କଟକ,୦୭/୦୬: ପୁରୀ ବାଣ ବିସ୍ଫୋରଣରେ ଗୁରୁତର ହୋଇ କଟକ ବଡ଼ ଡାକ୍ତରଖାନାରେ ମୃତ୍ୟୁ ଘଟିଥିବା ଦିବ୍ୟରଞ୍ଜନ ସାହୁଙ୍କର ମୃତଦେହକୁ ନେବା ପାଇଁ କେହି ଦାବିଦାର ଆସିନାହାନ୍ତି । ଫଳରେ ଦୀର୍ଘ ୫ ଦିନ ହେଲା ଦିବ୍ୟରଞ୍ଜନଙ୍କର ମୃତଦେହ ଏସ୍ସିବି ଶବ ସଂରକ୍ଷଣ କକ୍ଷରେ ପଡ଼ିଛି । ଦୀର୍ଘ ୯୬ ଘଣ୍ଟା ପରେ ମଧ୍ୟ ମୃତଦେହ ନେବାକୁ କେହି ସମ୍ପର୍କୀୟ କିମ୍ବା ଆତ୍ମୀୟ ନ ଆସିବାରୁ ଶୁକ୍ରବାର ମୃତଦେହ ବ୍ୟବଚ୍ଛେଦ କରାଯିବ ବୋଲି ମଙ୍ଗଳାବାଗ ଥାନା ସୂତ୍ରରୁ ସୂଚନା ମିଳିଛି ।
ଅନ୍ୟପକ୍ଷରେ ମେଡିକୋ ଲିଗାଲ ନିୟମ ଅନୁସାରେ ମୃତ ଦିବ୍ୟରଞ୍ଜନଙ୍କ ମୃତଦେହରୁ ଏସ୍ସିବି ଏଫ୍ଏମ୍ଟି ବିଭାଗ ପକ୍ଷରୁ ନମୁନା ସଂଗ୍ରହ କରାଯାଇଛି । ଡିଏନ୍ଏ ଟେଷ୍ଟ୍ ପାଇଁ ମୃତଦେହରୁ ବାୟୋଲୋଜିକାଲ ସାମ୍ପୁଲ୍ ଯଥା ରକ୍ତ, ଚୁଟି, ଦାନ୍ତ ସଂଗ୍ରହ କରାଯାଇଥିବାର ପୁଲିସ୍ ପକ୍ଷରୁ କୁହାଯାଇଛି । ଏଫ୍ଏମ୍ଟି ବିଭାଗ ଡାକ୍ତର ମୃତଦେହରୁ ସଂଗ୍ରହ କରିଥିବା ନମୁନାକୁ ରସୁଲଗଡ଼ସ୍ଥିତ ଷ୍ଟେଟ୍ ଫୋରେନସିକ୍ ଲାବରୋଟୋରୀ (ଏସ୍ଏଫ୍ଏଲ୍)କୁ ପଠାଯିବ ବୋଲି ଜଣେ ପୁଲିସ୍ ଅଧିକାରୀ କହିଛନ୍ତି ।
ସୂଚନାଥାଉ କି, ପୁରୀ ବାଣ ବିସ୍ଫୋରଣ ସ୍ଥଳରୁ ଗୁରୁତର ଅବସ୍ଥାରେ ଉଦ୍ଧାର ହୋଇଥିବା ଦିବ୍ୟରଞ୍ଜନଙ୍କର ଶରୀର ଶତପ୍ରତିଶତ ପୋଡ଼ିଯାଇଥିଲା । କ୍ୟାପିଟାଲ ହସ୍ପିଟାଲରେ ସେ ଭର୍ତ୍ତି ହେବା ବେଳେ ନିଜର ନାମ ଦିବ୍ୟରଞ୍ଜନ ସାହୁ ଏବଂ ବାପାଙ୍କ ନାମ ଦୁଷ୍ମନ୍ତ ସାହୁ ବୋଲି କହିବାର କିଛି ସମୟ ପରେ ପାଟିରୁ ଆଉ କଥା ବାହାରିନଥିଲା । ଫଳରେ ତାଙ୍କଠାରୁ ସମ୍ପୂର୍ଣ୍ଣ ଠିକଣା ସଂଗ୍ରହ କରାଯାଇପାରି ନଥିଲା । ଅବସ୍ଥା ଭଲ ନଥିବାରୁ କ୍ୟାପିଟାଲ୍ ହସ୍ପିଟାଲରୁ ତୁରନ୍ତ କଟକ ବଡ଼ ମେଡିକାଲକୁ ସ୍ଥାନାନ୍ତର କରାଯାଇଥିଲା । ପ୍ଲାଷ୍ଟିକ୍ ସର୍ଜରୀ ବିଭାଗ ବର୍ଣ୍ଣ କେୟାର ଆଇସିୟୁରେ ଚିକିତ୍ସାଧୀନ ଅବସ୍ଥାରେ ଗତ ୧ ରାତିରେ ତାଙ୍କର ମୃତ୍ୟୁ ଘଟିଥିଲା । ସମ୍ପର୍କୀୟ କେହି ନ ଆସିବାରୁ ବ୍ୟବଚ୍ଛେଦ କରାନଯାଇ ସଂରକ୍ଷଣ କରି ରଖାଯାଇଛି । ମୃତଦେହର ଅବସ୍ଥା ଦିନକୁ ଦିନ ଖରାପ ହେଉଥିବାରୁ ଆସନ୍ତାକାଲି ବ୍ୟବଚ୍ଛେଦ ପରେ ଦାହ କରାଯିବ ବୋଲି ପୁଲିସ୍ କହିଛି ।
