ନୂଆଦିଲ୍ଲୀ, ୨୩।୧୦: ଦିନକୁ ଦିନ ବୃଦ୍ଧି ପାଉଛି ବିଶ୍ୱର ତାପମାତ୍ରା । କ୍ଲାଇମେଟ ଚେଞ୍ଜ ସମସ୍ୟା କ୍ରମାଗତ ଭାବେ ବଢ଼ିବାରେ ଲାଗିଥିବା ବେଳେ ଏହାର ସମାଧାନ କରିବା ମିଳିତ ଜାତିସଂଘ ପାଇଁ ଏକ ବଡ଼ ଚ୍ୟାଲେଞ୍ଜ ଭାବେ ଉଭା ହୋଇଛି । ଯାହାକୁ ନେଇ ଚିନ୍ତାରେ ବୈଜ୍ଞାନିକ । ତେବେ ଏହି ସମସ୍ୟାର ସମାଧାନ ପାଇଁ ବୈଜ୍ଞାନିକମାନେ ରିସର୍ଚ୍ଚ କରି ଏକ ଆଶ୍ଚର୍ଯ୍ୟଜନକ ଖୁଲାସା କରିଛନ୍ତି । ଏହାର ସମାଧାନ ପାଇଁ ଏକ ଉପାଦାନକୁ ବିକଳ୍ପ ଭାବେ ବାଛିଛନ୍ତି ବୈଜ୍ଞାନିକ । ଯାହାକୁ ଉପଯୋଗ କରି ହ୍ରାସ ହେବ ବାୟୁମଣ୍ଡଳରେ ତାପମାତ୍ରା । ଏବେ ବାୟୁମଣ୍ଡଳ ତାପମାତ୍ରା ହ୍ରାସ କରିବାରେ ସହାୟକ ହେବ ହୀରା । ହୀରା ଗୁଣ୍ଡକୁ ଉପଯୋଗ କରି ପୃଥିବୀର ତାପମାତ୍ରା ହ୍ରାସ କରିହେବ ବୋଲି କହିଛନ୍ତି ବୈଜ୍ଞାନିକ ।   

ବୈଜ୍ଞାନିକଙ୍କ କହିବାନୁସାରେ, ପୃଥିବୀର ବାୟୁମଣ୍ଡଳରେ ଯଦି ପ୍ରତିବର୍ଷ ଲକ୍ଷ ଲକ୍ଷ ଟନ୍ ହୀରା ଗୁଣ୍ଡ ବା ଡଷ୍ଟ ଛିଞ୍ଚାଯାଏ, ତେବେ ପୃଥିବୀର ତାପମାତ୍ରା ଥଣ୍ଡା ହୋଇପାରେ । ଇନଷ୍ଟିଚ୍ୟୁଟ୍ ଫର୍ ଆଟମୋସଫିଅରିକ୍ ଆଣ୍ଡ କ୍ଲାଇମେଟ୍ ସାଇନ୍ସ ଆଟ୍ ETH Zurich ରିପୋର୍ଟରେ ପ୍ରକାଶିତ ଏହି ତଥ୍ୟ ଅବିଶ୍ୱସନୀୟ ଲାଗୁଥାଇଥାରେ, ମାତ୍ର ଏହା ପ୍ରଥମ ଥର ଘଟୁନାହିଁ । ଏହା ପୂର୍ବରୁ ମଧ୍ୟ ଅନେକ କମ୍ପାଉଣ୍ଡ ଯେପରିକି ସଲଫର୍, ଆଲୁମିନିୟମ୍ ଓ ସିଲିକନର ଉପଯୋଗ କରି ଏହି ସମସ୍ୟାକୁ ସମାଧାନ କରିବା ନେଇ ପ୍ରସ୍ତାବ ଦିଆଯାଇଥିଲା । ହୀରାର ଧୂଳି ବା ଅନ୍ୟ କୌଣସି କମ୍ପାଉଣ୍ଡକୁ ଛିଞ୍ଚା ଯିବା ଦ୍ୱାରା ସୂର୍ଯ୍ୟରୁ ଆସୁଥିବା ରେଡିଏସନକୁ ପୁଣି ଥରେ ମହାକାଶକୁ ପଠାଇବା ସମ୍ଭବ ହୋଇପାରେ । ଏହାଫଳରେ ପୃଥିବୀର ବର୍ଦ୍ଧିତ ତାପମାତ୍ରାରେ ହ୍ରାସ ଘଟିପାରେ । ସୋଲାର ରେଡିଏସନ ମ୍ୟାନେଜମେଣ୍ଟ (ଏସଆରଏମ) ମାଧ୍ୟମରେ ସୂର୍ଯ୍ୟରୁ ଆସୁଥିବା ରେଡିଏସନକୁ ପୁନର୍ବାର