ନୂଆଦିଲ୍ଲୀ: ଆମେରିକାର ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ ଆସନ୍ତା ସପ୍ତାହରେ ହ୍ୱାଇଟ ହାଉସ ପରିଦର୍ଶନ କରିବାକୁ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କୁ ନିମନ୍ତ୍ରଣ କରିଛନ୍ତି। ଏନେଇ ବୁଧବାର ହ୍ୱାଇଟ ହାଉସର ଜଣେ ଅଧିକାରୀ ଏହା ସୂଚନା ଦେଇଛନ୍ତି। ପ୍ରଥମେ ପ୍ୟାରିସରେ ଏଆଇ ଉପରେ ଆନ୍ତର୍ଜାତୀୟ ସମ୍ମିଳନୀର ସହ-ଅଧ୍ୟକ୍ଷତା କରିବା ପରେ ପିଏମ ମୋଦୀ ଫେବୃଆରୀ ୧୨ ଏବଂ ୧୩ ତାରିଖରେ ଦୁଇ ଦିନିଆ ଆମେରିକା ଗସ୍ତରେ ୱାଶିଂଟନ୍ ରେ ପହଞ୍ଚିବାର କାର୍ଯ୍ୟକ୍ରମ ରହିଛି।
ସୂଚନା ମୁତାବକ ଜାନୁଆରୀ ୨୭ ରେ ମୋଦୀ ଏବଂ ଟ୍ରମ୍ପଙ୍କ ମଧ୍ୟରେ ଫୋନ୍ ଯୋଗେ ବାର୍ତ୍ତାଳାପ ହୋଇଥିଲା। ଦୁଇ ବରିଷ୍ଠ ନେତାଙ୍କ ମଧ୍ୟରେ ଫୋନ୍ ବାର୍ତ୍ତାଳାପର କିଛି ଦିନ ପରେ ପିଏମ୍ ମୋଦୀଙ୍କୁ ହ୍ୱାଇଟ ହାଉସ୍ ପରିଦର୍ଶନ କରିବାକୁ ନିମନ୍ତ୍ରଣ ଦିଆଯାଇଛି। ଆମେରିକାର ବାୟୁସେନା ବିମାନ ୧୦୪ ବେଆଇନ ପ୍ରବାସୀ ଭାରତୀୟଙ୍କୁ ନେଇ ଅମୃତସରରେ ପହଞ୍ଚିବାର କିଛି ସମୟ ପରେ ହ୍ୱାଇଟ ହାଉସ ପକ୍ଷରୁ ଏହି ଘୋଷଣା କରାଯାଇଛି।
ଟ୍ରମ୍ପ ଦ୍ୱିତୀୟ ଥର ପାଇଁ ଶପଥ ଗ୍ରହଣ କରିବା ପରଠାରୁ ଏହା ପ୍ରଧାନମନ୍ତ୍ରୀ ମୋଦୀଙ୍କ ଆମେରିକାକୁ ପ୍ରଥମ ଦ୍ୱିପାକ୍ଷିକ ଗସ୍ତ ହେବ। ଆମେରିକା ସରକାରଙ୍କ ନିମନ୍ତ୍ରଣ କ୍ରମେ ଟ୍ରମ୍ପଙ୍କ ଶପଥ ଗ୍ରହଣ ସମାରୋହରେ ବୈଦେଶିକ ବ୍ୟାପାର ମନ୍ତ୍ରୀ ଏସ ଜୟଶଙ୍କର ଭାରତକୁ ପ୍ରତିନିଧିତ୍ୱ କରିଥିଲେ ଏବଂ ପ୍ରଧାନମନ୍ତ୍ରୀ ନରେନ୍ଦ୍ର ମୋଦୀଙ୍କଠାରୁ ଟ୍ରମ୍ପଙ୍କ ପାଇଁ ଏକ ଚିଠି ନେଇଯାଇଥିଲେ। ତେବେ ମୋଦୀ ଟ୍ରମ୍ଫଙ୍କ ଶପଥ ଗ୍ରହଣ ଉତ୍ସବରେ ଯୋଗଦେବାର କାର୍ଯ୍ୟକ୍ରମ ରହିଥିଲା। କିନ୍ତି ପରେ ବିଭିନ୍ନ କାରଣରୁ ଏହାକୁ ବଦଳାଯାଇଥିଲା।
