ବ୍ୟାସନଗର,୨୧/୦୬: ଚିକିତ୍ସାଜନିତ ଅବହେଳା ଯୋଗୁଁ ସବୁବେଳେ ଚର୍ଚ୍ଚାରେ ରହି ଆସୁଥିବା ଯାଜପୁରରୋଡ୍‌ ଡାକ୍ତରଖାନାରେ ଗୁରୁବାର ଆଉ ଏକ ଅଭାବନୀୟ ଘଟଣା ଦେଖିବାକୁ ମିଳିଛି । ଦାନ୍ତ ଡାକ୍ତରଙ୍କ ହାତ ମୋଡ଼ି ଜଣେ ଫାର୍ମାସିଷ୍ଟ ଧକ୍କା ମାରିଥିବାର ଅଭିଯୋଗ ଥାନାରେ ପହଞ୍ଚିଛି । ଉଭୟ ପକ୍ଷଙ୍କ ଏତଲା ଆଧାରରେ ଯାଜପୁରରୋଡ୍‌ ଥାନାରେ  ଦୁଇଟି ମାମଲା ରୁଜୁ ହୋଇଛି । ପୁଲିସ ଘଟଣାର ତଦନ୍ତ  କରିବା ସହ ଡାକ୍ତରଖାନାର ସିସିଟିଭିକୁ ଯାଞ୍ଚ କରୁଛି ।  

ଅଭିଯୋଗ ମୁତାବକ, ଯାଜପୁରରୋଡ୍‌ ଡାକ୍ତରଖାନାରେ  ନିଯୁକ୍ତ ଦାନ୍ତ ଡାକ୍ତର ଶୁଭଲକ୍ଷ୍ମୀ ରଥ ବସୁଥିବା କୋଠରୀରେ  କିଛି ଦିନ ହେବ ତାଲା ପକାଯାଉଛି । ରୋଗୀଙ୍କୁ ଚିକିତ୍ସା  ଯୋଗାଇବାରେ ଅସୁବିଧା ଭୋଗୁଥିବା ଡା. ରଥ ଉପରିସ୍ଥ  ଅଧିକାରୀଙ୍କୁ ଜଣାଇବା ପରେ ସଂପୃକ୍ତ କୋଠରୀକୁ  ଖୋଲାଯାଉଥିଲା । ଗୁରୁବାର ମଧ୍ୟ ସଂପୃକ୍ତ କୋଠରୀରେ  ତାଲା ପଡ଼ିଥିଲା । ଫଳରେ ଡା. ରଥଙ୍କ ନିକଟକୁ ଆସିଥିବା  ଜଣେ ଦାନ୍ତ ରୋଗୀଙ୍କୁ ଚିକିତ୍ସାରେ ଅସୁବିଧା ହୋଇଥିଲା ।  ଫଳରେ ଡା. ରଥ ଡାକ୍ତରଖାନା ଫାର୍ମାସିଷ୍ଟ ପ୍ରଜ୍ଞାପରମିତା  ସାହୁଙ୍କୁ କାହିଁକି ଜରୁରିକାଳୀନ କୋଠରୀରେ ତାଲା ପକାଇଛ  ବୋଲି ପ୍ରଶ୍ନ କରିଥିଲେ । ଏହା ଆପଣଙ୍କ ବ୍ୟକ୍ତିଗତ ସମ୍ପତ୍ତି  ନୁହେଁ, ଏହା ରୋଗୀଙ୍କୁ ଚିକିତ୍ସା ଯୋଗାଇବାର ସ୍ଥାନ । ତେଣୁ  ଡାକ୍ତରଖାନା ଖୋଲାଥିବା ବେଳେ ସଂପୃକ୍ତ କୋଠରୀରେ  କାହିଁକି ତାଲା ପଡ଼ିଛି ବୋଲି ଡା. ରଥ ପ୍ରଶ୍ନ କରିଥିଲେ ।  ଯୁକ୍ତିତର୍କ ଧୀରେ ଧୀରେ ଉଗ୍ର ରୂପ ହୋଇଥିଲା । 

ଫାର୍ମାସିଷ୍ଟ  ଶ୍ରୀମତୀ ସାହୁ ଉତ୍ତ୍ୟକ୍ତ ହୋଇ ଡା. ରଥଙ୍କ ହାତକୁ ମୋଡ଼ି  ଧକ୍କା ମାରିବା ସହ ରୁମ୍‌ରୁ ବାହାର କରିଦେଇଥିଲେ । ଯାହାକୁ  ନେଇ ଡା. ରଥ ଯାଜପୁରରୋଡ୍‌ ଥାନାରେ ଏତଲା ଦେଇଛନ୍ତି ।  ଫାର୍ମାସିଷ୍ଟ ଶ୍ରୀମତୀ ସାହୁ କହିଛନ୍ତି, ଡା. ରଥ କାହିଁକି  ତାଲା ପକାଇଛ, ଏହା କ’ଣ ତୁମ ବାପାଙ୍କ ସମ୍ପତ୍ତି କି  ବୋଲି ସେ ପ୍ରଶ୍ନ କରିବା ସହିତ ଖରାପ ବ୍ୟବହାର  କରିଥିଲେ । ଉପରିସ୍ଥ ଅଧିକାରୀଙ୍କ ପରାମର୍ଶ କ୍ରମେ  ଜରୁରିକାଳୀନ ରୁମ୍‌ରେ ତାଲା ପଡ଼ିଥିଲା । ଦାନ୍ତ  ଡାକ୍ତରଙ୍କୁ ମିଳିଥିବା କୋଠରୀରେ ସେ ବସୁନଥିବା  ବେଳେ ଜାଣିଶୁଣି ଏଭଳି ଘଟଣା ଭିଆଇଥିଲେ ।  ଯାହାକୁ ନେଇ ମୁଁ ଥାନାରେ ଏତଲା ଦେଇଛି ।