ପାଟନା,୧୮/୦୩: ଜଣେ ବିଚାରଧୀନ କଏଦୀରୁ ଶିକ୍ଷକ ଚାକିରି । ଜେଲରେ ସଜା କାଟୁଥିଲେ । ୧୮ ମାସ ଜେଲ୍ ଚାରିିକାନ୍ଥ ଭିତରେ ଥିଲେ । ସେ ଅନ୍ଧକାର କଠୋରୀରେ ଆଖିରେ ଥିଲା ଅସୁମାରୀ ସ୍ବପ୍ନ । ଜେଲରୁ ବିପିଏସସି ପରୀକ୍ଷା ଦେଲେ । କୃତକାର୍ଯ୍ୟ ବି ହେଲେ । ହ୍ୟାଣ୍ଡକପ୍ ପକାଇ ଆପଏଣ୍ଟମେଣ୍ଟ୍ ଲେଟର ରିସିଭ୍ କଲେ । ବିହାର ଗୟାରୁ ଏପରି ଏକ ଆଶ୍ଚର୍ଯ୍ୟ କରିବା ପରି ଘଟଣା ସାମ୍ନାକୁ ଆସିଛି । ଯାହାକୁ ନେଇ ସବୁଠି ଚର୍ଚ୍ଚା ।
ବିହାରର ବିପିନ କୁମାର । ପାଟନା ଦାନାପୁର ସ୍ଥିତ ଏକ କୋଚିଂ ସେଣ୍ଟରରେ ପଢାଉଥିଲେ । ଦେଢ ବର୍ଷ ତଳେ ସେଠାରେ ଜଣେ ଛାତ୍ରଙ୍କୁ ମାଡ ମାରିଥିଲେ ବିପିନି । ତାଙ୍କ ନାମରେ ମାମଲା ଦାୟର ହୋଇଥିଲା । ପୋକ୍ସୋ ଆକ୍ଟରେ ୧୮ ମାସ ତଳେ ତାଙ୍କୁ ବିହାର ବୈଉର ଜେଲ୍ ପଠା ଯାଇଥିଲା । ସେ ବିଚାରଧୀନ କଏଦୀ ଭାବେ ଜେଲରେ ଥିଲେ । ଜେଲରେ ଥାଇ ବି ପାଠ ପଢା ଜାରି ରଖିଥିଲେ । ଦିନକୁ ୧୦ ଘଣ୍ଟା ପଢୁଥିଲେ । ଜେଲରୁ ବିପିଏସସି ପରୀକ୍ଷା ଦେଇ ଭଲ ନମ୍ବର ରଖି ପାସ୍ କରିଥିଲେ । ରେଜଲ୍ଟ ଆସିବା ପରେ ଶିକ୍ଷା ବିଭାଗ ପକ୍ଷରୁ ନିଯୁକ୍ତିପତ୍ର ବିତରଣ ସମାରୋହ ଅନୁଷ୍ଠିତ ହୋଇଥିଲା । ଏଥିରେ ବିପିନଙ୍କୁ ଉପସ୍ଥିତ ରହିବାକୁ କୁହାଯାଇଥିଲା । ଏହାପରେ ପାଟନାର ବୈଉର ଜେଲରୁ ବିପିନ କୁମାର ସୁରକ୍ଷା ବ୍ୟବସ୍ଥାରେ ଜଏନିଂ ଲେଟର ନେବାକୁ ଆସିଥିଲେ । ସୁରକ୍ଷା ପାଇଁ ବିପିନଙ୍କ ହାତରେ ହାତକଡି ପକାଇଥିଲା ପୋଲିସ । ତାଙ୍କ ଚାରିପାଖରେ ପୋଲିସ ଘେରି ରହିଥିଲେ ।
ଅଧିକ ପଢନ୍ତୁ...ଜେଲ୍ରେ ଥିବା ଅଭିଯୁକ୍ତ ଫୋନ୍ରେ ଦେଲା ଧମକ, ଜେଲର ଓ ଡେପୁଟୀ ଜେଲର ନିଲମ୍ୱିତ
ବୋଧଗୟା ସ୍ଥିତ ସଂସ୍କୃତି କେନ୍ଦ୍ରରେ ବିପିଏସସି ଶିକ୍ଷକ ଚୟନ ନିଯୁକ୍ତି ମେଳା ହୋଇଥିଲା । ହାତରେ ହ୍ୟାଣ୍ଡକପ ସହ ପୋଲିସ ଛାଉଣିରେ ଆସିଥିଲେ ବିପିନ କୁମାର । ଶିକ୍ଷକ ନିଯୁକ୍ତି ପତ୍ର ଗ୍ରହଣ କରିଥିଲେ । ବିହାର ଶିଳ୍ପ ମନ୍ତ୍ରୀ ନିତୀଶ ମିଶ୍ର ତାଙ୍କୁ ନିଯୁକ୍ତି ପତ୍ର ପ୍ରଦାନ କରିଥିଲେ । ବିପିନଙ୍କୁ ଦେଖି ସେଠାରେ ଉପସ୍ଥିତ ସମସ୍ତେ ଅଧିକାରୀ ଚକିତ ହୋଇଥିଲେ । ବିପିନଙ୍କୁ ନିଯୁକ୍ତି ପତ୍ର ତ ମିଳି ଯାଇଛି । ହେଲେ ସେ ଜେଲରୁ ପାଠ ପଢାଇବାକୁ ସ୍କୁଲ ଯିବେ କିପରି ତାହା ଏବେ ବଡ଼ ପ୍ରଶ୍ନ । ଜଣେ ବିଚାରଧୀନ କଏଦୀ ନିଯୁକ୍ତି ପତ୍ର ପାଇଥିବା ହୁଏତ ପ୍ରଥମ କାହାଣୀ ହୋଇଥିବ । ବର୍ତ୍ତମାନ ବିପିନଙ୍କ ମାମଲା କୋର୍ଟରେ ବିଚାରଧୀନ ରହିଛି । ଯଦି ସେ ଦୋଷୀ ସାବ୍ୟସ୍ତ ହୁଅନ୍ତି ତେବେ ତାଙ୍କ ଚାକିରି ଚାଲିଯିବାର ସମ୍ଭାବନା ରହିଛି ।
