ଜୟପୁର,୧୪/୨: ରାଜସ୍ଥାନରେ ପ୍ରଥମ ଥର ପାଇଁ ଦେଶୀ ଉପାୟରେ କ୍ୟାନ୍ସର ଟିକା ପ୍ରସ୍ତୁତ କରାଯାଉଛି । ଦୀର୍ଘ ୨୭ ବର୍ଷର ଗବେଷଣା ପରେ ଏହା ସଫଳ ହେବାକୁ ଯାଉଛି । ଯଦି ଟିକା ପ୍ରସ୍ତୁତି ସମ୍ପୂର୍ଣ୍ଣ ସଫଳ ହୁଏ, ତେବେ ଏହାର ମୂଲ୍ୟ ୧୦ ହଜାର ଟଙ୍କା ରହିବ ।
ଜୟପୁରସ୍ଥିତ ମହାତ୍ମା ଗାନ୍ଧୀ ମେଡିକାଲ କଲେଜକୁ ‘ଡେଣ୍ଡ୍ରିଟିକ୍ ସେଲ୍’ ଟିକା ପ୍ରସ୍ତୁତି ପାଇଁ ଡିସିଜିଆଇର ଅନୁମତି ମିଳିଛି । ଏହି ଟିକା ଦ୍ୱାରା ୫ ପ୍ରକାର କ୍ୟାନ୍ସରର ଚିକିତ୍ସା ସମ୍ଭବ ହେବ । ଏହା ଦେଶର ପ୍ରଥମ ସ୍ୱଦେଶୀ କ୍ୟାନ୍ସର ଟିକା ବୋଲି ଦାବି କରାଯାଉଛି । ବଡ଼ କଥା ହେଉଛି ଆମେରିକାରେ କ୍ୟାନ୍ସର ଟିକାର ଦାମ ୨୫ରୁ ୫୦ ଲକ୍ଷ ଟଙ୍କା ରହିଥିବା ବେଳେ ଭାରତରେ କ୍ୟାନ୍ସରର ପ୍ରକାର ଆଧାରରେ ୧୦ ହଜାରରୁ ୫୦ ହଜାର ଟଙ୍କା ଖର୍ଚ୍ଚରେ ଟିକା ପ୍ରସ୍ତୁତ ହେବ ।
ଏହି ଟିକା ଉପରେ ଗବେଷଣା କରୁଥିବା ମହାତ୍ମା ଗାନ୍ଧୀ ୟୁନିଭର୍ସିଟି ଅଫ୍ ମେଡିକାଲ ସାଇନ୍ସେସ ଆଣ୍ଡ ଟେକ୍ନୋଲୋଜିର ସେଣ୍ଟର ଫର୍ କ୍ୟାନ୍ସର ଇମ୍ୟୁନୋଥେରାପି ନିର୍ଦ୍ଦେଶକ ଡା. ଅନିଲ ସୁରୀ କହିଛନ୍ତି, ଏହି ‘ଡେଣ୍ଡ୍ରିଟିକ ସେଲ୍ ଭାକ୍ସିନ୍’ ଏକ ଇମ୍ୟୁନୋଥେରାପି ଆଧାରିତ ଟିକା । ଏହା ଶରୀରର ରୋଗ ପ୍ରତିରୋଧକ କ୍ଷମତାକୁ କ୍ୟାନ୍ସର କୋଷିକାକୁ ଚିହ୍ନିବା ଏବଂ ନଷ୍ଟ କରିବା ଲାଗି ପ୍ରଭାବୀ କରିଥାଏ ।
ଏହି ଭଳିର ଟିକା ଦ୍ୱାରା ପିତ୍ତ କୋଷ, ମୁଣ୍ଡ ଓ ଗଳା ଏବଂ ଗର୍ଭାଶୟ କ୍ୟାନ୍ସରର ଚିକିତ୍ସା କରାଯାଇ ପାରିବ । ଏଥିରେ ପ୍ରଭାବୀ ଫଳ ମିଳିବା ଆଶା କରାଯାଉଛି । ମହାତ୍ମା ଗାନ୍ଧୀ ୟୁନିଭର୍ସିଟି ଅଫ୍ ମେଡିକାଲ ସାଇନ୍ସେସରେ ଫେବ୍ରୁଆରୀ ୧୦ରୁ ଆରମ୍ଭ ହୋଇଥିବା ‘ଡବ୍ଲ୍ୟୁସିଟିସିଆର୍ଆଇ-୨୦୨୫’ ସମ୍ମିଳନୀରେ ଏହି ଟିକା ବାବଦରେ ସୂଚନା ଦିଆଯାଇଛି । ସମ୍ମିଳନୀରେ ଦେଶବିଦେଶର କ୍ୟାନ୍ସର ସ୍ପେସାଲିଷ୍ଟ ଯୋଗଦେଇଛନ୍ତି ।
