ବାଙ୍ଗିରିପୋଷି, ୧୪/୩ : ମୟୂରଭଞ୍ଜ ଜିଲ୍ଲା ବାଙ୍ଗିରିପୋଷି ବ୍ଲକ ଅନ୍ତର୍ଗତ ଶିମିଳିପାଳ ପାଦ ଦେଶରେ ଥିବା ବିଭିନ୍ନ ଗ୍ରାମାଞ୍ଚଳରେ ଦୁଇ ମାସରୁ ଉର୍ଦ୍ଧ୍ବ ଦିନ ହେବ ଏକ କଳାବାଘ ଆତଙ୍କ ସୃଷ୍ଟି କରୁଛି। ବଡ଼ଗାଁ ଓ ତାଳ ବନ୍ଧ ରେଞ୍ଜ ଅଞ୍ଚଳର ବିଭିନ୍ନ ଜନବସତିକୁ ପଶିଯାଇ ଗୃହପାଳିତ ପଶୁମାନଙ୍କୁ ଶିକାର କରୁଛି। ଖାସ କରି ଚାକିଡି ଓ ସୋରିଷପାଳ ଗ୍ରାମ ପଞ୍ଚାୟତ ଅନ୍ତର୍ଗତ ଗ୍ରାମ ଗୁଡିକରେ ଏହି କଳାବାଘଟି ୨୫ ରୁ ଉର୍ଦ୍ଧ୍ବ ଗୃହପାଳିତ ପଶୁକୁ ଶିକାର ମଧ୍ୟ କରିସାରିଛି। ତେବେ କଳାବାଘର ସ୍ଥିତି ନେଇ ବନ ବିଭାଗ ଅସ୍ବୀକାର କରିଆସୁଥିବା ବେଳେ କିଛି ଗ୍ରାମବାସୀଙ୍କ ଦ୍ଵାରା ଏକ ଭିଡିଓ ଭାଇରାଲ ହେବା ପରେ କଳାବାଘ ଗ୍ରାମାଭିମୁଖି ହେବା ଏକ ପ୍ରକାର ସୁନିଶ୍ଚିତ ହୋଇଯାଇଅଛି।
ଚାକିଡି ଗ୍ରାମପଞ୍ଚାୟତ ଅନ୍ତର୍ଗତ ବାସିଲକଚା ଗ୍ରାମ ନିକଟରେ କିଛି ଗ୍ରାମବାସୀ ଗୋରୁ ଛେଳି ଚରାଇବାକୁ ଯାଇଥିବା ବେଳେ ସ୍ପଷ୍ଟ ଦିବାଲୋକରେ ସେମାନଙ୍କ ଅନତିଦୂରରେ ରାସ୍ତା କୋଡରେ ବାଘଟି ଶିକାର ଉଦ୍ଦେଶ୍ୟରେ ଲୁଚି ରହିଥିଲା। ଗ୍ରାମବାସୀମାନେ ପାଟି କରି ଘୋଉଡାଇବା ସହ କୁକୁରମାନେ ଭୁକିବାରୁ ବାଘଟି ସେଠାରୁ ଦୌଡି ପଳାଇଥିଲା। ଏହି ସମୟରେ କିଛି ଯୁବକ ବାଘଟିର ଭିଡିଓ କରିଥିଲେ। ଏହାପରେ ଭିଡିଓଟି ଭାଇରାଲ୍ ହୋଇଥିଲା। ଏହି ଘଟଣା ପ୍ରଥମେ ପ୍ରମେୟ ମଧ୍ୟମରେ ଲୋକଲୋଚନକୁ ଆସିଥିଲା।
ବନ ବିଭାଗ ଭିଡିଓର ସତ୍ୟତା ଯାଞ୍ଚ କଲାପରେ କଳାବାଘର ଉପସ୍ଥିତି ନେଇ ବଡ଼ଗାଁ ରେଞ୍ଜର ମନୋଜ ନାଏକ ସ୍ପଷ୍ଟ କରିଛନ୍ତି। ବାଘଟି ଖାଦ୍ୟ ଅନ୍ୱେଷଣରେ ଆସିଥିବା ବେଳେ ଏହାର ଗତିବିଧି ଉପରେ ସତର୍କ ଦୃଷ୍ଟି ରଖାଯାଇଛି ଏବଂ ନିଜର ଗୃହପାଳିତ ପଶୁଙ୍କୁ ହରାଇ କ୍ଷତି ସହିଥିବା ଲୋକଙ୍କୁ କ୍ଷତିପୂରଣ ପ୍ରଦାନ କରାଯିବ ବୋଲି ସେ କହିଛନ୍ତି। ସେହିପରି ସତର୍କ ସୂଚନା ନେଇ ଗ୍ରାମ ଗୁଡିକରେ ବିଭାଗ ତରଫରୁ ବୈଠକ ମଧ୍ୟ କରାଯାଉଥିବା ଜଣାପଡ଼ିଛି।
ଏହି ଖବରଟିକୁ ପଢନ୍ତୁ-ସୋମବାର ଦିନିକିଆ କେନ୍ଦୁଝର ଗସ୍ତରେ ଯିବେ ମୁଖ୍ୟମନ୍ତ୍ରୀ, ଘଟଗାଁ ବାସିନୀ ମା' ତାରିଣୀଙ୍କୁ କରିବେ ଦର୍ଶନ
