ଭୁବନେଶ୍ୱର,୨୨/୧୦: ବିଜେଡିରେ ଥମୁନି ବିବାଦ । କେବେ ବୟାନ ବାଜି, ପୁଣି କେବେ ମେଳି । ଏଥର ନିର୍ବାଚନ ହାରିଥିବା ବିଜେଡିର ୭ ଜଣ ପୂର୍ବତନ ବିଧାୟକ ଏକ ହୋଟେଲରେ ଏକାଠି ହେବା ଖବର ଏବେ ଜୋରରେ ଚର୍ଚ୍ଚାକୁ ଆସିଛି । ସେହିପରି ଭୁବନେଶ୍ୱରରେ ଚାଲିଥିବା ବିଜେଡି କନ୍ଦଳ ଭିତରେ ଏକାମ୍ର ଓ ମଧ୍ୟ ଭୁବନେଶ୍ୱର ନିର୍ବାଚନମଣ୍ଡଳୀର ପ୍ରାୟ ୨୫ରୁ ଅଧିକ କର୍ପୋରେଟର ଲକ୍ଷ୍ମୀସାଗରର ଏକ ମନ୍ଦିରରେ ଏକାଠି ହେବାକୁ ନେଇ ଭିନ୍ନ ଭିନ୍ନ ଚର୍ଚ୍ଚା ଶୁଣିବାକୁ ମିଳିଛି । ଏଭଳି ଘଟଣା ବିଜେଡି ରାଜନୀତିକୁ ଆହୁରି ହଲଚଲ୍ କରି ଦେଇଛି ।
ତାଜା ଚର୍ଚ୍ଚା ଅନୁସାରେ, ଭୁବନେଶ୍ୱରର ଏକ ହୋଟେଲରେ ୭ ଜଣ ପୂର୍ବତନ ଟାଣୁଆ ବିଧାୟକ ଏକାଠି ହୋଇଥିଲେ । ଏହାର ଏକ ଫଟୋ ବି ଭାଇରାଲ୍ ହୋଇଛି । ଏଥିରେ ପୂର୍ବତନ ବିଧାୟକ ବିଷ୍ଣୁବ୍ରତ ରାଉତରାୟ, ରୁଦ୍ର ମହାରଥୀ, ଚନ୍ଦ୍ରସାରଥୀ ବେହେରା, ଦେବେଶ ଆଚାର୍ଯ୍ୟ, ପ୍ରଣବ ବଳବନ୍ତରାୟ, ଅଂଶୁମାନ ମହାନ୍ତି ଓ ସମ୍ବିତ ରାଉତରାୟ । ନିର୍ବାଚନରେ ପରାଜିତ ହୋଇଥିବା ଏହି ନେତାମାନେ ଏକାଠି ହେବା ପଛରେ କି ରହସ୍ୟ, ତାହାକୁ ନେଇ ବିଭିନ୍ନ ମହଲରେ ଚର୍ଚ୍ଚା ହେଉଛି । ସାମାନ୍ୟ ଗପସପ ପାଇଁ ସେମାନେ ଏକାଠି ହୋଇଥିଲେ ନା ଏହା ପଛରେ କିଛି ଅଲଗା ରାଜନୀତି ରହିଛି, ତାହା ଜଣାପଡ଼ିନି । ଆଉ ଏକ ଘଟଣା ଘଟିଛି ଭୁବନେଶ୍ୱରରେ । ଭୁବନେଶ୍ୱର ବିଜେଡି ଭିତରେ ଚାଲିଥିବା ଗୋଷ୍ଠୀ କନ୍ଦଳ, ଟଣାଓଟରା ଥମିବାର ନାଁ ଧରୁନି ।
ସୂତ୍ର ଅନୁସାରେ, ମଧ୍ୟ ଓ ଏକାମ୍ର ନିର୍ବାଚନମଣ୍ଡଳୀର ପ୍ରାୟ ୨୫ରୁ ଅଧିକ କର୍ପୋରେଟର ଲକ୍ଷ୍ମୀସାଗରର ଏକ ମନ୍ଦିରରେ ଏକାଠି ହୋଇଥିବା ଶୁଣିବାକୁ ମିଳିଛି । କାହିଁକି ସେମାନେ ଏକାଠି ହୋଇଥିଲେ, ସେ ନେଇ ବାହାରେ କେହି ମୁହଁ ଖୋଲି ନାହାନ୍ତି । ଚର୍ଚ୍ଚା ଶୁଣିବାକୁ ମିଳୁଛି, ବୈଠକରେ ଭୁବନେଶ୍ୱର ବିଜେଡି କନ୍ଦଳକୁ ନେଇ ବେଶ୍ ଲମ୍ବା ଆଲୋଚନା ହୋଇଥିଲା । କିଛି ନିର୍ଦ୍ଦିଷ୍ଟ ଦାବି ପୂରଣ ହୋଇ ନଥିବାରୁ କେତେକ କର୍ପୋରେଟର ମିଳିତ ଇସ୍ତଫା ଦେବାକୁ ମତ ରଖିଥିବା ଚର୍ଚ୍ଚା ହେଉଛି । ମାତ୍ର ଉପସ୍ଥିତ ବହୁ କର୍ପୋରେଟର ଏଭଳି ପ୍ରସ୍ତାବରେ ରାଜି ହୋଇନଥିଲେ । ବିଏମ୍ସିରେ ବିଜେଡି ନେତୃତ୍ୱଙ୍କୁ ଚାଲେଞ୍ଜ ଦେବା ନେଇ ବି କିଛି କର୍ପୋରେଟର କୁଆଡ଼େ ମତ ଦେଇଥିଲେ । ଏହାକୁ ନେଇ ମଧ୍ୟ ସହମତି ପ୍ରକାଶ ପାଇନଥିବା କୁହାଯାଉଛି । ତେବେ ଅଧିକାଂଶ କର୍ପୋରେଟର ଏ ପ୍ରସଙ୍ଗରେ ମୁହଁ ଚୁପ୍ ରଖୁଥିବା ବେଳେ କେତେକଙ୍କ ମୋବାଇଲ୍ ଆଜି ସନ୍ଧ୍ୟାରେ ସୁଇଚ୍ ଅଫ ଥିଲା ।
