କାଶୀପୁର,୨୪/୧ : କାଶୀପୁର ବ୍ଲକ ଦୋରାଗୁଡା ଥାନା ଅନ୍ତର୍ଗତ ନୂଆପଡ଼ାସ୍ଥିତ ଏକ କ୍ୟାଣ୍ଟିନରେ କାମ କରୁଥିବା ଜଣେ ଯୁବକ ନିଆଁରେ ପୋଡ଼ି ଯାଇ ଗୁରୁତରଥିବା ଜଣାପଡ଼ିଛି । ଆହତ ଅବସ୍ଥାରେ ଥିବା ଯୁବକ ଜଣକ ତିନି ଦିନ ଧରି ସ୍ଥାନୀୟ ନୂଆପଡା ସ୍ୱାସ୍ଥ୍ୟକେନ୍ଦ୍ରରେ ଚିକିତ୍ସିତ ହେଉଥିବାବେଳେ ଆଶୁ ଚିକିତ୍ସା ପାଇଁ କୌଣସି ବଡ଼ ଡାକ୍ତରଖାନା ସ୍ଥାନାନ୍ତର ପାଇଁ ପରିବାର ଲୋକେ ଦାବି କରିଛନ୍ତି ।
ଯୁବକ ଜଣକ ହେଲେ କଳାହାଣ୍ଡି ଜିଲ୍ଲା ଅନ୍ତର୍ଗତ ଥୁଆ ମୂଳ ରାମପୁର ବ୍ଲକ ମୁସ୍କଟା ଗ୍ରାମର ଅସ୍ତ ମୁଦୁଲିଙ୍କ ପୁଅ ପୁରନ୍ଦର ମୁଦୁଲି ବୋଲି ଜଣାପଡ଼ିଛି। ପୁରନ୍ଦର ଗତ କିଛି ବର୍ଷ ଧରି କ୍ୟାଣ୍ଟିନରେ ରାନ୍ଧୁଣିଆ ଭାବେ କରୁଥିବାବେଳେ କୌଣସି କାରଣରୁ ତାଙ୍କ ଦେହର ପୋଷକରେ ନିଆଁ ଲାଗିଯାଇଥିଲା । ପାଖରେ ଥିବା ଜଣେ ସାଥି ତୁରନ୍ତ ତାଙ୍କ ଦେହରୁ ପୋଷାକକୁ ଚିରିବାହାର କରିଥିଲେ । ତଥାପି ତାଙ୍କ ଶରୀରର କିଛି ଅଂଶ ପୋଡି ଯାଇଛି । ତୁରନ୍ତ ତାଙ୍କୁ ନିକଟରେ ଥିବା ନୂଆପଡା ମେଡ଼ିକାଲରେ ଭର୍ତ୍ତି କରାଯାଇଛି ।
ଖବରପାଇ ପୀଡିତଙ୍କ ପରିବାର ନୂଆପଡ଼ା ପହଞ୍ଚି ସେବା ଶୁଶ୍ରୁଷା କରୁଥିବାବେଳେ କ୍ୟାଣ୍ଟିନ ପରିଚାଳନା କରୁଥିବା ଠିକାଦାର କିମ୍ବା ଅନ୍ୟ କେହି ପୀଡିତକୁ ଦେଖିବାକୁ ଯାଇ ନ ଥିବାର ଅଭିଯୋଗ । ସୁରକ୍ଷା ଅବହେଳରୁ ଏଭଳି ଅଘଟଣ ହୋଇଥିବା ଅଭିଯୋଗ ହେଉଛି । ପୁଅର ଆଶୁ ଚିକିତ୍ସାର ବ୍ୟବସ୍ଥା ପାଇଁ ପିତା ଅସ୍ତ ମୁଦୁଲି ଦାବି କରିଛନ୍ତି ।
