ନୂଆଦିଲ୍ଲୀ: ସୋସିଆଲ ମିଡିଆର ବ୍ୟବହାର ବୃଦ୍ଧି ପାଇଛି । ବୟସ୍କଙ୍କ ପାଖରୁ ଛୋଟପିଲା ଏଥିରେ ବେଶ ଆକ୍ଟିଭ । କିନ୍ତୁ ସୋସିଆଲ ମିଡିଆର କୁପ୍ରଭାବ ମଧ୍ୟ ରହିଛି । ବିଶେଷ କରି ଛୋଟ ପିଲାଙ୍କ ଲାଗି ସୋସିଆଲ ମିଡିଆ ବ୍ୟବହାର ଉପରେ କଟକଣାର ଆବଶ୍ୟକତା ରହିଥିବା ଚର୍ଚ୍ଚା ବି ହେଉଛି । ଏହାକୁ ନଜରରେ ରଖି କେନ୍ଦ୍ର ସରକାର ଛୋଟ ପିଲାଙ୍କ ସୋସିଆଲ ମିଡିଆ ବ୍ୟବହାରକୁ ନେଇ ନୂଆ ଆଇନ୍ ଆଣିବାକୁ ଯୋଜନା କରୁଛନ୍ତି ।
ଭାରତରେ ଛୋଟ ପିଲାଙ୍କ ପାଇଁ ସୋସିଆଲ୍ ମିଡିଆ ବ୍ୟବହାର କରିବା ଉପରେ ଲାଗିବ କଟକଣା । ୧୮ ବର୍ଷରୁ କମ ବୟସର ପିଲା ସୋସିଆଲ ମିଡିଆ ଆକାଉଣ୍ଟ ଖୋଲିବାକୁ ବାପା-ମାଙ୍କ ଠାରୁ ଅନୁମତି ନେବାକୁ ପଡ଼ିବ । ଏନେଇ ଶୁକ୍ରବାର କେନ୍ଦ୍ର ଇଲେକ୍ଟ୍ରୋନିକ୍ସ ଏବଂ ସୂଚନା ପ୍ରଯୁକ୍ତିବିଦ୍ୟା ମନ୍ତ୍ରଣାଳୟ ବ୍ୟକ୍ତିଗତ ଡିଜିଟାଲ ଡାଟା ସୁରକ୍ଷା ଆଇନ (DPDP) ନିୟମ ପାଇଁ ଏକ ଡ୍ରାଫ୍ଟ ନିୟମ ଜାରି କରିଛି। ଫେବୃଆରୀ ୧୮ ପର୍ଯ୍ୟନ୍ତ ଏହି ସମ୍ପର୍କରେ ସମସ୍ତ ହିତାଧିକାରୀଙ୍କୁ ନିଜର ଅଭିଯୋଗ ଓ ପରାମର୍ଶ ଦେବାକୁ ଆହ୍ୱାନ କରାଯାଇଛି।
ଲୋକଙ୍କ ମତ ଅନୁସାରେ ଏଥିରେ ପରିବର୍ତ୍ତନ କରାଯିବ। ନଚେତ୍ ସରକାର ଡ୍ରାପ୍ଟ ହୋଇଥିବା ନିୟମକୁ ଦେଶରେ ଲାଗୁ କରିବେ। କେନ୍ଦ୍ର ସରକାରଙ୍କର ଏହି ଯୋଜନା ବାବଦରେ ଲୋକେ MyGov.in ୱେବ୍ସାଇଟ୍ରେ ଯାଇ ଫେବ୍ରୁଆରୀ ୧୮ ମଧ୍ୟରେ ନିଜର ମତ ରଖିପାରିବେ। ଏହାପରେ ସରକାର ଲୋକଙ୍କ ମତକୁ ବିଚାରକୁ ନେବେ ବୋଲି କେନ୍ଦ୍ର ସରକାର କହିଛନ୍ତି । ଆଇନ ଉଲ୍ଲଂଘନ ହେଲେ ଦଣ୍ଡବିଧାନ ନେଇ ମଧ୍ୟ ପ୍ରାବଧାନ ରହିଛି । ତେବେ କେନ୍ଦ୍ର ସରକାର ଜାରି କରିଥିବା ଡ୍ରାଫ୍ଟରେ ଦର୍ଶାଯାଇଛି ଯେ, ବ୍ୟକ୍ତିଗତ ଡିଜିଟାଲ ଡାଟା ସୁରକ୍ଷା ଆଇନ -୨୦୨୩ ର ଧାରା ୪୦ ର ଉପ-ବିଭାଗ (୧) ଏବଂ (୨) ଅଧୀନରେ ଥିବା କ୍ଷମତାର ପ୍ରୟୋଗରେ କେନ୍ଦ୍ର ସରକାର ପ୍ରସ୍ତାବିତ ନିୟମର ଡ୍ରାଫ୍ଟ ପ୍ରକାଶ କରିଛନ୍ତି ।
