କଟକ,୦୧/୦୬: ପୁରୀରେ ଚନ୍ଦନ ଯାତ୍ରା ସମୟରେ ବାଣ ବିସ୍ଫୋରଣ ଘଟି ୬ ଜଣଙ୍କ ମୃତ୍ୟୁ ହୋଇଥିଲାବେଳେ ୨୫ଜଣ ଗୁରୁତର ଆହତ ହୋଇଛନ୍ତି । ଏହି ଘଟଣାରେ ପ୍ରଶାସନିକ ଅବହେଳାକୁ ଦାୟୀ କରି ଓଡ଼ିଶା ରାଜ୍ୟ ମାନବାଧିକାର କମିସନ୍ (ଓଏଚ୍ଅ।।ର୍ସି)ରେ ଏକ ମାମଲା ରୁଜୁ ହୋଇଛି । ସମାଜସେବୀ ତଥା ଆଇନଜୀବୀ ଶିବଶଙ୍କର ମହାନ୍ତି ଏହି ମାମଲା ରୁଜୁ କରି ମୃତକଙ୍କ ପରିବାରକୁ ୩୦ଲକ୍ଷ ଏବଂ ଆହତଙ୍କ ପରିବାରକୁ ୧୦ଲକ୍ଷ ଟଙ୍କା ଲେଖାଏଁ କ୍ଷତିପୂରଣ ରାଶି ପ୍ରଦାନ ଲାଗି କମିସନ ନିର୍ଦ୍ଦେଶ ଦେବାକୁ ପ୍ରାର୍ଥନା କରିଛନ୍ତି ।
ଆବେଦନକାରୀ ପିଟିସନ୍ରେ ଉଲ୍ଲେଖ କରିଛନ୍ତି ଯେ, ପୁରୀରେ ଚନ୍ଦନ ଯାତ୍ରା ଅକ୍ଷୟ ତୃତୀୟଠାରୁ ଆରମ୍ଭ ହୋଇ ୨୧ ଦିନ ଧରି ଚାଲେ । ଗତ ୨୯ ତାରିଖ ଦିନ ନରେନ୍ଦ୍ର ପୋଖରୀରେ ଚନ୍ଦନ ଯାତ୍ରା ବେଳେ ଆତସବାଜିର ଆୟୋଜନ ହୋଇଥିଲା । ତେବେ ଏଥିରେ ବିସ୍ଫୋରଣ ହେବାରୁ ଯାତ୍ରାରେ ଉପସ୍ଥିତ ଅନେକ ବ୍ୟକ୍ତି ଗୁରୁତର ଆହତ ହୋଇଛନ୍ତି । ଇତିମଧ୍ୟରେ ୩ଜଣଙ୍କର ମୃତ୍ୟୁ ହୋଇସାରିଲାଣି । ୨୫ଜଣ ଆହତଙ୍କର ଏବେ ବି ଚିକିତ୍ସା ଚାଲିଛି । ଏଭଳି ଅଘଟଣ ପାଇଁ ଦାୟୀ କିଏ? ଆତସବାଜି ପ୍ରଦର୍ଶନ ପାଇଁ ଅନୁମତି ଦିଆଯାଇଥିଲା କି? ଯଦି ଅନୁମତି ଦିଆଯାଇଥିଲା ତାହେଲେ ଏଥିପାଇଁ ପ୍ରଶାସନ ପକ୍ଷରୁ କି’ ପ୍ରକାର ପ୍ରତିଷେଧକ ମୂଳକ ବ୍ୟବସ୍ଥା ଗ୍ରହଣ କରାଯାଇଥିଲା ବୋଲି ଆବେଦନକାରୀ ଏଭଳି ପ୍ରଶ୍ନ ଉଠାଇଛନ୍ତି । ଏଭଳି ଅଘଟଣ ପାଇଁ ଆବେଦନକାରୀ ପୁରୀ ପ୍ରଶାସନ ଏବଂ ପୁଲିସ୍ ପ୍ରଶାସନକୁ ଦାୟୀ କରିବା ସହ ସେମାନଙ୍କ ବିରୋଧରେ ଦୃଢ଼ କାର୍ଯ୍ୟାନୁଷ୍ଠାନ ପାଇଁ ପ୍ରାର୍ଥନା କରିଛନ୍ତି । ଏଥିସହ ମୃତକ ଏବଂ ଆହତଙ୍କ ପରିବାରକୁ ତୁରନ୍ତ କ୍ଷତିପୂରଣ ରାଶି ପ୍ରଦାନ ଲାଗି ନିର୍ଦ୍ଦେଶ ଦେବାକୁ ପିଟିସନ୍ରେ ପ୍ରାର୍ଥନା କରାଯାଇଛି ।