ଭୁବନେଶ୍ୱର,୦୬/୧୦: ସାରା ବିଶ୍ୱ ପାଇଁ ଜଳବାୟୁ ପରିବର୍ତ୍ତନ ହେବ ବଡ଼ ବିପଦ ହୋଇ ଛିଡ଼ା ହେଲାଣି । ଏହାର ମୁକାବିଲା ପାଇଁ ଓଡ଼ିଶା ରାଜ୍ୟ ବିପର୍ଯ୍ୟୟ ପରିଚାଳନା କର୍ତ୍ତୃପକ୍ଷ (ଓସ୍ଡମା) ଅଣ୍ଟା ଭିଡ଼ିଛି । ଏଥିପାଇଁ ଓସ୍ଡମାର ହେବ ନବକଳେବର । ବଦଳିବ ଢାଞ୍ଚା । ଖୋଲିବ ୪ ନୂଆ ଡିଭିଜନ । ବଢ଼ିବେ ମାନବ ସମ୍ବଳ । ସୃଷ୍ଟି ହେବ ୩୭ ନୂଆ ପଦବୀ ।
୧୯୯୯ ମହାବାତ୍ୟାରେ ଓଡ଼ିଶା ଧ୍ୱସ୍ତବିଧ୍ୱସ୍ତ ହୋଇଥିଲା । ଜୀବନ ହରାଇଥିଲେ ୧୦ ହଜାରରୁ ଅଧିକ । କ୍ଷୟକ୍ଷତି ଆକଳନଠାରୁ ଢେର ଅଧିକ ଥିଲା । ଏହା ପରବର୍ତ୍ତୀ ବିପର୍ଯ୍ୟୟ ମୁକାବିଲା ପାଇଁ ଓସ୍ଡମା ଗଢ଼ି ଓଡ଼ିଶା ସାରା ଦେଶକୁ ଦେଇଥିଲା ମଡେଲ୍ । ପରବର୍ତ୍ତୀ ସମୟରେ ଯେତେ ବାତ୍ୟା, ବାତ୍ୟା ଓଡ଼ିଶା ମୁହାଁ ହୋଇଛି, ଓସ୍ଡମା ଦେଖାଇଛି ଦକ୍ଷତା । ପୂର୍ବରୁ ବିପର୍ଯ୍ୟୟ ମୁକାବିଲା ପାଇଁ ପ୍ରାକ୍ ପ୍ରସ୍ତୁତି କରିବାକୁ ପଡ଼ୁଥିଲା । ଏବେ ଅଚାନକ ବିପଦ ମାଡ଼ି ଆସୁଛି । ତେଣୁ ପୁରୁଣା ଢାଞ୍ଚା ଛାଡ଼ି ଏବେ ନୂଆ ଢାଞ୍ଚା ଆଣିବ ଓସ୍ଡମା । ଜାତୀୟ ବିପର୍ଯ୍ୟୟ ମୁକାବିଲା ଢାଞ୍ଚାରେ ଜଳବାୟୁ ପରିବର୍ତ୍ତନ ମୁକାବିଲା ପାଇଁ ନୂଆ ନୂଆ ଜ୍ଞାନ କୌଶଳ ଉପଯୋଗ କରାଯିବ ।
ଏଥିପାଇଁ ମାନବ ସମ୍ବଳର ଦକ୍ଷତା ବୃଦ୍ଧି କରାଯିବ । ୪ଟି ଡିଭିଜନ ମଧ୍ୟରେ ଜେନେରାଲ ଡିଭିଜନ, କାର୍ଯ୍ୟ ଦକ୍ଷତା ବୃଦ୍ଧି, ପ୍ରକଳ୍ପ ଓ ବୈଷୟିକ ଜ୍ଞାନ କୌଶଳ, ଅର୍ଥ ଡିଭିଜନ ରହିବ । ପ୍ରତି ଡିଭିଜନରେ ଜଣେ ଲେଖାଏଁ ନିର୍ବାହୀ ନିର୍ଦ୍ଦେଶକ (ଆଇଏଏସ୍ କିମ୍ବା ଓଏଏସ୍) ରହିବେ । ପ୍ରତି ବିଭାଗରେ ବୈଷୟିକ ଜ୍ଞାନ ଥିବା ବିଶେଷଜ୍ଞ, କନସଲଟାଣ୍ଟ ନିଯୁକ୍ତ ହେବେ । ପ୍ରକଳ୍ପ ଓ ବୈଷୟିକ ଜ୍ଞାନ କୌଶଳ ଡିଭିଜନର ନିର୍ବାହୀ ନିର୍ଦ୍ଦେଶକ ଜଣେ ଯନ୍ତ୍ରୀ ରହିବେ, ଯିଏକି ରାଜ୍ୟ ସରକାରଙ୍କ ଯନ୍ତ୍ରୀ ହୋଇଥିବେ କିମ୍ବା କେନ୍ଦ୍ର ଟେଲିକମ ବିଭାଗରୁ ଆସିବେ । ଅର୍ଥ ବିଭାଗର ନିର୍ବାହୀ ନିର୍ଦ୍ଦେଶକ ଓଏଫଏସ୍ ପାହ୍ୟାରେ ହେବେ । ବର୍ତ୍ତମାନ ଓଏସ୍ଡମାରେ ୧୦୨ଜଣ କର୍ମଚାରୀ ଅଛନ୍ତି । ଏଥିରୁ ୧୦ଟି ପଦବୀ ଉଚ୍ଛେଦ ହେବ । ୩୭ଟି ନୂଆ ପଦବୀ ସୃଷ୍ଟି କରାଯିବା ସହ ମୋଟ ପଦବୀ ସଂଖ୍ୟା ୧୨୯ ହେବ।