇଥିଲେ । ବିଧାୟକ ଶ୍ରୀ ଖଟୁଆଙ୍କ ଏଭଳି ଧାନମଣ୍ଡିକୁ ଅଚାନକ ପରିଦର୍ଶନ ପରେ କଳା ବେପାରୀଙ୍କ ମଧ୍ୟରେ ଛନକା ପଶିଥିବା ଜଣାପଡ଼ିଛି ।
