ନୂଆଦିଲ୍ଲୀ: ଆମେରିକା ରାଷ୍ଟ୍ରପତି ଡୋନାଲ୍ଡ ଟ୍ରମ୍ପ କାର୍ଯ୍ୟଭାର ସମ୍ଭାଳିବାର ସପ୍ତାହେ ମଧ୍ୟରେ ଅବୈଧ ପ୍ରବାସୀମାନଙ୍କ ବିରୁଦ୍ଧରେ କଠୋର କାର୍ଯ୍ୟନୁଷ୍ଠାନ ଗ୍ରହଣ କରିଛନ୍ତି। ଏହି ପରିପ୍ରେକ୍ଷିରେ ଆମେରିକାରେ ବେଆଇନ ଭାବେ ରହୁଥିବା ୨୦୫ ଜଣ ଭାରତୀୟ ପ୍ରବାସୀଙ୍କୁ ଟ୍ରମ୍ପ ଦେଶାନ୍ତର କରିଛନ୍ତି। ବୁଧବାର ଆମେରିକାର ଏକ ସାମରିକ ବିମାନରେ ୧୩ଜଣ ଶିଶୁଙ୍କ ସହ ମୋଟ୍ ୧୦୪ ପ୍ରବାସୀ ଭାରତୀୟଙ୍କୁ ନେଇ ଅମୃତସର ବିମାନ ବନ୍ଦରରେ ଅବତରଣ କରିଛନ୍ତି।
ମଙ୍ଗଳବାର ସମସ୍ତ ଯାତ୍ରୀଙ୍କୁ ନେଇ ଏକ ସି୧୭ ଆମେରିକୀୟ ସାମରିକ ବିମାନ ଟେକ୍ସସରେ ଥିବା ସାନ ଆଣ୍ଟୋନିଓ ବିମାନବନ୍ଦରରୁ ଅମୃତସର ଅଭିମୁଖେ ଉଡାଣ ଭରିଥିଲା। ବୁଧବାର ମଧ୍ୟାହ୍ନ ୧ଟା ୫୯ରେ ଅମୃତସରରେ ଥିବା ଶ୍ରୀ ଗୁରୁ ରାମ ଦାସ ଜୀ ଇଣ୍ଟରନେସନାଲ ଏୟାରପୋର୍ଟରେ ଏହି ବିମାନଟି ଅବତରଣ କରିଥିଲା। ବିମାନରେ ଥିବା ସମସ୍ତ ଯାତ୍ରୀଙ୍କୁ ପାଛୋଟି ନେବାକୁ ସ୍ଥାନୀୟ ଅଧିକାରୀ ଓ ପୋଲିସ ପ୍ରସ୍ତୁତ ହୋଇ ରହିଥିଲେ। ଆମେରିକୀୟ ଦୁତାବାସରୁ ଜଣେ ପ୍ରତିନିଧି ମଧ୍ୟ ବିମାନବନ୍ଦରରେ ଉପସ୍ଥିତ ରହିଥିଲେ।
ବିମାନରେ ଥିବା ୧୦୪ ପ୍ରବାସୀ ଭାରତୀୟଙ୍କ ମଧ୍ୟରୁ ହରିୟାନା ଓ ଗୁଜୁରାଟରୁ ୩୩ ଜଣ ଯାତ୍ରୀ ଥିବା ବେଳେ ପଞ୍ଜାବରୁ ୩୦ ଜଣ ଯାତ୍ରୀ ରହିଛନ୍ତି। ମହାରାଷ୍ଟ୍ର ଓ ଉତ୍ତରପ୍ରଦେଶରୁ ୩ଜଣ ଲେଖାଏଁ ଥିବା ବେଳେ ଚଣ୍ଡିଗଣରୁ ୨ ଜଣ ଯାତ୍ରୀ ରହିଛନ୍ତି। ସମସ୍ତ ଯାତ୍ରୀ ମାନଙ୍କ ମଧ୍ୟରୁ ଅଧିକାଂଶ ଲୋକଙ୍କୁ ମେକ୍ସିକୋ ବୋର୍ଡର ନିକଟରୁ ଗିରଫ କରାଯାଇଛି ବୋଲି ସୂଚନା ମିଳିଛି।
ପ୍ରଥମେ ବାରତକୁ ୨୦୦ ଜଣ ପ୍ରବାସୀ ଫେରୁଛନ୍ତି ବୋଲି ଜଣାପଡିଥିଲା। କିନ୍ତୁ ପରେ ୧୦୪ ଜଣ ପ୍ରବାସୀ ଭାରତୀୟ ଫେରିଥିବା ନେଇ ସ୍ପଷ୍ଟ ହୋଇଥିଲା। ତେବେ ଫେରିଥିବା ସମସ୍ତ ଭାରତୀୟ ପ୍ରବାସୀଙ୍କ ମଧ୍ୟରୁ କେହି ବି ଅପରାଧୀ ନୁହନ୍ତି। ଫେରିଥିବା ସମସ୍ତ ନାଗରିକ ଆଇନଗତ ଉପାୟରେ ଦେଶ ମଧ୍ୟକୁ ପ୍ରବେଶ ନକରି ‘ଡଙ୍କି ରୁଟ’ର ବ୍ୟବହାର କରିଥିଲେ। ଯେଉଁଥିପାଇଁ ସମସ୍ତ ପ୍ରବାସୀଙ୍କୁ ସ୍ୱଦେଶକୁ ପ୍ରତ୍ୟାବର୍ତ୍ତନ କରାଯାଉଛି ବୋଲି ଉପସ୍ଥିତ ଥିବା ଆମେରିକୀୟ ଅଧିକାରୀମାନେ ସୂଚନା ପ୍ରଦାନ କରିଛନ୍ତି।
