ନୂଆଦିଲ୍ଲୀ: ଗୁରୁବାର (ଅକ୍ଟୋବର ୨୪) ପୃଥିବୀ ସହ ନିକଟତର ହେବ ୬ ଆଷ୍ଟ୍ରଏଡ୍ । ଆମେରିକୀୟ ମହକାଶ ଗବେଷଣା ସଂସ୍ଥା (ନାସା) ଏହି ୬ଟି ଆଷ୍ଟ୍ରଏଡ୍କୁ ଚିହ୍ନଟ କରିଛି । ଏହି ସବୁ ଆଷ୍ଟ୍ରଏଡ୍ ମଧ୍ୟରେ ସବୁଠାରୁ ବଡ଼ ଆଷ୍ଟ୍ରଏଡ୍ର ଦୈର୍ଘ୍ୟ ପ୍ରାୟ ୫୮୦ ଫୁଟ୍ ହେବ ବୋଲି ଜଣାପଡ଼ିଛି । ଯଦିଓ ଏସବୁ ଆଷ୍ଟ୍ରଏଡ୍ ପୃଥିବୀ ପ୍ରତି କୌଣସି ବିପଦ ସୃଷ୍ଟି କରିବ ନାହିଁ, ତଥାପି ପୃଥିବୀର ନିକଟତର ହେଉଥିବା ମହାଜାଗତିକ ବସ୍ତୁ ସଂପର୍କରେ ଗବେଷଣା କରିବାକୁ ବୈଜ୍ଞାନିକମାନଙ୍କୁ ସୁଯୋଗ ମିଳିବ ।
ଯେଉଁସବୁ ଆଷ୍ଟ୍ରଏଡ୍ ପୃଥିବୀ ନିକଟରେ ଗତି କରିବାକୁ ଅଛି ସେସବୁ ପ୍ରାୟ ୪.୬ ବିଲିୟନ୍ ବର୍ଷ ପୂର୍ବରୁ ସୃଷ୍ଟି ହୋଇଥିଲା । ଆମ ସୌରଜଗତ ସୃଷ୍ଟି ହେବା ପୂର୍ବରୁ ଏସବୁର ସୃଷ୍ଟି ହୋଇଥିଲା ବୋଲି ନାସା ବୈଜ୍ଞାନିକମାନେ ଦାବି କରିଛନ୍ତି । ୬ ଆଷ୍ଟ୍ରଏଡ୍ ମଧ୍ୟରୁ ପୃଥିବୀର ଅଧିକ ନିକଟ ଦେଇ ଗତି କରିବ ୨୦୨୩ TG14 । ପୃଥିବୀର ବାୟୁମଣ୍ଡଳରୁ ପ୍ରାୟ ୨.୫ ମିଲିୟନ୍ କିଲୋମିଟର ଦୂରରେ ଅତିକ୍ରମ କରିବ ଏହି ଆଷ୍ଟ୍ରଏଡ୍ । ଏହାର ବ୍ୟାସ ୧୮ରୁ ୪୧ ମିଟର ମଧ୍ୟରେ ହୋଇଥିବା ବେଳେ ଏହା ୬.୯ କିଲୋମିଟର ପ୍ରତି ସେକେଣ୍ଡ ବେଗରେ ଅତିକ୍ରମ କରିବ ।
ଛ’ଟି ଆଷ୍ଟ୍ରଏଡ୍ ମଧ୍ୟରୁ ସବୁଠାରୁ ବଡ଼ ହେଉଛି ୩୬୩୩୦୫ (୨୦୦୨ NV 16) । ଏହାର ବ୍ୟାସ ୫୮୦ ଫୁଟ୍ ହୋଇଥିବା ବେଳେ ଏହି ଆଷ୍ଟ୍ରଏଡ୍ ପୃଥିବୀ ପୃଷ୍ଠରୁ ୪.୫ ମିଲିୟନ୍ କିଲୋମିଟର ଦୂରରେ ଅତିକ୍ରମ କରିବ । ଏହି ସମୟରେ ୪.୮୭ କିଲୋମିଟର ପ୍ରତି ସେକେଣ୍ଡ ବେଗରେ ଗତି କରିବ ୨୦୦୨ NV 16 । ଏହା ବ୍ୟତୀତ 2015 HM1 ଆଷ୍ଟ୍ରଏଡ୍ ୧୦.୮୮ କିଲୋମିଟର ପ୍ରତି ସେକେଣ୍ଡ ବେଗରେ ପୃଥିବୀ ଉପର ଦେଇ ଗତି କରିବ । ସେହିଭଳି ଅନ୍ୟ ୩ ଆଷ୍ଟ୍ରଏଡ୍ 2024 TP17, 2024 TR6 ଏବଂ 2021 UE2 ପୃଥିବୀର ନିକଟତର ହେବ ବୋଲି ନାସା ଆକଳନ କରିଛି । ଏସବୁ ଆଷ୍ଟ୍ରଏଡ୍ ପୃଥିବୀ ପ୍ରତି ବିପଦ ସୃଷ୍ଟି କରିବ ନାହିଁ । କିନ୍ତୁ ଏସବୁର ତଥ୍ୟ ଭବିଷ୍ୟତରେ ପୃଥିବୀ ପ୍ରତି ଥିବା ସମ୍ଭାବ୍ୟ ବିପଦ ସଂପର୍କରେ ଜାଣିବାକୁ ବୈଜ୍ଞାନିକଙ୍କୁ ସକ୍ଷମ କରିବ ବୋଲି କୁହାଯାଉଛି ।