ଟିକା କିଭଳି କାମ କରେ, ସେ ବାବଦରେ ଡା. ଅନିଲ ସୁରୀ କହିଛନ୍ତି, ଏଥିରେ ରୋଗୀର ଶରୀରରୁ ଡେଣ୍ଡ୍ରିଟିକ କୋଷିକାକୁ ବାହାର କରାଯାଏ । ଡେଣ୍ଡ୍ରିଟିକ ସେଲ୍ ହେଉଛି ପ୍ରତିରୋଧକ ବ୍ୟବସ୍ଥାରେ ଥିବା ଶ୍ୱେତ ରକ୍ତ କଣିକା (ହ୍ୱାଇଟ ବ୍ଲଡ୍ ସେଲ୍)ର ଏକ ପ୍ରକାର । ଏହା ରୋଗ ପ୍ରତିରୋଧକ ବ୍ୟବସ୍ଥାକୁ ସକ୍ରିୟ କରିବାରେ ସହାୟକ ହୋଇଥାଏ ।
ଟିକା ବନାଇବା ଲାଗି ରୋଗୀର ରକ୍ତରୁ ଡେଣ୍ଡ୍ରିଟିକ ସେଲ୍ ବାହାର କରାଯାଏ । ପ୍ରଥମ ପର୍ଯ୍ୟାୟରେ ଏହି କୋଷିକାଗୁଡ଼ିକୁ ଲ୍ୟାବରେ କ୍ୟାନ୍ସର କୋଷିକା ସହ ସମ୍ପର୍କ କରାଯାଇ ତାହାକୁ କ୍ୟାନ୍ସର ଚିହ୍ନିବା ଲାଗି ଶିଖାଯାଏ । ଏଗୁଡ଼ିକୁ ଟ୍ୟୁମର ଆଣ୍ଟିଜେନ ସହ ତାଲିମ ପ୍ରଦାନ କରାଯାଏ, ଯଦ୍ଦ୍ୱାରା ଏହା ଶରୀର ମଧ୍ୟକୁ ଯାଇ କ୍ୟାନ୍ସର କୋଷିକାକୁ ଚିହ୍ନଟ କରିବାକୁ ସମର୍ଥ ହୁଏ । ଏହାପରେ ତାଲିମ ଦିଆଯାଇଥିବା ଡେଣ୍ଡ୍ରିଟିକ ସେଲ୍କୁ ଶରୀରରେ ପୁନଃ ନିଃକ୍ଷେପ କରାଯାଏ । ଏହା ଟି-ସେଲ୍ (ରୋଗ ପ୍ରତିରୋଧକ କୋଷ)କୁ ସକ୍ରିୟ କରିଦେଇଥାଏ, ଯାହା ସିଧାସଳଖ ଭାବେ କ୍ୟାନ୍ସର କୋଷିକାଗୁଡ଼ିକ ଉପରେ ଆକ୍ରମଣ କରି ସେଗୁଡ଼ିକୁ ନଷ୍ଟ କରିଦିଏ ।
ଡା. ସୁରୀ କହିଛନ୍ତି, ୧୯୯୮ରେ ଏହି କ୍ୟାନ୍ସର ଟିକାର ସନ୍ଧାନ ହୋଇଥିଲା ଏବଂ ବିଗତ ୨୭ ବର୍ଷ ହେଲା ଏହା ଉପରେ ଅଧିକ ଗବେଷଣା ଚାଲିଛି । ସମସ୍ତ ଗବେଷଣା ପ୍ୟାଟେଣ୍ଟ ଆମ ପାଖରେ ରହିଛି । ୨୦୨୭ ସୁଦ୍ଧା ଏହି ଟିକା ବଜାରକୁ ଆସିବା ସମ୍ଭାବନା ରହିଛି । ବର୍ତ୍ତମାନ ଏହା ଦ୍ୱିତୀୟ ପର୍ଯ୍ୟାୟରେ ଅଛି । ପ୍ରଥମ ପର୍ଯ୍ୟାୟରେ ସୁରକ୍ଷା ମାନକ ଯାଞ୍ଚ ହୋଇଥିଲା । ଏହାର ପ୍ରଭାବ କିଭଳି ତାହା ଉପରେ ଗବେଷଣା ଚାଲିଛି । ଯେଉଁମାନଙ୍କର କେମୋଥେରାପି, ରେଡିଓଗ୍ରାଫି, ଟୁ-ଲାଇନ ଅଫ୍ ଟ୍ରିଟମେଣ୍ଟ କୋର୍ସ ପୂରା ହୋଇସାରିଛି ଏବଂ କୌଣସି ଆଶା ନାହିଁ, ସେମାନଙ୍କ କ୍ଷେତ୍ରରେ ଏହି ଟିକା ପ୍ରଭାବୀ ହେବ । ଅର୍ଥାତ ଯେଉଁମାନଙ୍କ କ୍ୟାନ୍ସରର ପାରମ୍ପରିକ ଚିକିତ୍ସା ଶେଷ ହୋଇଛି, ସେମାନଙ୍କ ପାଇଁ ଏହି ଟିକା ପ୍ରସ୍ତୁତ ହେଉଛି
