ଭୁବନେଶ୍ୱର,୨୨/୧୦: ରାଜ୍ୟ ବିଜେପିର ହେବ ନବକଳେବର । ଦଳର ପରବର୍ତ୍ତୀ ରାଜ୍ୟ ସଭାପତି କିଏ? ଏହା ଏବେ ବିଜେପି ସହ ରାଜ୍ୟ ରାଜନୀତି ପାଇଁ ବଡ଼ ପ୍ରଶ୍ନ । ଦିନ ଯେତିକି ପାଖେଇ ଆସୁଛି ସଭାପତି ମନମୋହନ ସାମଲଙ୍କ ପରେ କିଏ ଦଳର ମଙ୍ଗ ଧରିବ ତା’କୁ ନେଇ ଚର୍ଚ୍ଚା ସେତିକି ଜୋର ଧରୁଛି । ବିଭିନ୍ନ ନେତାଙ୍କ ନାଁ ଆଲୋଚନା ହେଉଥିଲା ବେଳେ ସବୁକିଛି ନିର୍ଭର କରୁଛି କେନ୍ଦ୍ରୀୟ ନେତୃତ୍ୱ ଉପରେ । ଆସନ୍ତା ଜାନୁଆରୀରେ ବିଜେପି ରାଷ୍ଟ୍ରୀୟ ସଭାପତି ନିର୍ବାଚନ ଥିବାରୁ ଡିସେମ୍ବର ସୁଦ୍ଧା ଓଡ଼ିଶା ବିଜେପି ନୂଆ ସଭାପତି ପାଇବା ଏକରକମ ନିଶ୍ଚିତ ବୋଲି ଦଳ ସୂତ୍ରରୁ ଜଣାପଡ଼ିଛି ।
ବିଜେପି ଏବେ ରାଜ୍ୟରେ କ୍ଷମତାକୁ ଆସିଛି । ଦୀର୍ଘମିଆଦି ଭିତ୍ତିରେ ରାଜ୍ୟରେ କ୍ଷମତାରେ ରହିବାକୁ କେନ୍ଦ୍ରୀୟ ବିଜେପି ସାଂଗଠନିକ ବିସ୍ତାରକୁ ଗୁରୁତ୍ୱ ଦେଉଛି । ବୁଥ୍ସ୍ତରରୁ ସଂଗଠନକୁ ବଳୁଆ କରିବାକୁ ମଧ୍ୟ ଦଳ ଯୋଜନା କରୁଛି । ସଂଗଠନ ଓ ସରକାର ସମନ୍ୱୟ ରକ୍ଷା କରି ଚାଲିବାକୁ ନୂଆଦିଲ୍ଲୀରୁ ନିର୍ଦ୍ଦେଶ ଜାରି ହୋଇଛି । ସଂଗଠନକୁ ଦଳ ଅଧିକ ଗୁରୁତ୍ୱ ଦେଉଥିବାରୁ ଦଳର ସଭାପତି ପଦ ଉପରେ ଏବେ ବହୁ ନେତା ଆଖି ପକାଇଛନ୍ତି । ଦଳରେ କିନ୍ତୁ ୨/୩ଟି ଗୋଷ୍ଠୀ ନିଜ ସପକ୍ଷରେ ଓକିଲାତି କରୁଛନ୍ତି । ମାତ୍ର କାହା ମୁଣ୍ଡରେ ହାଇକମାଣ୍ଡ ସୁନାକଳସ ଢାଳିବେ ତାହା ଏଯାଏଁ ଅସ୍ପଷ୍ଟ ।
ବିଜେପିର ନୂଆଦିଲ୍ଲୀ ସୂତ୍ର କହୁଛି, ବହୁ ବର୍ଷ ପରେ ଓଡ଼ିଶାରେ ବିଜେପି ନିଜ ଦମ୍ରେ ଶାସନ ଡୋରି ଧରିଛି । କେନ୍ଦ୍ରୀୟ ବିଜେପି ପାଇଁ ଓଡ଼ିଶାର ସଂଗଠନ ଗୁରୁତ୍ୱ ରଖୁଛି । ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ଠାରୁ ଆରମ୍ଭ କରି କେନ୍ଦ୍ରମନ୍ତ୍ରୀ ଅମିତ୍ ଶାହ, ରାଷ୍ଟ୍ରୀୟ ସଭାପତି ଜେପି ନଡ୍ଡା ଯାଏଁ ସମସ୍ତଙ୍କ ନଜର ଓଡ଼ିଶା ଉପରେ ରହିଛି । ତେଣୁ ଦଳର ରାଜ୍ୟ ମୁଖିଆ ପଦ ପାଇଁ ଯେ କେନ୍ଦ୍ରୀୟ ନେତାଙ୍କ ଆଶୀର୍ବାଦ ଯେ ଦରକାର ତାହା ଜଳଜଳ । ଦଳର ଗୋଟିଏ ଗୋଷ୍ଠୀ କହୁଛି, ନୂଆ ସଭାପତି ବଦଳରେ ଦଳ ମନମୋହନଙ୍କୁ ପୁଣି ଏ ଗୁରୁଦାୟିତ୍ୱ ଦେଇପାରେ । ମନମୋହନ ଏବେ ଦଳର ଅସ୍ଥାୟୀ ସଭାପତି ଭାର ତୁଲାଉଛନ୍ତି । ତେଣୁ ସେ ସାନି ସଭାପତି ହେବାରେ କୌଣସି ପ୍ରତିବନ୍ଧକ ନାହିଁ । ତାଙ୍କ ନେତୃତ୍ୱରେ ଗତ ନିର୍ବାଚନରେ ଦଳକୁ ଯେଉଁ ସଫଳତା ମିଳିଲା ତାର ପୁରସ୍କାର ଏଯାଏଁ ମିଳିନି । ଶ୍ରୀ ସାମଲ କାଳେ ପୂର୍ଣ୍ଣକାଳୀନ ୩ ବର୍ଷ ସ୍ଥାୟୀ ସଭାପତି ଭାବେ ଦାୟିତ୍ୱ ତୁଲାଇବାକୁ ମଧ୍ୟ ଆଗ୍ରହୀ ଅଛନ୍ତି । ତାଙ୍କ ପାଇଁ ରାଜନୈତିକ ପାଣିପାଗ ଅନୁକୂଳ ଅଛି । ତେଣୁ ଦଳ ତାଙ୍କୁ ପୁଣି ସଭାପତି ପଦରେ ବସାଇବାର ଯଥେଷ୍ଟ ସମ୍ଭାବନା ଥିବା ଚର୍ଚ୍ଚା ଜୋର ଧରିଛି ।
ଦଳର ଅନ୍ୟ ଏକ ଗୋଷ୍ଠୀ କହୁଛି, ମନମୋହନଙ୍କୁ ଦଳ ଅନ୍ୟ ବାଟରେ ପୁରସ୍କୃତ କରିବ । ନୂଆମୁହଁକୁ ଦଳ ସଭାପତି ଭାବେ ଆଗକୁ ଆଣିବ । ଏ ନୂଆମୁହଁ ତାଲିକାରେ ବହୁ ନାଁ ଯୋଡ଼ା ହୋଇଛି । ସମୀର ମହାନ୍ତି, ଗୋଲକ ମହାପାତ୍ରଙ୍କ ଠାରୁ ଆରମ୍ଭ କରି ଆରଏସ୍ଏସ ସହ ସଂପର୍କରେ ଥିବା କିଛି ନେତାଙ୍କ ନାଁ ମଧ୍ୟ ଚର୍ଚ୍ଚାକୁ ଆସୁଛି । ମାତ୍ର ଆହୁରି ୨ ମାସ ସମୟ ଥିବାରୁ ଚିତ୍ର ଏଯାଏ ଅସ୍ପଷ୍ଟ ଅଛି ।
ଦଳ ପକ୍ଷରୁ ଇତିମଧ୍ୟରେ ସଂଗଠନ ପର୍ବ ପାଇଁ ରିଟର୍ଣ୍ଣିଂ ଅଫିସର ଓ ଓ ସହ ରିଟର୍ଣ୍ଣିଂ ଅଫିସରଙ୍କୁ ନିଯୁକ୍ତି ମିଳିଛି । ସାଂସଦ ପ୍ରତାପ ଷଡ଼ଙ୍ଗୀ ନିର୍ବାଚନ ଅଧିକାରୀ ହୋଇଥିଲା ବେଳେ ସାଂସଦ ସୁକାନ୍ତ ପାଣିଗ୍ରାହୀ, ସୁକେଶୀ ଓରାମ, ଡ. ଯତୀନ ମହାନ୍ତି ସହ ନିର୍ବାଚନ ଅଧିକାରୀ ଦାୟିତ୍ୱ ତୁଲାଇବେ । ରାଜ୍ୟରେ ସାଂଗଠନିକ ନିର୍ବାଚନ ସମ୍ପର୍କରେ ବିଚାର ବିମର୍ଶ କରିବାକୁ ନିର୍ବାଚନ ଟିମ୍, ସଦସ୍ୟ ସଂଗ୍ରହ ଟିମ୍ ଓ ସକ୍ରିୟ ସଦସ୍ୟ ଟିମ୍ ଦିଲ୍ଲୀ ଯାଇଛନ୍ତି । ମନମୋହନ ମଧ୍ୟ ଦିଲ୍ଲୀରେ ଅଛନ୍ତି । କେନ୍ଦ୍ରୀୟ ନେତାଙ୍କ ସହ ପ୍ରଥମ ପର୍ଯ୍ୟାୟ ଆଲୋଚନା ସରିଛି । ସଂଗଠନ ପର୍ବ ନେଇ ସୋମବାର ପାର୍ଟି ମୁଖ୍ୟାଳୟରେ ବସିଥିଲା ଗୁରୁତ୍ୱପୂର୍ଣ୍ଣ ବୈଠକ । ଜେପି ନଡ୍ଡାଙ୍କ ଅଧ୍ୟକ୍ଷତାରେ ବସିଥିବା ବୈଠକରେ କେନ୍ଦ୍ରୀୟ ନିର୍ବାଚନ କମିଟିର ନେତାଙ୍କ ସହ ବିଭିନ୍ନ ରାଜ୍ୟର ନିର୍ବାଚନ ସହ ଜଡ଼ିତ ନେତାମାନେ ଯୋଗ ଦେଇଥିଲେ । ଓଡ଼ିଶାର ନେତାମାନେ ବୈଠକରେ ସାମିଲ ହୋଇଥିଲେ ।
ବୈଠକରେ ମଣ୍ଡଳ, ଜିଲ୍ଲା ସହ ରାଜ୍ୟ ସଭାପତି ଯାଏଁ ସାଂଗଠନିକ ନିର୍ବାଚନ ସଂପର୍କରେ ବିସ୍ତୃତ ଆଲୋଚନା ହୋଇଛି । ଏହାଛଡ଼ା ସଦସ୍ୟତା ଅଭିଯାନ ସଂପର୍କରେ ମଧ୍ୟ ଚର୍ଚ୍ଚା ହୋଇଥିଲା । ଦୀର୍ଘ ୬ ଘଣ୍ଟାର ଏ ବୈଠକରେ ସାଂଗଠନିକ ନିର୍ବାଚନ ନେଇ ଟିକିନିଖି ଚର୍ଚ୍ଚା ହୋଇଥିଲା ବେଳେ ଆଗକୁ ଏଥିପାଇଁ ସ୍ୱତନ୍ତ୍ର କର୍ମଶାଳାର ଆୟୋଜନ କରାଯିବ । ଚଳିତ ମାସ ଶେଷ ଯାଏ ବିଜେପିର ସଦସ୍ୟତା ଅଭିଯାନ ଚାଲିବ । ଏହାପରେ ଆରମ୍ଭ ହେବ ମଣ୍ଡଳ ଓ ଜିଲ୍ଲା ସାଂଗଠନିକ ନିର୍ବାଚନ । ଏଥିପାଇଁ ମଣ୍ଡଳ ଓ ଜିଲ୍ଲା ନିର୍ବାଚନ ଅଧିକାରୀ ନିଯୁକ୍ତି ପାଇବେ । ଡିସେମ୍ବର ପହିଲାରୁ ରାଜ୍ୟ ସଭାପତି ପଦ ସହ ଅନ୍ୟ ପଦାଧିକାରୀଙ୍କ ପାଇଁ ନିର୍ବାଚନ ପ୍ରକ୍ରିୟା ଆରମ୍ଭ ହେବାକୁ କାର୍ଯ୍ୟସୂଚୀ ସ୍ଥିର ହୋଇଛି । ରାଜ୍ୟ ମୁଖିଆ ଭାବେ କେନ୍ଦ୍ରୀୟ ବିଜେପି କାହାକୁ ଭରସା କରୁଛି ତା’କୁ ନେଇ ଦିଲ୍ଲୀରୁ ଭୁବନେଶ୍ୱର ଯାଏ ଚାଲିଛି ଚର୍ଚ୍ଚା ।
