ଭୁବନେଶ୍ୱର,୦୫/୦୬: ଭୁବନେଶ୍ୱର ବିଜେଡିରେ ଦେଖା ଦେଇଥିବା କନ୍ଦଳ ଖବର ହାଇକମାଣ୍ଡଙ୍କ ପାଖରେ ପହଞ୍ଚିଛି । ଦଳର ଶୀର୍ଷ ନେତୃତ୍ୱ ଏହାକୁ ଅତି ଗୁରୁତର ସହ ନେଇଛନ୍ତି । ବିବାଦ ଓ ଗୋଷ୍ଠୀ କନ୍ଦଳ ଯେମିତି ନ ତେଜିବ, ସେଥିପାଇଁ ଖୁବଶୀଘ୍ର ଦଳର ଶୀର୍ଷ ନେତୃତ୍ୱ ଏକ ବୈଠକ ଡାକିବେ ବୋଲି ଜଣାପଡ଼ିଛି । ଏହି ବୈଠକରେ ଭୁବନେଶ୍ୱର ଜିଲ୍ଲା ସଭାପତି ତଥା ଉତ୍ତର ଭୁବନେଶ୍ୱର ବିଧାୟକ ସୁଶାନ୍ତ ରାଉତ, ମଧ୍ୟ ଭୁବନେଶ୍ୱର ବିଧାୟକ ଅନନ୍ତ ନାରାୟଣ ଜେନା, ଏକାମ୍ରର ପୂର୍ବତନ ବିଧାୟକ ଅଶୋକ ଚନ୍ଦ୍ର ପଣ୍ଡା, ମେୟର ସୁଲୋଚନା ଦାସ, କର୍ପୋରେଟର ଅମରେଶ ଜେନା ଓ ବିରଞ୍ଚି ମହାସୁପକାର ପ୍ରମୁଖ ଯୋଗ ଦେବା ସମ୍ଭାବନା ରହିଛି । ଉଭୟ ପକ୍ଷଙ୍କ ଭିତରେ ଆପୋଷ ସମାଧାନ ପାଇଁ ଦଳ ପକ୍ଷରୁ ବଡ଼ ନେତାଙ୍କୁ ଦାୟିତ୍ୱ ଦିଆଯାଇଛି ।
ଗତ ବିଧାନସଭା ନିର୍ବାଚନରେ ବିଜେଡି ଟିକଟକୁ ନେଇ ମଧ୍ୟ ଭୁବନେଶ୍ୱରରେ ଅନନ୍ତ ଓ ଅମରେଶଙ୍କ ଭିତରେ ଆରମ୍ଭ ହୋଇଥିବା ବିବାଦ ଏଯାଏଁ ଥମୁନି । ସେହିପରି ଏକାମ୍ରରେ ବିଜେଡି ଟିକଟକୁ ନେଇ ଅଶୋକ ଓ ବିରଞ୍ଚିଙ୍କ ଭିତରେ ବିବାଦ ବଢ଼ିଥିଲା, ଯାହା ତେଜିବାରେ ଲାଗିଛି । ଏ ବିବାଦକୁ ନେଇ ଭୁବନେଶ୍ୱର ବିଜେଡି ଫାଳ ଫାଳ ସ୍ଥିତିକୁ ଆସିଲାଣି । ଅନନ୍ତ ଓ ଅଶୋକଙ୍କ ଶିବିର ଏକାଠି ହୋଇଥିବା ବେଳେ ଅମରେଶ ଓ ବିରଞ୍ଚି ବି ଏକାଠି ଅଛନ୍ତି । ଉଭୟ ଗୋଷ୍ଠୀ ଭିତରେ ଛକାପଞ୍ଝା ଓ ବୟାନବାଜି ଯୋଗୁ ଭୁବନେଶ୍ୱରରେ ବିଜେଡିର ଚିନ୍ତା ବଢ଼ିଛି।