କଟକ,୨୨/୧୦: ସମ୍ଭାବ୍ୟ ବାତ୍ୟା ମୁକାବିଲା ପାଇଁ ଓଡ୍ରାଫ୍ ଟିମ୍କୁ ସଜାଗ ରଖାଯାଇଛି । ଏଥିଲାଗି ୬୦ଟି ଟିମ୍ ଗଠନ କରାଯାଇଛି । ଏଥିରେ ପ୍ରାୟ ୧ ହଜାର କର୍ମଚାରୀ ନିୟୋଜିତ ରହିବେ ବୋଲି ସୂଚନା ମିଳିଛି । ୬୦ଟି ଟିମ୍ରୁ ୫୦ଟି ଟିମ୍କୁ ବିଭିନ୍ନ ଜିଲ୍ଲାକୁ ପଠାଯିବା ପାଇଁ ବନ୍ଦୋବସ୍ତ କରାଯାଇଥିବା ବେଳେ ବାକି ୧୦ ଟିମ୍କୁ ଅଧିକ ଜରୁରି ଆବଶ୍ୟକ ସ୍ଥଳରେ ନିୟୋଜିତ ପାଇଁ ରିଜର୍ଭରେ ରଖାଯାଇଥିବା ପୁଲିସ୍ ମୁଖ୍ୟାଳୟ ପକ୍ଷରୁ ସୂଚନା ଦିଆଯାଇଛି । ୬୦ ଟିମ୍ ଓଡ୍ରାଫ୍ ଟିମ୍ ସହ ଉଚ୍ଚ କ୍ଷମତା ସମ୍ପନ୍ନ କଟର ମେସିନ୍, ଆସ୍କା ଲାଇଟ୍, କ୍ରେନ୍ ଆଦି ପ୍ରସ୍ତୁତ ରଖାଯାଇଛି ।
ଜଗତସିଂହପୁର, ଭଦ୍ରକ, ବାଲେଶ୍ୱର, ପୁରୀ ଜିଲ୍ଲାରେ ଅଧିକ ଟିମ୍ ନିୟୋଜିତ ହେବା ଲାଗି ସ୍ଥିର ହୋଇଛି । ସେହିପରି ଭୁବନେଶ୍ୱର ଓ କଟକ ପାଇଁ ପୃଥକ ବନ୍ଦୋବସ୍ତ କରାଯାଇଛି । ସମ୍ଭାବ୍ୟ ବାତ୍ୟା ଆଶଙ୍କା ଥିବା ଜିଲ୍ଲାରେ ଓଡ୍ରାଫ୍ ଟିମ୍ ଜିଲ୍ଲାପାଳଙ୍କ ନିର୍ଦ୍ଦେଶକ୍ରମେ ପ୍ରାକୃତିକ ବିପର୍ଯ୍ୟୟ ମୁକାବିଲା କରିବେ ବୋଲି ଲ’ ଆଣ୍ଡ୍ ଅର୍ଡର ଏଡିଜି କହିଛନ୍ତି । ଅନ୍ୟପକ୍ଷରେ ବାତ୍ୟା ସମୟରେ ପୁଲିସ୍ର ଦାୟିତ୍ୱ କ'ଣ ରହିବ ସେଥିଲାଗି ପୁଲିସ୍ ମୁଖ୍ୟାଳୟ ପକ୍ଷରୁ ଜିଲ୍ଲା ଏସ୍ପିମାନଙ୍କୁ ଅବଗତ କରାଯାଇଛି । ବାତ୍ୟା ପୂର୍ବରୁ, ବାତ୍ୟା ସମୟରେ ଏବଂ ବାତ୍ୟା ପରେ ପୁଲିସ୍ର ଦାୟିତ୍ୱ କ'ଣ ରହିବ ସେଥିଲାଗି ମୁଖ୍ୟାଳୟ ପକ୍ଷରୁ ଏସ୍ପିମାନଙ୍କ ଅବଗତି ନିମନ୍ତେ ଏକ ସ୍ୱତନ୍ତ୍ର ନିର୍ଦ୍ଦେଶନାମା ପଠାଯାଇଛି ।
ସେହିପରି ବାତ୍ୟା ସମୟରେ ବିଦ୍ୟୁତ୍ ସରବାରହ ବିଚ୍ଛିନ୍ନ ହେବାର ସମ୍ଭାବନା ଥିବାରୁ ଯୋଗାଯୋଗ ରକ୍ଷା ଲାଗି ଭିଏଚ୍ଏଫ୍ ବ୍ୟବସ୍ଥାକୁ ସଜାଗ କରାଯାଇଛି । ଜିଲ୍ଲା ସ୍ତରରେ ଏସ୍ପିଙ୍କ ଅଫିସ୍ରେ ଥିବା ପୁଲିସ୍ କଣ୍ଟ୍ରୋଲ୍ ରୁମ୍କୁ ରାଜ୍ୟ କଣ୍ଟ୍ରୋଲ୍ ରୁମ୍ ସହ ଯୋଡ଼ା ଯାଇଛି । ବିଦ୍ୟୁତ୍ ସରବରାହ ବିଚ୍ଛିନ୍ନ ହେଲେ ମଧ୍ୟ ଭିଏଚ୍ଏଫ୍ ମାଧ୍ୟମରେ ଓଡ୍ରାଫ୍ ଏବଂ ପୁଲିସ୍ ବାହିନୀ ଉଦ୍ଧାର କାର୍ଯ୍ୟରେ ପ୍ରଶାସନକୁ ସହଯୋଗ କରିବେ ବୋଲି ଏଡିଜି ଶ୍ରୀ ସିଂ କହିଛନ୍ତି ।
