ନୂଆଦିଲ୍ଲୀ: ପାକିସ୍ତାନକୁ ସାମରିକ ଉପକରଣ ଏବଂ ପ୍ରଯୁକ୍ତିବିଦ୍ୟା ନ ଦେବାକୁ ନେଦରଲ୍ୟାଣ୍ଡକୁ ଅନୁରୋଧ କରିଛନ୍ତି ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହ । କାରଣ ଏହା ଆଞ୍ଚଳିକ ସୁରକ୍ଷା ପାଇଁ ବିପଦ। ରାଜନାଥ ସିଂହ ନେଦରଲ୍ୟାଣ୍ଡର ପ୍ରତିରକ୍ଷା ମନ୍ତ୍ରୀଙ୍କ ସହ କଥାବାର୍ତ୍ତା ସମୟରେ ପାକିସ୍ତାନକୁ ଆତଙ୍କବାଦର ପ୍ରାୟୋଜକ ବୋଲି କହିଛନ୍ତି। ନେଦରଲ୍ୟାଣ୍ଡ ପ୍ରତିରକ୍ଷା ମନ୍ତ୍ରୀ ରୁବେନ ବର୍କେଲମାନ୍ସ ଏବେ ଭାରତ ଗସ୍ତରେ ଅଛନ୍ତି ଏବଂ ପ୍ରତିରକ୍ଷା ମନ୍ତ୍ରୀ ରାଜନାଥ ସିଂହଙ୍କୁ ଭେଟିଛନ୍ତି।
ସୂତ୍ର ଅନୁସାରେ, ରାଜନାଥ ସିଂହ କହିଛନ୍ତି ଯେ, ପାକିସ୍ତାନ ନିରନ୍ତର ଆତଙ୍କବାଦକୁ ସମର୍ଥନ କରୁଛି ଏବଂ ଆତଙ୍କବାଦର ପ୍ରାୟୋଜକ। ତେଣୁ, ଆମେ ଆମର ସମସ୍ତ ବନ୍ଧୁ ଦେଶ ପାକିସ୍ତାନକୁ ସାମରିକ ଉପକରଣ ଯୋଗାଇବେ ନାହିଁ ବୋଲି ଆଶା କରୁଛୁ। ସେ କହିଛନ୍ତି ଯେ ପାକିସ୍ତାନକୁ ଅସ୍ତ୍ରଶସ୍ତ୍ର ଦେବା ଦ୍ୱାରା ଏହି ଅଞ୍ଚଳରେ ଅସ୍ଥିରତା ବୃଦ୍ଧି ପାଏ।
ରାଜନାଥ ସିଂହ ନେଦରଲ୍ୟାଣ୍ଡ ପ୍ରତିରକ୍ଷା ମନ୍ତ୍ରୀଙ୍କୁ କହିଛନ୍ତି ଯେ, ନିକଟ ଅତୀତରେ ଏପରି କିଛି ମାମଲା ଆମ ନଜରକୁ ଆସିଛି। ରାଜନାଥ ସିଂହ ତାଙ୍କୁ କିଛି ମାମଲାର ବିବରଣୀ ମଧ୍ୟ ଦେଇଛନ୍ତି। ରାଜନାଥ ସିଂହ ଏହା ମଧ୍ୟ ଉଲ୍ଲେଖ କରିଛନ୍ତି ଯେ, ଭାରତ ଦଶନ୍ଧି ଧରି ପାକିସ୍ତାନ ପ୍ରାୟୋଜିତ ଆତଙ୍କବାଦର ଶିକାର ହୋଇଆସିଛି। ଆମେ ଆଶା କରୁଛୁ ଯେ ଆମର ବନ୍ଧୁ ଦେଶ ମାନେ ଏହି ଅଞ୍ଚଳର ସୁରକ୍ଷାକୁ ଧ୍ୟାନରେ ରଖି ପାକିସ୍ତାନକୁ ବୈଷୟିକ ସହାୟତା ପ୍ରଦାନ କରିବାରୁ ନିବୃତ୍ତ ରହିବେ।