ମହାକାଶକୁ ପଠାଯାଇପାରେ । ଏହାଦ୍ୱାରା ସୂର୍ଯ୍ୟ କିରଣକୁ ପୃଥିବୀ ପର୍ଯ୍ୟନ୍ତ ପହଞ୍ଚିବାକୁ ରୋକାଯାଇପାରିବ । ଏ ପ୍ରକାର ସମାଧାନକୁ ସାଧାରଣ ଭାବେ ଜିୟୋ-ଇଞ୍ଜିନିୟରିଂ କୁହାଯାଏ । ଏଥିରେ ବାୟୁମଣ୍ଡଳୀୟ ପ୍ରକ୍ରିୟାଗୁଡ଼ିକୁ ନିୟନ୍ତ୍ରିତ କରି ପରିବେଶୀୟ ସମସ୍ୟାର ସମାଧାନ କରାଯାଇଥାଏ । ଅନ୍ୟ କମ୍ପାଉଣ୍ଡ ଅପେକ୍ଷା ହୀରାର ଗୁଣ୍ଡ ଏହି କାମକୁ ଅଧିକ ପ୍ରଭାବୀ ଢଙ୍ଗାରେ କରିପାରେ । 

ପୂର୍ବରୁ ଯେଉଁସବୁ ଉପାଦାନଗୁଡ଼ିକୁ ବିଚାର କରାଯାଇଥିଲା, ସେଗୁଡ଼ିକଠାରୁ ହୀରାର ଗୁଣ୍ଡ ଅଧିକ ପ୍ରଭାବଶାଳୀ ବୋଲି ରିସର୍ଚ୍ଚରେ ଜଣାପଡ଼ିଛି । ବର୍ତ୍ତମାନ ସୁଦ୍ଧା ଗ୍ଲୋବାଲ ୱାର୍ମିଂକୁ ରୋକିବା ପାଇଁ ଯେଉଁସବୁ ଉପାୟ ଆପଣାଯାଇଛି, ସେଗୁଡ଼ିକ ପର୍ଯ୍ୟାପ୍ତ ବୋଲି ପ୍ରମାଣିତ ହୋଇନାହିଁ । ହୀରାର ଧୂଳିକୁ ଉପଯୋଗ କରି ୧.୬ ଡିଗ୍ରୀ ସେଲସିୟସ୍ ପର୍ଯ୍ୟନ୍ତ ତାପମାତ୍ରା କମିପାରେ ବୋଲି ଜିୟୋଫିଜିକାଲ ରିସର୍ଚ୍ଚରେ ରିପୋର୍ଟ ପ୍ରକାଶ ପାଇଛି । ମାତ୍ର, ଏହି ଉପଲବ୍ଧି ହାସଲ କରିବା ପାଇଁ ପ୍ରତିବର୍ଷ ପାଖାପାଖି ୫ ମିଲିୟନ ଟନ୍ ହୀରାର ଗୁଣ୍ଡକୁ ବାୟୁମଣ୍ଡଳରେ ଛିଞ୍ଚିବାକୁ ପଡ଼ିବ । ଜାଣି ଆଶ୍ଚର୍ଯ୍ୟ ହେବେ, ଏଥିପାଇଁ ୧୬୮ ହଜାର କୋଟିରୁ ଉର୍ଦ୍ଧ୍ୱ ଖର୍ଚ୍ଚ ହେବ । ତେବେ ଏହାକୁ ଲାଗୁ କରିବାରେ ଅତ୍ୟାଧୁନିକ ଜ୍ଞାନକୌଶଳ ଓ ଖର୍ଚ୍ଚ ସମ୍ବନ୍ଧୀୟ ଚ୍ୟାଲେଞ୍ଜକୁ ସାମ୍ନା କରିବାକୁ ପଡ଼ିପାରେ । ହୀରାର ଧୂଳି ଛିଞ୍ଚିବା ଦ୍ୱାରା ପ୍ରାକୃତିକ ପ୍ରକ୍ରିୟାରେ ହସ୍ତକ୍ଷେପ ହୋଇପାରେ । ତେଣୁ ଏହି ଅପ୍ରତ୍ୟାଶିତ ଫଳାଫଳ ବିଶ୍ୱସ୍ତରରେ ଓ କ୍ଷେତ୍ରୀୟ ସ୍ତରରେ ମୌସୁମୀ ପ୍ରଣାଳୀ ଓ ବର୍ଷା ବିତରଣକୁ ପ୍ରଭାବିତ କରିପାରେ । ଏଥିସହିତ ପ୍ରାକୃତିକ ସୌରରଶ୍ମିରେ ପରିବର୍ତ୍ତନ ହେବା ଦ୍ୱାରା ତାହା ଚାଷ ଉପରେ ପ୍ରଭାବ ପକାଇବା ସହ ଜୀବନ ପାଇଁ ମଧ୍ୟ ହାନିକାରକ ହୋଇପାରେ ।