ଜୟପୁର,୩୧/୩(ବ୍ୟୁରୋ): ରବି ମଣ୍ଡିରେ ଧାନ ବିକ୍ରି କରିବାକୁ ପଞ୍ଜୀକରଣ ତାରିଖକୁ ଆସନ୍ତା ଏପ୍ରିଲ ୭ ତାରିଖ ପର୍ଯ୍ୟନ୍ତ ଘୁଞ୍ଚାଇ ଦିଆଯାଇଛି। ପୂର୍ବରୁ ଏହା ମାର୍ଚ୍ଚ ୩୧ ପର୍ଯ୍ୟନ୍ତ ରହିଥିଲା। ବିଭିନ୍ନ କାରଣରୁ ବହୁ ଚାଷୀ ପଞ୍ଜୀକରଣ କରିପାରିନଥିବା ଜଣାପଡ଼ିବା ପରେ ଯୋଗାଣ ବିଭାଗ ପକ୍ଷରୁ ଏଭଳି ପଦକ୍ଷେପ ନିଆଯାଇଛି। ଆଜି ସୁଦ୍ଧା ୧୦ ହଜାର ୯୯୨ ଚାଷୀ ପଞ୍ଜୀକରଣ କରିଛନ୍ତି। ଏଥିରେ ନୂଆରେ ୨୨୦୦ ଚାଷୀ ପଞ୍ଜୀକରଣ କରିଥିବା ବେଳେ ନବୀକରଣ କରିଛନ୍ତି ୮ ହଜାର ୭୯୨ ଜଣ।
ତେଲିଙ୍ଗିରି ଜଳସେଚନ ପ୍ରକଳ୍ପରେ ଚଳିତ ରବିରେ କେନାଲରେ ପାଣି ଛଡାଯାଇନି। ବୋରିଗୁମ୍ମା ଅଞ୍ଚଳରେ ଧାନଚାଷ ହୋଇନି। ଏହାର ପ୍ରଭାବରେ ଚଳିତ ରବିମଣ୍ଡିରେ ଚାଷୀ ପଞ୍ଜୀକରଣ ସଂଖ୍ୟା କମିବ। ଯୋଗାଣ ବିଭାଗରୁ ମିଳିଥିବା ତଥ୍ୟ ଅନୁସାରେ ବୈପାରିଗୁଡା ଲ୍ୟାମ୍ପ୍ସରେ ୮୪ ଜଣ ଚାଷୀ ପଞ୍ଜୀକରଣ କରିଛନ୍ତି। ସେହିପରି ବୋରିଗୁମ୍ମାରେ ୫୩୦, ଡୁମୁରିପୁଟରେ ୧୭, କାକିରିଗୁମ୍ମାରେ ୪୧, କାମତାରେ ୧୩୪, କୋଟପାଡରେ ୨୧୩୬, କୁମୁଲିପୁଟରେ ୬୭୨, କୁନ୍ଦୁରାରେ ୧୦୬୮, ନନ୍ଦପୁରରେ ୩୩, ନାରାୟଣପାଟଣାରେ ୧୫୮ ଏବଂ ଉମୁରୀ ଲ୍ୟାମ୍ପସରେ ସର୍ବାଧିକ ୨ ହଜାର ୫୬ ଜଣ ଚାଷୀ ପଞ୍ଜୀକରଣ କରିଛନ୍ତି।
ସେହିପରି ମହିଳା ସ୍ୱୟଂ ସହାୟିକା ଗୋଷ୍ଠୀ(ଏସ୍ଏଚ୍ଜି)ରେ ୩ ହଜାର ୯୧୯ ଜଣ ଚାଷୀ ପଞ୍ଜୀକରଣ କରିଥିବା ଜଣାପଡିଛି। ସେ ଭିତରେ ଏକୋଇଶୀ ଭଉଣୀ ମହାମାୟୀରେ ୪୮୬, ଗୁଡି ଠାକୁରାଣୀରେ ୩୮, ଜୟ ଜଗନ୍ନାଥରେ ୭୧, ଲକ୍ଷ୍ମୀନାରାୟଣରେ ୧୮୫, ମା’ ବୁଢୀ ଠାକୁରାଣୀରେ ୪୪୩, ମା’ ଦୁର୍ଗାରେ ୩୧୧, ମା’ ଲକ୍ଷ୍ମୀରେ ୬୪, ମଙ୍ଗଳମାୟୀରେ ୩୯, ମା’ମୁତ୍ୟୁଲୁ୍ମ୍ମାରେ ୪୮୩, ମା’ ପ୍ରତିମାରେ ୩୫୧, ମା’ ସରସ୍ୱତୀରେ ୩, ମା’ତାରିଣୀରେ ୧୩୭, ମା’ ଠାକୁରାଣୀରେ ୨୨, ମହାମାୟୀରେ ୩୭୭, ପ୍ରଗତୀରେ ୪୪୯, ରବିନାରାୟଣରେ ୩୯, ସାଇରାମ୍ରେ ୭ ଓ ବୁଢିଠାକୁରାଣୀ ଏସ୍ଏଚ୍ଜିରେ ୩ ଜଣ ପଞ୍ଜୀକରଣ କରିଛନ୍ତି।
ଦଶମନ୍ତପୁର ଲ୍ୟାମ୍ପ୍ସ, ପ୍ରିୟଙ୍କା ଏସ୍ଏଚ୍ଜି, ରାଧାକୃଷ୍ଣ ଏସ୍ଏଚ୍ଜିରେ ଜଣେହେଲେ ଚାଷୀ ଏଯାଏଁ ପଞ୍ଜୀକରଣ କରିନାହାନ୍ତି। ଗତ ରବି ମଣ୍ଡିରେ ୧୫ ହଜାର ୯୯୪ ଜଣ ଚାଷୀ ପଞ୍ଜୀକରଣ କରିଥିଲେ। ଏବେ ଅଧିକ ୭ଦିନ ସମୟ ଥିବାରୁ ପଞ୍ଜୀକରଣ ସଂଖ୍ୟା ବଢିବ ବୋଲି କ୍ରୟକାରୀ ସଂସ୍ଥା ପକ୍ଷରୁ କୁହାଯାଇଛି।
