କଟକ,୦୮/୦୭: ନରାଜ-ବେଲିଭିଉ ରାସ୍ତାରେ ରବିବାର ରାତିରେ ଏକ ଦୁର୍ଘଟଣା ଘଟିଛି । ଜଣେ ବାଇକ୍ ଆରୋହୀ ଭାରାସାମ୍ୟ ହରାଇ ଡିଭାଇଡର୍ରେ ପିଟି ହେବାରୁ ଗୁରୁତର ଆହତ ହୋଇଛନ୍ତି । ଡିଭାଇ୍ଡର୍ରେ ଥିବା ତିନୋଟି ରଡ୍ ଚାଳକଙ୍କ ବେକରେ ପଶିଯାଇଛି । ଗୁରୁତର ଅବସ୍ଥାରେ ଆହତଙ୍କୁ ଏସ୍ସିବି କାଜୁଆଲ୍ଟିରେ ଭର୍ତ୍ତି କରାଯାଇଛି ।
ବିଡ଼ାନାସୀର ସୁରେଶ ଦାସଙ୍କ ପୁଅ ସାହିଲ ଦାସ ଓରଫ ପପୁ ଏକ ବାଇକ୍ରେ ନରାଜ ଯାଇଥିଲେ । ରାତି ପ୍ରାୟ ସାଢ଼େ ୯ଟା ବେଳେ ସେ ନରାଜରୁ ବେଲିଭିଉ ଛକ ଅଭିମୁଖେ ଫେରିବା ବେଳେ ବିଜୁପଟ୍ଟନାୟକ ପାର୍କ ପାଖରେ ଭାରସାମ୍ୟ ହରାଇ ରାସ୍ତାର ଡିଭାଇଡର୍ରେ ପିଟି ହୋଇଯିବାରୁ ସାହିଲ ଗୁରୁତର ଆହତ ହୋଇଥିଲେ । ଡିଭାଇଡର୍ରେ ଥିବା ତିନୋଟି ଲୁହା ରଡ୍ ସାହିଲଙ୍କ ବେକରେ ପଶି ବାହାରିଯାଇଥିଲା । ଘଟଣା ସ୍ଥଳରେ ସାହିଲଙ୍କ ବେକରୁ ପ୍ରଚୁର ରକ୍ତସ୍ରାବ ହୋଇଥିଲା । ସ୍ଥାନୀୟ ଲୋକ ତାଙ୍କ ପରିବାରକୁ ସୂଚନା ଦେବା ପରେ ସାହିଲଙ୍କୁ ପ୍ରଥମେ ସିଡିଏର ଏକ ଘରୋଇ ହସ୍ପିଟାଲ୍ ନିଆଯାଇଥିଲା । ତାଙ୍କ ଅବସ୍ଥା ସଂକଟାପନ୍ନ ଥିବାରୁ ସାହିଲଙ୍କୁ ଏସ୍ସିବି କାଜୁଆଲ୍ଟିକୁ ସ୍ଥାନାନ୍ତର କରାଯାଇଛି । ସେଠାରେ ସାହିଲଙ୍କୁ ଟ୍ରମାକେୟାର ଆଇସିୟୁରେ ରଖାଯାଇଛି । ସର୍ଜରୀ ଡାକ୍ତର ଦେଖିବା ପରେ ସାହିଲଙ୍କ ଚିକିତ୍ସା ନେଇ ନିଷ୍ପତ୍ତି ନିଆଯିବ ବୋଲି କାଜୁଆଲ୍ଟିର ଡାକ୍ତରମାନେ ସୂଚନା ଦେଇଛନ୍ତି ।