ପୁରୀ, ୦୩/୦୭ : ୧୧ ଦିନର ନିରବିଛିନ୍ନ ତଥା ନିଷ୍ଠାପର ସେବା ପରେ ସୁସ୍ଥ ହୋଇଛନ୍ତି ଶ୍ରୀଜିଉ। ଫୁଲରି ତେଲ ଏବଂ ଓଷୁଅ ଲାଗି ପରେ ମଙ୍ଗଳବାର ଖଳି ଲାଗି ଏକାଦଶୀ ଅବସରରେ ଠାକୁରେ ପୂର୍ବାବସ୍ଥାକୁ ଫେରିଛନ୍ତି । ଦଶମୂଳ ମହୌଷଧି ଅର୍ପଣ ପରେ ଶ୍ରୀବିଗ୍ରହ ପୂରା ସୁସ୍ଥ ହୋଇଛନ୍ତି । ମହାପ୍ରଭୁ ସୁସ୍ଥ ହୋଇଥିବା ଖବର ବୁଧବାର ଦ୍ୱାଦଶୀ ତିଥିରେ ଶ୍ରୀନହରରେ ପହଞ୍ଚିବ । ଶ୍ରୀମନ୍ଦିରରେ ଏହା ହେଉଛି ରାଜପ୍ରସାଦ ବିଜେ ବିଧି ନୀତି ।
ରୂପା ଥାଳିରେ ଶ୍ରୀଅଙ୍ଗ ଚନ୍ଦନ, କରାଳ ଓ ପାଟଡ଼ୋର ନେଇ ଦଇତାପତିମାନେ ଶ୍ରୀନହରକୁ ଯାତ୍ରା କରିବେ । ଘଣ୍ଟ, ଛତା ଓ କାହାଳିର ପଟୁଆରରେ ଶ୍ରୀମନ୍ଦିରରୁ ସେବକମାନେ ଯାଇ ଶ୍ରୀନହରରେ ପହଞ୍ଚିବେ । ଗଜପତି ମହାରାଜ ମହାପ୍ରଭୁଙ୍କର ସୁସ୍ଥତାର ବାର୍ତ୍ତା ପାଇ ଆଶ୍ୱସ୍ତ ହେବେ।
