ମୁମ୍ବାଇ ୨୩/୦୫: ଇଟାଲିର ରୋମ୍ଠାରେ ଆୟୋଜିତ ବୁଲଗାରି ଏଟର୍ନା ଜୁଏଲାରୀର ଏକ କାର୍ଯ୍ୟକ୍ରମରେ ଯୋଗ ଦେଇ ସମଗ୍ର ବିଶ୍ୱରେ ଚର୍ଚ୍ଚାର ବିଷୟ ହୋଇଛନ୍ତି ପ୍ରୟଙ୍କା ଚୋପ୍ରା । ବିଳାସବହୁଳ ଗହଣା ବ୍ରାଣ୍ଡ୍ ବୁଲଗାରିର ୧୪୦ତମ ବାର୍ଷିକୀ ଅବସରରେ ପ୍ରିୟଙ୍କାଙ୍କ ନୂଆ ଲୁକ୍ ସବୁରି ଧ୍ୟାନ ଆକର୍ଷଣ କରିଥିଲା । ବବ୍ ହେୟାରଷ୍ଟାଲ୍ ସାଙ୍ଗକୁ ଅଫ୍-ଶୋଲଡର୍ କ୍ରିମ୍-ବ୍ଲାକ୍ ଗାଉନ୍ରେ ସେ ନଜର ଆସିଥିଲେ । ତେବେ ମୁଖ୍ୟ ଆକର୍ଷଣ ଥିଲା ସେ ପିନ୍ଧିଥିବା ସରପେନ୍ତି ଏଟର୍ନା ହାର, ଯାହା ବୁଲ୍ଗାରିର ମାଷ୍ଟର୍ପିସ୍ ।
ହାରରେ ୧୪୦ କ୍ୟାରେଟ୍ର ହୀରା ଖଚିତ ହୋଇଛି, ଯାହା ଏହି ବିଶ୍ୱପ୍ରସିଦ୍ଧ ଗହଣା ବ୍ରାଣ୍ଡ୍ର ଏପର୍ଯ୍ୟନ୍ତର ଅନ୍ୟତମ ସବୁଠୁ ମୂଲ୍ୟବାନ କୃତି। ହାରଟିକୁ ପ୍ରସ୍ତୁତ କରିବା ଲାଗି ୨,୮୦୦ ଘଣ୍ଟା ଲାଗିଥିଲା । ଏଥିରେ ୨୦ କ୍ୟାରେଟ୍ର କଞ୍ଚା ହୀରା ଲାଗିଛି, ଯାହାକୁ ୭ଟି ମୋଟି ଆକୃତିରେ କଟାଯାଇଛି । ହାରରେ ୬୯୮ ବାଗୁଟ୍ଟି ହୀରା ଲାଗିଛି, ଯାହାର ମୋଟ୍ ଓଜନ ୬୧.୮୧ କ୍ୟାରେଟ୍ । ଏହିଭଳି ଭାବେ ହାରରେ ମୋଟ୍ ୧୪୦ କ୍ୟାରେଟ୍ର ହୀରା ଖଚିତ ହୋଇଛି । ଏହାର ମୂଲ୍ୟ ୪୩ ମିଲିଅନ୍ ଡଲାର ଅର୍ଥାତ୍ ଭାରତୀୟ ମୂଲ୍ୟରେ ୩୫୦ କୋଟି ଟଙ୍କାରୁ ଅଧିକ । ଦୀର୍ଘ ସମୟ ଧରି ବୁଲଗାରି ଜୁଏଲାରୀର ବ୍ରାଣ୍ଡ୍ ଆମ୍ବାସଡର ଥିବା ପ୍ରିୟଙ୍କା ଏହାର ୧୪୦ତମ ବାର୍ଷିକୀ ସନ୍ଧ୍ୟାରେ ହାରଟିକୁ ପିନ୍ଧି ଉତ୍ସବର ଶୋଭା ବଢ଼ାଇଥିଲେ ।
