ଜୟପୁର,୨୯/୩(ବ୍ୟୁରୋ): ବେକରେ ଓଢଣି ବାନ୍ଧି ଜଣେ ଇଞ୍ଜିନିୟରିଂ ଛାତ୍ରୀ କଲେଜ ହଷ୍ଟେଲ୍ରେ ଆତ୍ମହତ୍ୟା କରିଛନ୍ତି। ସେ ହେଉଛନ୍ତି ନବରଙ୍ଗପୁର ଉମରକୋଟ ଭାମିନୀ ପୂଜାରୀଗୁଡ଼ାର ୨୦ ବର୍ଷିୟ ଯୁବତୀ ଶୁକଳ ଭତ୍ରା। ଡିପ୍ଲୋମା ପରେ ସେ ଗୋପାଳକୃଷ୍ଣ କଲେଜ ଅଫ୍ ଇଞ୍ଜିନିୟରିଂ ଆଣ୍ଡ ଟେକ୍ନୋଲୋଜି(ଜିକେସିଇଟି)ରେ ସିଭିଲ୍ରେ ବିଟେକ୍ କରୁଥିଲେ। ଏ ସମ୍ପର୍କରେ ସଦର ଥାନାରେ ଏକ ଅପମୃତ୍ୟୁ ମାମଲା ରୁଜୁ ହୋଇଛି। ତେବେ ମୃତ୍ୟୁର କାରଣ ଏଯାଏ ସ୍ପଷ୍ଟ ହୋଇନାହିଁ। କଲେଜ କର୍ତ୍ତୃପକ୍ଷ ଏବଂ ଛାତ୍ରଛାତ୍ରୀଙ୍କୁ ପୋଲିସ ପଚରାଉଚରା ଜାରି ରଖିଛି। ରବିବାର କୋରାପୁଟରୁ ସାଇଣ୍ଟିଫିକ୍ ଟିମ୍ ପହଞ୍ଚିବା ପରେ ପରବର୍ତ୍ତି ପଦକ୍ଷେପ ନିଆଯିବ ବୋଲି ଆଇଆଇସି ସଚ୍ଚୀନ୍ଦ୍ର ପ୍ରଧାନ କହିଛନ୍ତି।
ମିଳିଥିବା ସୂଚନା ଅନୁଯାୟୀ, ଶୁକଳଙ୍କ ଘର ଉମରକୋଟ ଅଞ୍ଚଳରେ। ଆଜି ମଧ୍ୟାହ୍ଣରେ କଲେଜ ୟୁନିଫର୍ମ ପିନ୍ଧି ହଷ୍ଟେଲ୍ ରୁମ୍ ନମ୍ବର-୧୭କୁ ଯାଇଥିଲେ। ଅପରାହ୍ଣ ପ୍ରାୟ ଗୋଟାଏ ବେଳେ ଅନ୍ୟମାନେ ହଷ୍ଟେଲକୁ ଆସିଥିଲେ। ଭିତର ପଟୁ କବାଟ ବନ୍ଦ ଥିଲା। ବାରମ୍ବାର ଡାକିବା ଏବଂ କବାଟ ବାଡ଼େଇବା ପରେ ବି ଭିତରୁ କୌଣସି ଉତ୍ତର ମିଳିନଥିଲା। ଛାତ୍ରୀମାନେ ଝରକା ପଟେ ଭିତରକୁ ଦେଖିଥିଲେ। ବେକରେ ଓଢଣି ବନ୍ଧା ଅବସ୍ଥାରେ ଫ୍ୟାନ୍ରେ ଶୁକଳ ଝୁଲୁଥିବା ଦେଖିବାକୁ ମିଳିଥିଲା। ଖବର ପାଇ କଲେଜ କର୍ତ୍ତୃପକ୍ଷ ଘଟଣାସ୍ଥଳରେ ପହଞ୍ଚିଥିଲେ।
ପ୍ରଶାସନିକ ଅଧିକାରୀ ହିମାଂଶୁ ଶେଖର ନାହାକ ସଦର ଥାନାରେ ପହଞ୍ଚି ଲିଖିତ ଅଭିଯୋଗ କରିଥିଲେ। ଆଇଆଇସି ଶ୍ରୀ ପ୍ରଧାନ, ଗାଗନାପୁର ଫାଣ୍ଡି ଅଧିକାରୀ ଏସ୍ଆଇ ରାଜକିଶୋର ବାରିକ, ଏଏସ୍ଆଇ ପଙ୍କଜିନୀ ଶବର ଏବଂ ଅନ୍ୟମାନେ ଘଟଣାସ୍ଥଳରେ ପହଞ୍ଚିବା ପରେ କୋଠରୀ ଖୋଲାଯାଇଥିଲା। ସାଇଣ୍ଟିଫିକ୍ ଟିମ୍କୁ ମଧ୍ୟ ଖବର ଦିଆଯାଇଥିଲା। ଏହି ଘଟଣାରେ ଏଏସ୍ଆଇ ପଙ୍କଜିନୀ ମାମଲାର ଅନୁସନ୍ଧାନକାରୀ ଅଧିକାରୀ ଅଛନ୍ତି। ସୂଚନାଥାଉକି, କିଛିବର୍ଷ ଆଗରୁ ଶୁକଳଙ୍କ ମାଆଙ୍କ ମୃତ୍ୟୁ ହୋଇଥିଲା। ବର୍ଷକ ତଳେ ତାଙ୍କ ଭାଇ ବି ଆରପାରିକୁ ଚାଲି ଯାଇଥିଲେ ବୋଲି ସୂଚନା ରହିଛି।
