ନୂଆଦିଲ୍ଲୀ: ବିଶ୍ୱ କର୍କଟ ଦିବସରେ ଦି ଲାନସେଟ୍ ରେସ୍ପିରେଟୋରୀ ମେଡିସିନ୍ ଜର୍ଣ୍ଣାଲରେ ପ୍ରକାଶିତ ଏକ ରିପୋର୍ଟରୁ ଜଣାପଡିଛି ଯେ, କେବେ ଧୂମପାନ କରିନଥିବା ବ୍ୟକ୍ତିଙ୍କ ଠାରେ ମଧ୍ୟ ଫୁସଫୁସ କର୍କଟ ବୃଦ୍ଧି ପାଉଛି । ଏହି ବୃଦ୍ଧି ବାୟୁ ପ୍ରଦୂଷଣ ଯୋଗୁଁ ହୋଇପାରେ । ଅଧ୍ୟୟନରେ ଇଣ୍ଟରନ୍ୟାସନାଲ୍ ଏଜେନ୍ସି ଫର୍ ରିସର୍ଚ୍ଚ ଅନ୍ କ୍ୟାନସର (IARC) ଏବଂ ବିଶ୍ୱ ସ୍ୱାସ୍ଥ୍ୟ ସଂଗଠନ (WHO) ର ଗବେଷକମାନେ ସାମିଲ ଥିଲେ । ଗବେଷକମାନେ ଚାରୋଟି ଉପପ୍ରକାର(ସବଟାଇପ୍‌) ପାଇଁ ଜାତୀୟ ସ୍ତରୀୟ ଫୁସଫୁସ କର୍କଟ ରୋଗର ଆକଳନ କରିବା ଲାଗି ଗ୍ଲୋବାଲ୍ କର୍କଟ ଅବଜରଭେଟୋରୀ ୨୦୨୨ ଡାଟାର ବିଶ୍ଳେଷଣ କରିଥିଲେ ।  ଆଡେନୋକାର୍ସିନୋମା, ସ୍କ୍ୱାମସ୍ ସେଲ୍ କାର୍ସିନୋମା, କ୍ଷୁଦ୍ର ଏବଂ ବୃହତ୍ତ-କୋଷ କାର୍ସିନୋମା ଉପରେ ବିଶ୍ଳେଷଣ କରିଥିଲେ ।

ଗବେଷକମାନେ ଜାଣିବାକୁ ପାଇଲେ ଯେ, ଆଡେନୋକାର୍ସିନୋମା ଉଭୟ ପୁରୁଷ ଏବଂ ମହିଳାଙ୍କ ମଧ୍ୟରେ ପ୍ରମୁଖ ସବଟାଇପ୍‌ ।  ଏହି ସବଟାଇପ୍‌ ଧୂମପାନ କରୁନଥିବା ବ୍ୟକ୍ତିଙ୍କ ଠାରେ ଦେଖାଯାଉଥିବା ଫୁସଫୁସ୍‌ କର୍କଟ ଲାଗି ଦାୟୀ ।  ୨୦୨୨ ତଥ୍ୟ ଅନୁସାରେ, ୫୩-୭୦ ପ୍ରତିଶତ ଧୂମପାନ କରୁନଥିବା ବ୍ୟକ୍ତି ଏହି ସବଟାଇପ୍‌ ପାଇଁ  ଫୁସଫୁସ୍‌ କର୍କଟ ସହ ଯୁଝୁଛନ୍ତି । ଅଧ୍ୟୟନର ଗବେଷକମାନେ କହିଛନ୍ତି ଯେ, ଫୁସଫୁସ କର୍କଟ ରୋଗର ଅନ୍ୟ ଉପପ୍ରକାର ତୁଳନାରେ, ଆଡେନୋକାର୍ସିନୋମାର ବିପଦ ଧୂମପାନ ସହ ବିଶେଷ ଭାବରେ ଜଡ଼ିତ ନୁହେଁ ।  ବିଶ୍ୱର ଅନେକ ଦେଶରେ ଧୂମପାନର ପ୍ରଚଳନ ହ୍ରାସ ପାଇବା ସହିତ, କେବେ ଧୂମପାନ କରିନଥିବା ଲୋକଙ୍କ ମଧ୍ୟରେ ଫୁସଫୁସ କର୍କଟ ରୋଗର ଅନୁପାତ ବୃଦ୍ଧି ପାଇଛି। IARCର କର୍କଟ ନିରୀକ୍ଷଣ ଶାଖାର ମୁଖ୍ୟ ଏବଂ ମୁଖ୍ୟ ଲେଖକ ଫ୍ରେଡି ବ୍ରେ କହିଛନ୍ତି, "ଧୂମପାନ ଶୈଳୀରେ ପରିବର୍ତ୍ତନ ଏବଂ ବାୟୁ ପ୍ରଦୂଷଣର ସଂସ୍ପର୍ଶରେ ଆସିବା ହିଁ ଏବେର ଫୁସଫୁସ କର୍କଟ ପ୍ରୋଫାଇଲର ମୁଖ୍ୟ ନିର୍ଣ୍ଣାୟକ।"

ସେପଟେ ଧୂମପାନ କରିନଥିବା ଲୋକଙ୍କ ଫୁସଫୁସ କର୍କଟ ବିଶ୍ୱବ୍ୟାପୀ କର୍କଟ ସମ୍ବନ୍ଧୀୟ ମୃତ୍ୟୁର ପଞ୍ଚମ ପ୍ରମୁଖ କାରଣ ବୋଲି ଆକଳନ କରାଯାଇଛି, ଯାହା ପ୍ରାୟତଃ ଆଡେନୋକାର୍ସିନୋମା ଭାବରେ ଘଟେ ଏବଂ ସାଧାରଣତଃ ମହିଳା ଏବଂ ଏସୀୟ ଲୋକଙ୍କ କ୍ଷେତ୍ରରେ ଦେଖାଯାଏ ବୋଲି ଅଧ୍ୟନରୁ ଜଣାପଡ଼ିଛି । ୨୦୨୨ରେ, ମହିଳାମାନଙ୍କ ମଧ୍ୟରେ ବିଶ୍ୱରେ ୯୦୮,୬୩୦ ନୂତନ ଫୁସଫୁସ କର୍କଟ ପୀଡ଼ିତ ଚିହ୍ନଟ ହୋଇଥିଲା, ସେଥିମଧ୍ୟରୁ ୫୪୧,୯୭୧ (୫୯.୭ ପ୍ରତିଶତ) ଆଡେନୋକାର୍ସିନୋମା ଥିଲା। ସୂଚନାଯୋଗ୍ୟ, ଆଡେନୋକାର୍ସିନୋମା ହେଉଛି ଏକ ପ୍ରକାରର କର୍କଟ ଯାହା ଅଙ୍ଗଗୁଡ଼ିକୁ ରେଖାବଦ୍ଧ କରୁଥିବା ଗ୍ରନ୍ଥିରୁ ଆରମ୍ଭ ହୁଏ ।