ପୁରୀ,୨୮/୦୬: ଗୁରୁବାର ତିନି ରଥରେ ପାରାଭାଡି ଉଠାଇ ଖପୁରୀ ସ୍ଥାପନ କରିଛନ୍ତି ନିର୍ମାଣକାରୀ । ୧୩ ପରସ୍ତ ପୋଟଳ ମଧ୍ୟରୁ ଶେଷ ପରସ୍ତ ହେଉଛି ଖପୁରୀ । ସେଥିରେ ପୋତା ହୋଇଛି କଳସ ଡ଼ାଙ୍ଗିଆ । ଏଥିରେ ଲାଗିବ କଳସ । ଖପୁରୀ ଉଠାଇବା ପରେ ଭୋଇ ସେବକମାନେ ଷଷ୍ଠ ଥର ପାଇଁ ରଥ ଉପରୁ ହରିବୋଲ ଡାକ ଦେଇଥିଲେ । ଏପଟେ ରଥଖଳାରେ ଦୁଆର ଘଡ଼ା କାମ ଜାରି ରହିଛି । ରଥରେ ଚାରପରିଛା ଲାଗିଛି । ରଥରେ ଘୋଡ଼ା ଲାଗିବାରେ ସାହାଯ୍ୟ କରେ ଚାରପରିଛା ।
ଗୁରୁବାର ତିନି ରଥରେ ପାରାଭାଡି ଉଠାଗଲା । ବଡ଼ ପୋଟଳ ଉପରେ ଦ୍ୱିତୀୟ, ତୃତୀୟ, ଚତୁର୍ଥ ଓ ପଞ୍ଚମ ପରସ୍ତ ପୋଟଳ ରଖାଗଲା । ଏହା ଉପରେ ପାରାଭାଡି ଉଠିଲା । ୬ଷ୍ଠ ଓ ସପ୍ତମ ପରସ୍ତ ପୋଟଳକୁ ଯୋଡାଯାଇ ପାରାଭାଡ଼ି ହୋଇଥିଲା । ମଝିରେ ପଟା ଦିଆଯାଇ ସଂଯୁକ୍ତ କରିବା ପରେ ଚତୁଃପାଶ୍ୱର୍ରେ ଚିତ୍ରକରମାନେ ପାରା ପଲ ଚିତ୍ର କରିଥିଲେ । ପରେ ଚାରି ଖଣ୍ଡ କରି ଏହାକୁ ରଥ ଉପରକୁ ଟେକା ଯାଇ ଯୋଡାଗଲା । ଭୋଇ ସେବକମାନେ ଏହାକୁ ନେଇ ରଥ ଉପରେ ସ୍ଥାପନ କରିଥିଲେ । ପରେ ଆଉ ୫ପରସ୍ତ ପୋଟଳ ଉଠାଇ ଶେଷରେ ଖପୁରୀ ସ୍ଥାପନ ହୋଇଥିଲା ।
ତାଗ କାମ ପରେ ରଥରେ ପଟା ବାଡ଼ିଆ ଚାଲିଛି । ବିଶ୍ୱକର୍ମାମାନେ ଦୁଆର ଘଡ଼ା କାମରେ ଲାଗିଛନ୍ତି । କାମ ସରିଲେ ଚିତ୍ରକରମାନେ ସେଥିରେ ରଙ୍ଗ ଦେବେ । ଆଗକୁ ତିନି ରଥରେ ୧୨ଟି ଦୁଆର ଘଡ଼ା ଉଠିବ । ମହାପ୍ରଭୁଙ୍କ ସିଂହାସନ କାମ ଚାଲିଛି । ରଥରେ ରଙ୍ଗ କାର୍ଯ୍ୟ ଚାଲିଛି । ଚକ, ଦଣ୍ଡା ଓ ଯୋକା ଆଦିରେ ରଙ୍ଗ ଦିଆଯାଉଛି । ରୂପକାରମାନେ ରଥରେ ମୂର୍ତ୍ତି ଖୋଦେଇରେ ଲିପ୍ତ । ଦର୍ଜୀ ସେବକମାନେ ଶ୍ରୀମନ୍ଦିର କାର୍ଯ୍ୟାଳୟ ଉପର ମହଲାରେ କନାମଣ୍ଡଣି କାମ ଜାରି ରଖିଛନ୍ତି । ଓଝା ସେବକମାନେ ଅସ୍ଥାୟୀ ଶାଳରେ କଣ୍ଟା ପ୍ରସ୍ତୁତ କରୁଛନ୍ତି। ତାଳଧ୍ୱଜର ମୁଖ୍ୟ ବିଶ୍ୱକର୍ମା ନରସିଂହ ମହାପାତ୍ର, ନନ୍ଦିଘୋଷର ମୁଖ୍ୟ ବିଶ୍ୱକର୍ମା ବିଜୟ କୁମାର ମହାପାତ୍ର ଓ ଦେବଦଳନର ମୁଖ୍ୟ ବିଶ୍ୱକର୍ମା କୃଷ୍ଣଚନ୍ଦ୍ର ମହାରଣାଙ୍କ ନିର୍ଦ୍ଦେଶରେ ରଥ କାମ ଆଗେଇ ଚାଲିଛି । ଭୋଇ ସର୍ଦ୍ଦାର ରବି ଭୋଇଙ୍କ ତତ୍ୱାବଧାନରେ ଭୋଇ ସେବକମାନେ ରଥ କାର୍ଯ୍ୟରେ ନିୟୋଜିତ ଅଛନ୍ତି ।