ଜୟପୁର, ୨୩।୧୦: ମନ୍ଦିରରେ ସାଧାରଣତଃ ଦେବାଦେବୀଙ୍କ ପ୍ରତିମୂର୍ତ୍ତି ପୂଜା ପାଆନ୍ତି । କିନ୍ତୁ, ରାଜସ୍ଥାନର ଜୟପୁର ନିକଟରେ ଏପରି ଏକ ମନ୍ଦିର ରହିଛି, ଯେଉଁଠାରେ କୁକୁର ମୂର୍ତ୍ତି ପୂଜା ପାଇଥାଏ । ଜୟପୁର ନିକଟସ୍ଥ ସାମ୍ପର ସହରଠାରୁ ୭ କିମି ଦୂରରେ ଥିବା ଏକ ହ୍ରଦ ନିକଟରେ ରହିଛି ଏହି ମନ୍ଦିର । ଏହି ମନ୍ଦିରରେ ଏକ କୁକୁର ମୂର୍ତ୍ତି ରଖାଯାଇ ପୂଜାର୍ଚ୍ଚନା କରାଯାଉଛି । 

ଏ ସମ୍ପର୍କରେ ମନ୍ଦିର ପୂଜାରୀଙ୍କ କହିବାନୁଯାୟୀ, ପ୍ରାୟ ୨୦୦ ବର୍ଷ ପୂର୍ବେ, ସେବା ଗାଁରେ ରହୁଥିବା ଜଣେ ବ୍ୟକ୍ତି ନିଜର ବିବାହ ସାମଗ୍ରୀ କିଣିବାକୁ ସାମ୍ପରସ୍ଥିତ ବଜାରକୁ ଆସିଥିଲେ । ତାଙ୍କ ସହ ପୋଷା କୁକୁର ମଧ୍ୟ ଆସିଥିଲା । ଜିନିଷ କିଣି ଘରକୁ ଫେରିବା ସମୟରେ ଏହି ହ୍ରଦ ନିକଟରେ କେତେକ ଡକାୟତ ସେମାନଙ୍କ ଉପରେ ଆକ୍ରମଣ କରିଥିଲେ । ସମ୍ପୃକ୍ତ ବ୍ୟକ୍ତି ଓ ତାଙ୍କ କୁକୁର ଡକାୟତକୁ ମୁକାବିଲା କରି ଅଧିକାଂଶଙ୍କୁ ମାରି ଦେଇଥିଲେ । ତେବେ ଗୋଟିଏ ଡକାୟତ ପଛପଟୁ ଆସି ସେହି ବ୍ୟକ୍ତିଙ୍କୁ ହତ୍ୟା କରିଥିଲା । ପୋଷା କୁକୁରଟି ସେହି ଡକାୟତକୁ ମାରି ଦେବା ପରେ ନିଜ ମାଲିକର ରକ୍ତ ଲୁଗା ଧରି ଗାଁକୁ ଯାଇଥିଲା । ଗ୍ରାମବାସୀ ତଥା ବ୍ୟକ୍ତିଙ୍କ ପରିବାର ଲୋକେ କୁକୁର ସହ ଘଟଣାସ୍ଥଳକୁ ଆସିଥିଲେ । ବ୍ୟକ୍ତି ଜଣକ ସେଠାରେ ମରି ପଡ଼ିଥିବା ସେମାନେ ଦେଖିବାକୁ ପାଇଲେ । ମାଲିକ ମୃତ୍ୟୁର କିଛି ସମୟ ପରେ ପୋଷା କୁକୁରଟିର ମଧ୍ୟ ସେହିଠାରେ ମୃତ୍ୟୁ ହୋଇଥିଲା । ପୋଷା କୁକୁରର ମାଲିକ ପ୍ରତି ଭକ୍ତିକୁ ସମ୍ମାନ ଦେଇ ହ୍ରଦ ନିକଟରେ ଏକ ମନ୍ଦିର ନିର୍ମାଣ କରାଯିବା ସହ କୁକୁରର ମୂର୍ତ୍ତି ସ୍ଥାପନ ସହ ପୂଜାର୍ଚ୍ଚନା କରାଯାଉଛି ।