ଚନ୍ଦ୍ରଶେଖରପୁର, ୧୫।୫: ବିଜେପି ବିଧାୟକ ପ୍ରାର୍ଥୀ ପ୍ରିୟଦର୍ଶୀ ମିଶ୍ର ଉତ୍ତର ନିର୍ବାଚନମଣ୍ଡଳୀରେ ଜୋରଦାର ପ୍ରଚାର କରିଛନ୍ତି । ସକାଳେ କଲ୍ୟାଣପୁର ପଞ୍ଚାୟତ, ସନ୍ଧ୍ୟାରେ ଗାଡ଼କଣ ଓ ରଙ୍ଗମାଟିଆରେ ରୋଡ ସୋ’ କରିଛନ୍ତି । ପ୍ରସାର ଭାରତୀ କେନ୍ଦ୍ର ନିକଟରୁ ଏକ ବିରାଟ ଶୋଭାଯାତ୍ରାରେ ଯାଇ ଗାଡ଼କଣ ଅଳିଆ ଗଦା ନିକଟରେ ପହଞ୍ଚିଥିଲେ । କହିଲେ, ଅଳିଆ ଗଦା ପାଇଁ ଏଠାକାର ବାସିନ୍ଦାଙ୍କ ସହ ସ୍ଥାନୀୟ ସ୍କୁଲର ଛାତ୍ରଛାତ୍ରୀ ଅସ୍ୱାସ୍ଥ୍ୟକର ପରିବେଶରେ ରହୁଛନ୍ତି । ପ୍ରବଳ ଦୁର୍ଗନ୍ଧ ସହ ଚର୍ମ ରୋଗ ବୃଦ୍ଧି ପାଉଛି । କିଛି ବାସିନ୍ଦାଙ୍କ ରହିବା ମୁସ୍କିଲ ହୋଇ ପଡ଼ିଲାଣି । ଏହି ପ୍ରସଙ୍ଗକୁ ନେଇ ପୂର୍ବରୁ ଅନେକ ଥର ବିଜେପି ଧାରଣାରେ ବସିଛି । ମୁଁ ନିର୍ବାଚିତ ହେଲେ ମାସକ ମଧ୍ୟରେ ଅଳିଆ ଗଦା ଏଠାରୁ ହଟାଇବି । ସକାଳେ କଲ୍ୟାଣପୁର ପଞ୍ଚାୟତରେ ପ୍ରଚାର କରିଥିଲେ ପ୍ରିୟଦର୍ଶୀ । ସାଙ୍ଗରେ ଥିଲେ ସାଂସଦ ପ୍ରାର୍ଥୀ ଅପରାଜିତା ଷଡ଼ଙ୍ଗୀ । ଉଭୟେ ପହଞ୍ଚିବା କ୍ଷଣି ଗାଁର ମହିଳା ପୁରୁଷମାନେ ସେମାନଙ୍କୁ ସ୍ୱାଗତ କରିଥିଲେ । 

ପରେ ବିରାଟ ବାଇକ ଶୋଭାଯାତ୍ରାରେ ପଞ୍ଚାୟତ ପରିକ୍ରମା କରି ବିକାଶ ପାଇଁ ଡବଲ ଇଞ୍ଜିନ ସରକାର ଗଠନ ନିମନ୍ତେ ନିବେଦନ କରିଥିଲେ । ପଞ୍ଚାୟତରେ ପାନୀୟ ଜଳ ସମସ୍ୟାକୁ ଦୂର କରିବେ ବୋଲି ପ୍ରତିଶ୍ରୁତି ଦେଇଥିଲେ । ଦାଢ଼ା, ରଘୁନାଥପୁର, ବରିମୁଣ୍ଡ ଓ ଇଞ୍ଜଣା ଆଦି ୪ଟି ପଞ୍ଚାୟତର ଆରାଧ୍ୟ ଦେବତାଙ୍କୁ ପୂଜାର୍ଚ୍ଚନା କରିଥିଲେ । ଢାୱା ସ୍ଥିତ ସୋମନାଥ ମନ୍ଦିରରେ ପୂଜାର୍ଚ୍ଚନା କରିବା ପରେ ରୋଡ଼ ଶୋ ଖଇରାପଡ଼ା, ଗଣ୍ଡରପୁରର ସାହିବସ୍ତି ବୁଲି କଲ୍ୟାଣପୁର ସୋମନାଥ ମନ୍ଦିରରେ ଶେଷ ହୋଇଥିଲା । ଶୋଭାଯାତ୍ରାକୁ ପୂର୍ବତନ ଜିଲ୍ଲା ପରିଷଦ ସଦସ୍ୟ କୁନାଲ କୁମାର ରାଉତ, ବସନ୍ତ କୁମାର ପରିଡ଼ା, ବାବୁଲି ନନ୍ଦ, ଅଶୋକ କୁମାର ସେଠୀ, ବସନ୍ତ କୁମାର ତ୍ରିପାଠୀ, ପ୍ରଦୀପ କୁମାର ଜେନା, ନଗେନ କୁମାର ବିଶୋଇ, ରଶ୍ମିରେଖା ଜେନା ପରିଚାଳନା କରିଥିଲେ ।