ନୂଆଦିଲ୍ଲୀ,୨୩।୧୦: ଗୁଜରାଟର ସାବରମତି ଜେଲରେ ଥିବା ଗ୍ୟାଙ୍ଗଷ୍ଟର ଲରେନ୍ସ ବିଷ୍ଣୋଇ ସଲମାନ ଖାନ୍ଙ୍କୁ ହତ୍ୟା କରିବାର ଧମକ ଦେଉଛି। ବାବା ସିଦ୍ଧକିଙ୍କ ହତ୍ୟା ପରେ ସଲମାନଙ୍କ ସୁରକ୍ଷା ଆହୁରି କଡାକଡି କରି ଦିଆଯାଇଛି। ଏବେ ଲରେନ୍ସର ଦାଦା ପୁଅ ଭାଇ ରମେଶ ବିଷ୍ଣୋଇ ସଲମାନଙ୍କୁ କୃଷ୍ଣସାର ମୃଗ ଶିକାର କରିବା ମାମଲାରେ କ୍ଷମା ମାଗିବାକୁ କହିଛନ୍ତି। ସେ ଦାବି କରିଛନ୍ତି, ଏହି ମାମଲାରେ ପୁରା ବିଷ୍ଣୋଇ ସମାଜ ଲରେନ୍ସ ବିଷ୍ଣୋଇ ସହ ଠିଆ ହୋଇ ରହିଛି। ରମେଶ କହିଛନ୍ତି, ସଲମାନ ଖାନ୍ଙ୍କୁ କ୍ଷମା ମାଗିବା ଦରକାର। ତାଙ୍କର ପରିବାର ଆମ ଧାର୍ମିକ ଭାବନା ସହ ଖେଳୁଛି। ଯଦି ସଲମାନ କ୍ଷମା ନମାଗନ୍ତି ତେବେ ଆଇନ ନିଜର କାମ କରିବ ।’
ଏନ୍ଡିଟିଭି ସହ ଆଲୋଚନା ବେଳ ରମେଶ କହିଛନ୍ତି, ବିଷ୍ଣୋଇ ସମ୍ପ୍ରଦାୟର ସବୁ ସଦସ୍ୟ ତାଙ୍କ ଉପରେ ଅସନ୍ତୁଷ୍ଟ ଅଛନ୍ତି, ଯେତେବେଳେ କୃଷ୍ଣସାର ମୃଗ ଶିକାର ହୋଇଥିଲା। ସେମାନେ ପଶୁପକ୍ଷୀଙ୍କୁ ବଞ୍ଚାଇବା ପାଇଁ ବଳିଦାନ ଦେବାକୁ ପ୍ରସ୍ତୁତ। ଆମ ସମାଜ ଗଛ ଓ ବନ୍ୟ ଜନ୍ତୁଙ୍କୁ ଖୁବ୍ ଭଲପାଏ। ୩୬୩ ପୂର୍ବଜ ଗଛକୁ ବଞ୍ଚାଇବା ପାଇଁ ନିଜର ଜୀବନ ଦେଇଥିଲେ। ଯେତେବେଳେ ସଲମାନ କୃଷ୍ଣସାର ମୃଗ ଶିକାର କରିଥିଲେ ପ୍ରତ୍ୟେକ ବିଷ୍ଣୋଇଙ୍କ ରକ୍ତ ଗରମ ହୋଇଯାଇଥିଲା।
ରମେଶ କହିଛନ୍ତି, ସଲମାନ ଖାନ୍ଙ୍କ ପରିବାର ବିଷ୍ଣୋଇ ସମାଜକୁ ଟଙ୍କା ଅଫର କରିଥିଲା, କିନ୍ତୁ ସମାଜ ନେବାକୁ ମନା କରିଦେଇଥିଲା। ଉଲ୍ଲେଖନୀୟ ଯେ, ସଲମାନ ଖାନ୍ ୧୯୯୮ ରେ ହମ୍ ସାଥ୍ ସାଥ୍ ହୈ ଫିଲ୍ମର ସୁଟିଂ ପାଇଁ ଯୋଦ୍ଧପୁରରେ ଥିଲେ। ଏହି ସମୟରେ ତାଙ୍କ ଉପରେ କୃଷ୍ଣସାର ମୃଗ ଶିକାର କରିବାର ଅଭିଯୋଗ ରହିଛି। ପରେ ରାଜସ୍ଥାନ ହାଇକୋର୍ଟ ତାଙ୍କୁ ଦୋଷୀ ସାବ୍ୟୖସ୍ତ କରି ୫ ବର୍ଷ ଜେଲ ଦଣ୍ଡ ପ୍ରଦାନ କରିଥିଲେ। ପରେ ଏହି ମାମଲା ସୁପ୍ରିମକୋର୍ଟରେ ପହଁଞ୍ଚିଥିଲା ଓ ପରେ ସଲମାନଙ୍କୁ ଜାମିନ ମିଳିଥିଲା। ତେବେ ତାଙ୍କୁ କିଛି ସମୟ ଜେଲ୍ରେ ରହିବାକୁ ପଡିଥିଲା।
