ଜୟପୁର,୨୭/୩ : ଘରୋଇ ବସ୍ ମାଲିକଙ୍କ ଚାପରେ ସରକାର ଚେପା। ଆରମ୍ଭର ମାତ୍ର ୩ ଦିନ ପରେ ମୁଖ୍ୟମନ୍ତ୍ରୀ ବସ୍ ସେବା ବନ୍ଦ ହୋଇଯାଇଛି। ଗତ ସୋମବାରରୁ ଜୟପୁରରୁ ଚଳାଚଳ କରୁଥିବା ସମସ୍ତ ୭ ଏସି ବସ୍ ଚଳାଚଳ ଉପରେ ରୋକ୍ ଲଗାଇଛି ରାଜ୍ୟ ପରିବହନ ପ୍ରାଧିକରଣ(ଏସ୍ଟିଏ)। ପରବର୍ତ୍ତୀ ନିର୍ଦ୍ଦେଶ ପର୍ଯ୍ୟନ୍ତ ବସ୍ ଚଳାଚଳ ସାମୟିକ ବନ୍ଦ କରାଯାଇଛି। ସ୍ଥାନୀୟ ଓଡିଶା ରାଜ୍ୟ ସଡ଼କ ପରିବହନ ନିଗମ (ଓଏସ୍ଆରଟିସି) ପୁରୁଣା ବସ୍ଷ୍ଟାଣ୍ଡରେ ବସ୍ ଗୁଡିକ ରହିଛି । ପୂର୍ବରୁ ‘ଲକ୍ଷ୍ମୀ’ ଭାବେ ପରିଚିତ ଉପରୋକ୍ତ ଏସି ବସ୍ ଗୁଡ଼ିକ ସେମିଳିଗୁଡ଼ା ସରକାରୀ ବସ୍ଷ୍ଟାଣ୍ଡରେ ପଡ଼ି ରହିଥିଲା। ମୁଖ୍ୟମନ୍ତ୍ରୀ ବସ୍ ସେବା ଭାବେ ପରିବର୍ତ୍ତିତ ପରେ ଆରମ୍ଭ ହୋଇଥିଲା ଗାଡ଼ି ଚଳାଚଳ। ଗତ ୨୪ ତାରିଖରେ ସ୍ଥାନୀୟ ନୂଆ ସରକାରୀ ବସ୍ଷ୍ଟାଣ୍ଡରୁ ବିଭିନ୍ନ ଜିଲ୍ଲାକୁ ଗଡ଼ିଥିଲା ବସ୍ । ନୂଆ ରୁଟ୍ ଗୁଡ଼ିକ ଥିଲା ଜୟପୁର-ଗୁଣପୁର ପ୍ରଥମ, ଦ୍ୱିତୀୟ, ଜୟପୁର-କାଶୀପୁର ଭାୟା ଲକ୍ଷ୍ମୀପୁର, ଜୟପୁର-ମାଲକାନଗିରି, ଜୟପୁର-କୋଟିଆ ଭାୟା କୋଟା ଛକ, ଲମତାପୁଟ, ନନ୍ଦପୁର, ଜୟପୁର-ଭବାନୀପାଟଣା ଏବଂ ଜୟପୁର-କଳାହାଣ୍ଡିର କୋଟଗାଁ ଭାୟା ଆମପାଣି । ଶୀତତାପ ନିୟନ୍ତ୍ରିତ, ଆରାମଦାୟକ ଯାତ୍ରା, ଟାଇମିଂ ଲାଗି ମାତ୍ର ୩ ଦିନରେ ବସ୍ ଗୁଡ଼ିକୁ ଯାତ୍ରୀ ପସନ୍ଦ କରିଥିଲେ ।
ପ୍ରଥମ ଦିନ ଅପେକ୍ଷା ଦ୍ୱିତୀୟ ଏବଂ ତୃତୀୟ ଦିନରେ ଆଦାୟ ଅପେକ୍ଷାକୃତ ବଢିଥିଲା । ଆଜି ଚତୁର୍ଥ ଦିନରେ ବସ୍ ଚଳାଚଳ ସମ୍ପୂର୍ଣ୍ଣ ବନ୍ଦ କରିଦିଆଯାଇଛି । ଚର୍ଚ୍ଚା ହେଉଛି, ଓଏସ୍ଆରଟିସି ଗାଡ଼ି ଚଳାଚଳକୁ ପସନ୍ଦ କରିନଥିଲେ ଘରୋଇ ବସ୍ ମାଲିକ । ଚାପ ପ୍ରୟୋଗ କରିଥିଲେ। ବୁଧବାର ଅର୍ଥାତ ୨୬ ତାରିଖ ରାତିରେ ଏସ୍ଟିଏରୁ ନିର୍ଦ୍ଦେଶ ଜାରି କରାଯାଇଥିଲା। ପରବର୍ତ୍ତି ନର୍ଦ୍ଦେଶ ନ ମିଳିବା ପର୍ଯ୍ୟନ୍ତ ୨୭ ତାରିଖରୁ ମୁଖ୍ୟମନ୍ତ୍ରୀ ଏସି ବସ୍ ସେବା ବନ୍ଦ ଲାଗି ନର୍ଦ୍ଦେଶ ଆସିଥିଲା। ସରକାରଙ୍କ ଏଭଳି ନିଷ୍ପତ୍ତିକୁ ସାଧାରଣରେ ନାପସନ୍ଦ କରାଯାଇଛି। ଘରୋଇ ବସ୍ ମାଲିକଙ୍କ ଚାପରେ ନପଡ଼ି ତୁରନ୍ତ ବସ୍ ସେବା ଆରମ୍ଭ ଲାଗି ବୁଦ୍ଧିଜୀବୀ ଦାବି କରିଛନ୍ତି । ଏ ସମ୍ପର୍କରେ ସ୍ଥାନୀୟ ଓଏସ୍ଆରଟିସି ଅଧିକାରୀଙ୍କୁ ଯୋଗାଯୋଗ କରାଯାଇଥିଲେ ବି ତାଙ୍କ ପ୍ରତିକ୍ରିୟା ମିଳିପାରିନି ।
