ଭୁବନେଶ୍ୱର, ୧୧/୪ : ରେଳ, ସୂଚନା ଓ ପ୍ରସାରଣ ଏବଂ ଇଲେକ୍ଟ୍ରୋନିକ୍ସ ଓ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରୀ ଅଶ୍ୱିନୀ ବୈଷ୍ଣବ ଶୁକ୍ରବାର ସନ୍ଧ୍ୟାରେ ପୁରୀ ରେଳ ଷ୍ଟେସନରେ ଚାଲୁ ରହିଥିବା ପୁନ ର୍ବିକାଶ କାର୍ଯ୍ୟର ନିରୀକ୍ଷଣ ଓ ସମୀକ୍ଷା କରିଛନ୍ତି । ଅମୃତ ଷ୍ଟେସନ ଯୋଜନା ଅଧୀନରେ ସମଗ୍ର ଓଡ଼ିଶାରେ ପ୍ରମୁଖ ରେଳ ଭିତ୍ତିଭୂମିକୁ ଆଧୁନିକୀକରଣ କରିବା ପାଇଁ ଭାରତୀୟ ରେଲଓ୍ବେର ପ୍ରତିବଦ୍ଧତାର ଏକ ଅଂଶ ଭାବେ ପୁରୀ ରେଳ ଷ୍ଟେସନର ପୁନର୍ବିକାଶର କାର୍ଯ୍ୟ ଅନ୍ତର୍ଭୁକ୍ତ ।
ନିରୀକ୍ଷଣ ସମୟରେ, ଶ୍ରୀ ବୈଷ୍ଣବ ନିର୍ମାଣ କାର୍ଯ୍ୟର ଅଗ୍ରଗତି ବିଷୟରେ ବିସ୍ତୃତ ସମୀକ୍ଷା କରିଥିଲେ ଏବଂ ସମୟସୀମା ମଧ୍ୟରେ ସମ୍ପୂର୍ଣ୍ଣ କରିବା ପାଇଁ ଓ ବାକି କାର୍ଯ୍ୟକୁ ତ୍ୱରାନ୍ୱିତ କରିବାକୁ ଅଧିକାରୀମାନଙ୍କୁ ନିର୍ଦେଶ ଦେଇଛନ୍ତି । ଅମୃତ ଷ୍ଟେସନ ପ୍ରକଳ୍ପ ଗୁଡିକର କାର୍ଯ୍ୟ ଗୁଡିକ ଅଗ୍ରଗତି କରୁଛି ବୋଲି ରେଳମନ୍ତ୍ରୀ କହିଛନ୍ତି । ପୁରୀ କୋଣାର୍କ ରେଳମାର୍ଗ ପାଇଁ ଜମି ଅଧିଗ୍ରହଣ କାର୍ଯ୍ୟ ଅଗ୍ରଗତିରେ ଚାଲୁ ରହିଛି ବୋଲି ଶ୍ରୀ ବୈଷ୍ଣବ କହିଛନ୍ତି । ରେଳମନ୍ତ୍ରୀ ଗୁରୁତ୍ୱାରୋପ କରିଛନ୍ତି ଯେ, ପୁନର୍ବିକାଶ ହେବା ପରେ ପୁରୀ ରେଳ ଷ୍ଟେସନ ଐତିହ୍ୟ ସୌନ୍ଦର୍ଯ୍ୟ ଏବଂ ଆଧୁନିକ ଯାତ୍ରୀ ସୁବିଧାର ମିଶ୍ରଣ ସହ ଏକ ବିଶ୍ୱସ୍ତରୀୟ ସୁବିଧା ଭାବେ ଦଣ୍ଡାୟମାନ ହେବ । ଷ୍ଟେସନର ପୁନର୍ବିକାଶ ୨୦୨୧-୨୨ ଆର୍ଥିକ ବର୍ଷରେ ମଞ୍ଜୁର ହୋଇଥିବାବେଳେ ସମନ୍ୱିତ ଷ୍ଟେସନ ପୁନଃବିକାଶ ଯୋଜନା ଅଧୀନରେ କାର୍ଯ୍ୟ କରାଯାଉଛି ଯାହାର ପ୍ରକଳ୍ପ ମୂଲ୍ୟ ୧୭୭.୪୧ କୋଟି।
ଅମୃତ ଷ୍ଟେସନ ଯୋଜନା ମାନନୀୟ ପ୍ରଧାନମନ୍ତ୍ରୀଙ୍କ ଏକ ପରିକଳ୍ପନା ଯେଉଁଥିରେ ଐତିହ୍ୟ, ସଂସ୍କୃତି ଓ ବିକାଶ ସ୍ଥାନ ପାଇଛି । ପୁରୀ ଷ୍ଟେସନ ବିକାଶ କ୍ଷେତ୍ରରେ ମଧ୍ୟ ଏଠିକାର ଐତିହ୍ୟ, ସଂସ୍କୃତି ସ୍ଥାନ ପାଇବ "ବିରାସତ ଭି ବିକାଶ ଭି" । ପୂର୍ବତଟ ରେଳପଥର ମହାପ୍ରବନ୍ଧକ ପରମେଶ୍ୱର ଫୁଙ୍କୱାଲ ଏବଂ ଖୋର୍ଦ୍ଧା ରୋଡ଼ର ମଣ୍ଡଳ ରେଳବାଇ ପ୍ରବନ୍ଧକ ଏଚ୍.ଏସ୍. ବାଜୱାଙ୍କ ସମେତ ବରିଷ୍ଠ ରେଳ ଅଧିକାରୀମାନେ ଏହି ନିରୀକ୍ଷଣରେ ଯୋଗ ଦେଇଥିଲେ ।
