ନୂଆଦିଲ୍ଲୀ, ୨୬।୭: ପିଲାଙ୍କଠୁ ନେଇ ଯୁବପିଢ଼ି ସମସ୍ତେ ଭିଡିଓ ଗେମ୍ ଖେଳିବାକୁ ପସନ୍ଦ କରନ୍ତି । ନିଜ ସୁବିଧା ମୁତାବକ କିଏ ଘଣ୍ଟେ କିମ୍ୱା ୨ ଘଣ୍ଟା ଖେଳିଥାନ୍ତି ଭିଡିଓ ଗେମ୍ । ନିକଟରେ ନାଇଜେରିଆର ଓସାଇଡ୍ ଓଲୁଓଲେ ନାମକ ଜଣେ ୨୪ ବର୍ଷୀୟ ଯୁବକ ଲଗାତାର ୨୪ ଗଣ୍ଟା ଧରି ଭିଡିଓ ଗେମ୍ ଖେଳି ବିଶ୍ୱ ରେକର୍ଡ କରିଛନ୍ତି । ଓସାଇଡ୍ କାର୍ ଡିଲର୍ ଭାବେ କାମ କରନ୍ତି । ଏହା ପୂର୍ବରୁ ଏହି ରେକର୍ଡ ଡେଭିଡ୍ ହ୍ୱାଇଟ୍ପୁଟ୍ଙ୍କ ନାମରେ ଥିଲା । ସେ ୨୦୨୨ ମସିହାରେ ଲଗାତାର ୫୦ ଘଣ୍ଟା ଧରି ଭିଡିଓ ଗେମ୍ ଖେଳି ଏହି ରେକର୍ଡ କରିଥିଲେ ।
ତେବେ ଓସାଇଡ୍ ସ୍ଥାନୀୟ ଏକ ହସ୍ପିଟାଲ ପାଇଁ ପାଣ୍ଠି ସଂଗ୍ରହ କରିବା ଉଦ୍ଦେଶ୍ୟରେ ଏହି ରେକର୍ଡ କରିବାକୁ ପ୍ରୟାସ ଚଳାଇଥିଲେ । ତାଙ୍କ ପୂର୍ବରୁ ଭିଡିଓ ଗେମ୍ରେ ରେକର୍ଡ କରିଥିବା ଲୋକେ ଫିଫା କିମ୍ୱା ପ୍ରୋ ଇଭୋଲ୍ୟୁସନ୍ ସକର୍ ଗେମ୍ ଖେଳି ରେକର୍ଡ କରିଥିଲେ । ଓସାଇଡ୍ ନିଜ ଆଇଫୋନ୍ରେ ଡ୍ରିମ୍ ଲିଗ୍ ସକ୍କର ୨୦୨୩ ଗେମ୍ ଖେଳିଥିଲେ । ସେ ଏହାକୁ ଟିଭି ସହିତ ସଂଯୋଗ କରିଥିଲେ । ୨୦୧୬ ମସିହାରେ ସେ ଏହି ସିମ୍କୁ ଡାଉନଲୋଡ୍ କରିଥିଲେ । ସେବେଠାରୁ ସେ ଏହାକୁ ଖେଳି ଆସୁଥିଲେ । ରେକର୍ଡ କରିବା ପାଇଁ ଅଭ୍ୟାସ କରୁଥିବା ସମୟରେ ସେ ପାଖାପାଖି ୫୦୦ ମ୍ୟାଚ୍ ଖେଳିଥିଲେ । ସେହିପରି ରେକର୍ଡର ନିୟମ ଅନୁଯାୟୀ, ଭିଡିଓ ଗେମ୍ ଖେଳିବା ସମୟରେ ତାଙ୍କୁ ପ୍ରତି ଘଣ୍ଟାଏରେ ୫ ମିନିଟ୍ ବିରତି ଦିଆଯାଉଥିଲା । ସେହି ସମୟକୁ ସେ ଭୋଜନ କରିବା, ଶୌଚାଳୟ ଯିବା ଆଦି କାର୍ଯ୍ୟରେ ଉପଯୋଗ କରୁଥିଲେ । ତାଙ୍କ କହିବାନୁଯାୟୀ, ସେ ମାତ୍ର କିଛି ସମୟର ବିରତି ନେଇ ଅବିରତ ୭୫ ଘଣ୍ଟା ଗେମ୍ ଖେଳିବାର ଆନନ୍ଦ ନେଇଥିଲେ । ତେବେ ଏହି ରେକର୍ଡ କରିବା ଏତେ ସହଜ ନଥିଲା ବୋଲି ଓସାଇଡ୍ କହିଥିଲେ ।