ନୟାଗଡ, ୧୦।୨ : ନୟାଗଡ ଜିଲ୍ଲା ଗଣିଆ ଥାନା ଉପରହଦପଶି ଗାଁର ଚରଣ ବେହେରା ହତ୍ୟାକାଣ୍ଡ ଘଟଣାର ପର୍ଦ୍ଦ।ଫାଶ କରିଛି ନୟାଗଡ ପୋଲିସ । ଏହି ଘଟଣାରେ ୨ ଜଣଙ୍କୁ ଗିରଫ କରାଯାଇଥିବାବେଳେ ଅନ୍ୟ ଜଣେ ଏବେବି ଫେରାର୍ ଅଛି । ଜମିଜମା ବିବାଦକୁ କେନ୍ଦ୍ର କରି ପିଣ୍ଟୁ ବେହେରା, ମାନସ ଡାଙ୍ଗୁଆ ଓ ଜିତେନ୍ଦ୍ର ଡାଙ୍ଗୁଆ ଚରଣଙ୍କୁ ହତ୍ୟା କରିଥିବା ଅତିରିକ୍ତ ଏସ୍ପି କହିଛନ୍ତି । ୩ ଅଭିଯୁକ୍ତଙ୍କ ମଧ୍ୟରୁ ପିଣ୍ଟୁ ଓ ମାନସକୁ ପୋଲିସ ଗିରଫ କରିଥିବାବେଳେ ଜିତେନ୍ଦ୍ର ଫେରାର୍ ରହିଛି ।
ନୟାଗଡ ଜିଲ୍ଲା ଗଣିଆ ଥାନା ହଦପଶି ଗାଁର ଚରଣ ବେହେରା ଗତ ୩୦ତାରିଖ ଅପରାହ୍ନ ୪ଟା ପରଠାରୁ ନିଖୋଜ ଥିଲେ । ନିଖୋଜର ପରଦିନ ବହୁ ଖୋଜାଖୋଜି ପରେ ଗାଁ ରାସ୍ତାର ଏକ ବିଲ ମଧ୍ୟରେ ପ୍ରବଳ ରକ୍ତ ପଡିଥିବା ଏବଂ ସେହି ସ୍ଥାନରେ ଚରଣଙ୍କ ଏଟିଏମ୍. କାର୍ଡ , କିଛି ଚପଲ. ମଦ ବୋତଲ ଓ ଘୋଷଡା ଦାଗ ପଡିଥିଲା। ଏହା ଦେଖିବା ପରେ ଚରଣଙ୍କୁ ହତ୍ୟା କରାଯାଇଥିବା ପରିବାର ଲୋକଙ୍କ ସନ୍ଦେହ ହୋଇଥିଲା । ଏନେଇ ପରିବାର ଲୋକ ୩୧ତାରିଖରେ ଗଣିଆ ଥାନାରେ ଅଭିଯୋଗ କରିଥିଲେ । ଅଭିଯୋଗ ପାଇବା ପରେ ପୋଲିସ ୩ଟି ଟିମ୍ ଗଠନ କରି ତଦନ୍ତ କରିଥିଲା। ଘଟଣାର ୭ଦିନ ପରେ ପ୍ରଥମେ ପିଣ୍ଟୁକୁ ପୋଲିସ ଗିରଫ କରିଥିଲା। ତାଙ୍କୁ ପଚରାଉଚରା ପରେ କନ୍ଧମାଳ ଜିଲ୍ଲା ଖଜୁରିପଡା ଜଙ୍ଗଲରୁ ଚରଣଙ୍କ ମୃତଦେହ ପୋଲିସ ଉଦ୍ଧାର କରିଥିଲା । ପରେ ଅନ୍ୟଜଣେ ଅଭିଯୁକ୍ତ ମାନସକୁ ପୋଲିସ ଗିରଫ କରିଛି ।
୩ ଅଭିଯୁକ୍ତ ଚରଣଙ୍କ ସହ ମିଶି ମଦ୍ୟପାନ କରୁଥିଲେ। ଏହି ସମୟରେ ପୂର୍ବ ଜମିଜମା ବିବାଦକୁ ସମାଧାନ କରିବା ପାଇଁ ଚରଣଙ୍କୁ ସେମାନେ କହିଥିଲେ । ସେ ଏଥିରେ କିନ୍ତୁ ରାଜି ହୋଇ ନ ଥିଲା। ୩ଜଣ ମିଶି ଚରଣଙ୍କୁ କାଠ ଫାଳିଆରେ ପିଟି ହତ୍ୟା କରିଥିଲେ। ପରେ ଏକ ଆଇଚର୍ ଗାଡିରେ ମୃତଦେହକୁ ନେଇ ଖଜୁରିପଡା ଜଙ୍ଗଲରେ ଫିଙ୍ଗିଥିବା ଦୁଇ ଅଭିଯୁକ୍ତ ସ୍ଵୀକାର କରିଥିବା ଅତିରିକ୍ତ ଏସପି କହିଛନ୍ତି ।
