ନୂଆଦିଲ୍ଲୀ: ଶେଷରେ ଆଣ୍ଠେଇଲା ପାକିସ୍ତାନ। ଭାରତ ସହ ଆଉ ପଙ୍ଗା ନେବାକୁ ଚାହୁଁନି ଏହି ଶତ୍ରୁଦେଶ। ଭାରତ ସହ ଥିବା ସମସ୍ତ ସମସ୍ୟର ଅନ୍ତ ଚାହୁଁଛି ପାକିସ୍ତାନ। ବୁଧବାର ଭାରତକୁ ସମ୍ୱୋଧନ କରି କିଛି ଏପରି ଘୋଷଣା କରିଛନ୍ତି ପାକିସ୍ତାନର ପ୍ରଧାନମନ୍ତ୍ରୀ ଶେହବାଜ ସରିଫ।
ସୂଚନା ମୁତାବକ, ପାକିସ୍ତାନ ଅଧିକୃତ କାଶ୍ମୀର (ପିଓକେ)କୁ ସମର୍ଥନ କରିବା ପାଇଁ ପାକିସ୍ତାନରେ "କାଶ୍ମୀର ସଂହତି ଦିବସ" ନାମରେ ଏକ ବାର୍ଷିକ କାର୍ଯ୍ୟକ୍ରମ ଅନୁଷ୍ଠିତ ହୋଇଥାଏ। ଚଳିତ ବର୍ଷର କାର୍ଯ୍ୟକ୍ରମ ମୁଜାଫରାବାଦରେ ଅନୁଷ୍ଠିତ ହୋଇଥିଲା। ଏହି କାର୍ଯ୍ୟକ୍ରମର ଏକ ସ୍ୱତନ୍ତ୍ର ଅଧିବେଶନରେ ଯୋଗଦେଇ ପାକିସ୍ତାନ ଭାରତ ସହ କଥାବର୍ତ୍ତା କରି ସବୁ ସମସ୍ୟାର ସମାଧାନ ଚାହୁଁଛି ବୋଲି ସରିଫ ଭାରତ ପାଇଁ ଏହି ଶାନ୍ତି ପ୍ରସ୍ତାବ ରଖିଛନ୍ତି।
“ଭାରତ ଅଗଷ୍ଟ ୫, ୨୦୧୯ରେ ନେଇଥିବା ନିଷ୍ପତି ଉପରେ ଆଉଥରେ ବିଚାର କରିବାର ଆବଶ୍ୟକତା ରହିଛି। ଜମ୍ମୁକାଶ୍ମିର ମାମଲା ଜାତିସଂଘରେ ବିଚାରଧିନ ରହିଛି। ଏହି ନିଷ୍ପତ୍ତି ଆସିବା ଯାଏ ଭାରତ ଏହା ଉପରେ ଚିନ୍ତା କରୁ” ବୋଲି ସେ ମନ୍ତବ୍ୟ ଦେଇଛନ୍ତି। ଭାରତ ଜମ୍ମୁକାଶ୍ମୀରରୁ ଧାରା ୩୭୦ ହଟେଇଥିବାରୁ ଏହାକୁ ଲକ୍ଷ କରି ନିଜ ମନ୍ତବ୍ୟ ଦେଇଛନ୍ତି ସରିଫ। ତେବେ ଭାରତ ଇସଲାମାବାଦ୍ କୁ ଜମ୍ମୁକାଶ୍ମୀର ଓ ଲଦାଖ ଅଞ୍ଚଳକୁ ଦେଶର ଅବ୍ୟଚ୍ଛେଦ ଅଙ୍ଗ ବୋଲି କହିଆସିଛି।
ସରିଫ କହିଛନ୍ତି ଯେ ଭାରତ ଏବଂ ପାକିସ୍ତାନର ତିକ୍ତ ସମ୍ପର୍କକୁ ସଜାଡ଼ିବା ପାଇଁ ଏକମାତ୍ର ଉପାୟ ହେଉଛି ଆଲୋଚନା। ୧୯୯୯ ମସିହାରେ ଲାହୋର ଚୁକ୍ତିପତ୍ରରେ ଉଲ୍ଲେଖ କରାଯାଇଥିବା ନିୟମାବଳୀକୁ ଧ୍ୟାନରେ ରଖି ଦୁଇଦେଶକୁ ନିଷ୍ପତ୍ତି ଗ୍ରହଣ କରିବାକୁ ପଡିବ। ସୂଚନା ମୁତାବକ ତତ୍କାଳୀନ ପ୍ରଧାନମନ୍ତ୍ରୀ ଅଟଳ ବିହାରୀ ବାଜପେୟୀ ପାକିସ୍ତାନ ଗସ୍ତ ସମୟରେ ଏହି ଚୁକ୍ତି ସ୍ୱାକ୍ଷରିତ କରିଥିଲେ।
ପାକିସ୍ତାନ ଅନେକ ଥର ଜମ୍ମୁକାଶ୍ମୀର ପ୍ରସଙ୍ଗକୁ ଜାତିସଂଘରେ ଉଠେଇବାକୁ ଚେଷ୍ଟା କରିଛି। କିନ୍ତୁ ଏହା ଦୁଇଦେଶର ଅନ୍ତରୀଣ ମାମଲା ହୋଇଥିବାରୁ ପାକିସ୍ତାନ ଜାତିସଂଘରେ ବିଶେଷ ସମର୍ଥନ ପାଇପାରି ନାହିଁ। ଶେଷରେ ପାକିସ୍ତାନ ଭାରତ ସହ ଶାନ୍ତି ବୁଝାମଣା କରିବାକୁ ଚାହୁଁଛି ବୋଲି ସରିଫ ନିଜ ଭାଷଣରେ କହିଛନ୍ତି।
