ଲମତାପୁଟ, ୧୨/୧୨: କୋରାପୁଟରେ ଜାରି ରହିଛି ଅପେରସନ ଗ୍ରୀନ କ୍ଳିନ । ପାଡୁଆ,ପୋଲିସ ଏବଂ କୋରାପୁଟ ଅବକାରୀ ବିଭାଗର ମିଳିତ ଭାବେ ପାଡୁଆ ଥାନା ଅଧୀନ ଚାଟୁଆ ପଞ୍ଚାୟତ ଜିରା ଗ୍ରାମ ନିକଟରେ ସ୍ଥାନୀୟ ମାଜିଷ୍ଟ୍ରେଟଙ୍କ ଉପସ୍ଥିତିରେ ପ୍ରାୟ ୩୭ ଏକର ଜମିରୁ ପ୍ରାୟ ୫୧ ହଜାର ୮୦୦ ଗଞ୍ଜେଇ ଗଛ ନଷ୍ଟ କରାଯାଇଛି ।
ଗୋଇନ୍ଦା ସୂଚନାକୁ ଆଧାର କରି କୋରାପୁଟ ଏସପିଙ୍କ ନିର୍ଦ୍ଦେଶକ୍ରମେ ଅପରେସନ ଗ୍ରୀନ କ୍ଳିନ ଜାରି ରହିଛି । ଏହି ଅଞ୍ଚଳଟି ଓଡ଼ିଶା ଓ ଆନ୍ଧ୍ରପ୍ରଦେଶର ସୀମାନ୍ତ ଅଞ୍ଚଳ ହୋଇ ଥିବା ବେଳେ ଗ୍ରାମକୁ ଲାଗି ରହିଛି ଜଲାପୁଟ ଜଳ ଭଣ୍ଡାର । ପାଣି ସୁବିଧା ଥିବାରୁ ଏଠି ବେଧଡକ ଭାବେ ଗଂଜେଇ ଚାଷ କରାଯାଉଛି । ସଚେତନତା ଅଭାବରୁ ଏଠି ଦୀର୍ଘ ବର୍ଷ ଧରି ଚାଷୀ ଗଞ୍ଜେଇ ଚାଷ କରୁଛି । ପୂର୍ବରୁ ଏହି ଅଞ୍ଚଳ ମାଓ ପ୍ରଭାବିତ ଅଞ୍ଚଳ ହୋଇଥିବାରୁ ଆଇଆରବିଏନ୍ ଫୋର୍ସ, ଜଙ୍ଗଲ ବିଭାଗ, ପାଡୁଆ ପୋଲିସ ଏବଂ କୋରାପୁଟ ଅବକାରୀ ମିଳିତ ଉଦ୍ୟମରେ ଏହି ଅପରେସନ୍ କରାଯାଇଛି । ସକାଳ ୯ ଟା ଠାରୁ ଆରମ୍ଭ ହୋଇ ଏହି ଅପରେସନ ସନ୍ଧ୍ୟା ୫ଟା ପର୍ଯ୍ୟନ୍ତ ଜାରି ରହି ଥିଲା । ଏହି ଗଞ୍ଜେଇ ଚାଷ ଜଙ୍ଗଲ ଜମିରେ କରା ଯାଇଛି । କିଏ କିଏ ଏହି ଜମିରେ ଚାଷ କରିଥିଲେ ତଦନ୍ତ ପରେ ସେହି ଚାଷୀଙ୍କ ବିରୁଦ୍ଧରେ ମାମଲା ରୁଜୁ କରା ଯିବା ନେଇ ସୂଚନା ଦେଇଛନ୍ତି ନନ୍ଦପୁର ଏସଡିପିଓ ।