ପୁନଃ ବିକଶିତ ପୁରୀ ଷ୍ଟେସନର ପ୍ରମୁଖ ଆକର୍ଷଣ :
* ସବୁଜ କୋଠା ଡିଜାଇନ୍ (ସ୍ୱର୍ଣ୍ଣ ମାନକ) ଯାହା ପ୍ରତି ଘଣ୍ଟା ୨୫୦କିଲୋମିଟର ବେଗ ପର୍ଯ୍ୟନ୍ତ ପବନ ବେଗ ସହ୍ୟ କରିପାରିବ ।
* ଷ୍ଟେସନ ଭବନ ଏବଂ କନକୋର୍ସ କ୍ଷେତ୍ର: ୨୪,୧୮୫ବର୍ଗ ମିଟର ।
* ସର୍କୁଲେଟିଂ କ୍ଷେତ୍ର: ୨୬,୧୦୦ବର୍ଗ ମିଟର ।
* ପ୍ଲାଟଫର୍ମ କ୍ଷେତ୍ର (୮ ପ୍ଲାଟଫର୍ମ): ୨୧,୬୦୦ ବର୍ଗ ମିଟର ।
* ଗଠନ: ଭୂମି + ୩ ମହଲା ।
ଯାତ୍ରୀ ସୁବିଧାଗୁଡ଼ିକ ମଧ୍ୟରେ ଅନ୍ତର୍ଭୁକ୍ତ :
o ସ୍ୱୟଂଚାଳିତ ଟିକେଟ୍ ଭେଣ୍ଡିଂ ମେସିନ୍
o ବ୍ୟାଗେଜ୍ ସ୍କାନର
o ପର୍ଯ୍ୟଟକ ସୂଚନା ଏବଂ ବୁକିଂ କେନ୍ଦ୍ର
o ଖାଦ୍ୟ କୋର୍ଟ, ଜନ ଆହାର ଏବଂ ଦୋକାନ
o କେନ୍ଦ୍ରୀୟ ସିସିଟିଭି ମନିଟରିଂ
o ୪ ଏସ୍କାଲେଟର, ୪ ଯାତ୍ରୀ ଲିଫ୍ଟ, ଏବଂ ୧ ଷ୍ଟାଫ୍ ଲିଫ୍ଟ
o ୨୩ ଅବସର କୋଠରୀ ଏବଂ ୧୫୦ ଶଯ୍ୟା ବିଶିଷ୍ଟ ଛାତ୍ରାବାସ
o ୬୦ ଶଯ୍ୟା ବିଶିଷ୍ଟ TTE ବିଶ୍ରାମ କୋଠରୀ
o ଦେୟଯୁକ୍ତ ଲାଉଞ୍ଜ, ମାଗଣା ଅପେକ୍ଷା ଲାଉଞ୍ଜ, ଶିଶୁ ଖାଦ୍ୟ ଖାଇବା କୋଠରୀ
o ଶିଶୁ ସହାୟତା ଡେସ୍କ ଏବଂ "ମେ ଆଇ ହେଲ୍ପ ୟୁ" ବୁଥ୍
ଦିବ୍ୟାଙ୍ଗଜନ-ଅନୁକୂଳ ବୈଶିଷ୍ଟ୍ୟଗୁଡ଼ିକ :
o ପ୍ରତିବନ୍ଧକ-ମୁକ୍ତ ପ୍ରବେଶ/ପ୍ରସ୍ଥାନ ରାମ୍ପ
o ନିର୍ଦ୍ଦିଷ୍ଟ ପାର୍କିଂ
o ନ ଖସିବା ପଦପଥ
o ପ୍ରତ୍ୟେକ ପ୍ଲାଟଫର୍ମରେ ସ୍ୱତନ୍ତ୍ର ଭାବରେ ଡିଜାଇନ୍ କରାଯାଇଥିବା ଶୌଚାଳୟ ଏବଂ ପାନୀୟ ଜଳ ଟ୍ୟାପ୍
o ନାଭିଗେସନ୍ ପାଇଁ ଉଚ୍ଚ-ଦୃଶ୍ୟତା ସାଇନେଜ୍
ବର୍ତ୍ତମାନ ପର୍ଯ୍ୟନ୍ତ ନିର୍ମାଣ କାର୍ଯ୍ୟର ୬୦% ସମାପ୍ତ ହୋଇଛି, ଯାହା ଏକ ଆଧୁନିକ, ସୁଗମ ଏବଂ ଯାତ୍ରୀ-ଅନୁକୂଳ ପୁରୀ ରେଳ ଷ୍ଟେସନର ଦୃଷ୍ଟିକୋଣକୁ ବାସ୍ତବତାର ନିକଟତର କରୁଛି ।
