କୋରାପୁଟ,୨୮/୩: ଜଣେ ଆଦିବାସୀ ମହିଳା ସାଇବର୍ ଠକେଇର ଶିକାର ହୋଇଛନ୍ତି । ସେ ହେଲେ ପଟ୍ଟାଙ୍ଗିର ବୃନ୍ଦାବତୀ ଖଡ଼ା । ତାଙ୍କ ବ୍ୟାଙ୍କ୍ ସଞ୍ଚୟ ଖାତାରେ ଥିବା ୨ ଲକ୍ଷରୁ ଅଧିକ ଟଙ୍କା ଗାଏବ ହୋଇଯାଇଛି। ସ୍ୱାମୀ ରାଜେନ୍ଦ୍ର ଜେନା ଟଙ୍କା ଉଠାଇଥିବା ସେ ସନ୍ଦେହ କରିଛନ୍ତି। ଏ ସମ୍ପର୍କରେ ସାଇବର ଥାନାରେ ଏତଲା ଦେଇଛନ୍ତି। ବୃନ୍ଦାବତୀ କହିଛନ୍ତି, ୮ ବର୍ଷ ତଳେ ସେ ରାଜେନ୍ଦ୍ରଙ୍କୁ ବିବାହ କରିଥିଲେ। ସେମାନଙ୍କ ଏକ ସନ୍ତାନ ଅଛି। ସ୍ୱାମୀ-ସ୍ତ୍ରୀଙ୍କ ଭିତରେ କୌଣସି କାରଣକୁ ନେଇ ମନମାଳିନ୍ୟ ଦେଖା ଦେଇଥିଲା । ରାଜେନ୍ଦ୍ର ଅନ୍ୟ ଜଣଙ୍କୁ ବିବାହ କରିଥିଲେ । ବାଧ୍ୟ ହୋଇ ସେ ବାପଘରକୁ ଚାଲିଆସିଥିଲେ । ପେଟପାଟଣା ଲାଗି ଆନ୍ଧ୍ରପ୍ରଦେଶର ଏକ ଘରୋଇ କମ୍ପାନିରେ ଯୋଗ ଦେଇଥିଲେ । ମିଳୁଥିବା ଟଙ୍କା ଏସ୍ବିଆଇ ଖାତାରେ ରଖୁଥିଲେ । ଖାତାରେ ମୋଟ ୨ ଲକ୍ଷ ୧୩ ହଜାର ୪୦୭ ଟଙ୍କା ଜମା ଥିଲା । ଦରକାର ପଡ଼ିବାରୁ ଟଙ୍କା ଉଠାଇବାକୁ ବ୍ୟାଙ୍କ୍ ଯାଇଥିଲେ । ଯାଞ୍ଚ ବେଳେ ଜଣାପଡିଥିଲା ପାସ୍ବୁକ୍ ଖାଲି । ବ୍ୟାଙ୍କ ଆକାଉଣ୍ଟରେ ସ୍ୱାମୀ ରାଜେନ୍ଦ୍ରଙ୍କ ମୋବାଇଲ୍ ଫୋନ୍ ନମ୍ବର ଦିଆଯାଇଥିଲା । ସେ ବୋଧହୁଏ ସବୁ ଟଙ୍କା ଉଠାଇ ଦେଇଛନ୍ତି । ଏହାକୁ ନେଇ ସେ ଏବଂ ତାଙ୍କ ବାପା ତ୍ରପତି ଖଡ଼ା ସାଇବର ଥାନାର ଦ୍ୱାରସ୍ଥ ହୋଇଛନ୍ତି ।
