ଭୋପାଳ,୨୯/୫:  ନିଜ ପରିବାରକୁ ନୃଶଂସ ଭାବେ ହାଣି ହତ୍ୟା କଲା ପୁଅ । ନିଜ ହାତରେ ନିଜର ଜନ୍ମକଲା ବାପାମାଆ ଓ ଭାଇ-ଭଉଣୀକୁ ହାଣି ପକାଇଲା । ଏଭଳି ଚାଞ୍ଚଲ୍ୟକର ଗଣହତ୍ୟା ଘଟଣା ଘଟିଛି ଛିନ୍ଦୱାଡା ଜିଲ୍ଲାର ଏକ ଆଦିବାସୀ ବହୁଳ ଗାଁରେ । ପରିବାରର ୮ ଜଣ ସଦସ୍ୟଙ୍କୁ ହାଣିବା ପରେ ଅଭିଯୁକ୍ତ ନିଜେ ମଧ୍ୟ ଆତ୍ମହତ୍ୟା କରିଥିବା ସୂଚନା ମିଳିଛି। ଏନେଇ ପୋଲିସ୍‌ ଘଟଣାସ୍ଥଳରେ ପହଞ୍ଚି ମୃତଦେହଗୁଡ଼ିକୁ ବ୍ୟବଚ୍ଛେଦ ପାଇଁ ପଠାଇ ତଦନ୍ତ ଆରମ୍ଭ କରିଛି।

ସୂଚନା ମୁତାବକ, ଅଭିଯୁକ୍ତ ଜଣକ ନିଜର ମାଆ, ଭାଇ, ଭାଉଜ,  ଭଉଣୀ,ପୁତୁରା ଓ ଦୁଇ ଝିଆରୀଙ୍କୁ ଟାଙ୍ଗିଆରେ ହାଣି ହତ୍ୟା କରିଛି । ଆଜି ଭୋର୍ ପ୍ରାୟ ୩ଟା ବେଳେ ଏହି ହତ୍ୟାକାଣ୍ଡ ଘଟିଥିବା କୁହାଯାଉଛି । ଅଭିଯୁକ୍ତ ପରିବାର ଲୋକଙ୍କୁ ଟାଙ୍ଗିଆରେ ହାଣିବା ବେଳେ ସେମାନଙ୍କ ଚିତ୍କାର ଶୁଣି ଆଖପାଖର ଲୋକେ ଧାଇଁ ଆସିଥିଲେ । ଏହାପରେ ଅଭିଯୁକ୍ତ ଘଟଣାସ୍ଥଳରୁ ଫେରାର୍ ହୋଇଯାଇ ଘରଠୁ ପ୍ରାୟ ୧୦୦ ମିଟର ଦୂରରେ ଥିବା ଗଛରେ ଝୁଲି ଆତ୍ମହତ୍ୟା କରିଥିବା ଜଣାପଡିଛି । 

ତେବେ ଏହି ଘଟଣାରେ ଜଣେ ୧୦ ବର୍ଷୀୟ ନାବାଳକର ଜୀବନ ବଞ୍ଚିଯାଇଛି । ଗୁରୁତର ଅବସ୍ଥାରେ ପିଲାଟିକୁ ହସ୍ପିଟାଲରେ ଭର୍ତ୍ତି କରାଯାଇଛି ।ଛିନ୍ଦୱାଡା ଏସପି ମଧ୍ୟରେ ଘଟଣାସ୍ଥଳରେ ପହଞ୍ଚି ତଦନ୍ତ ଜାରି ରଖିଛନ୍ତି । ପୋଲିସର କହିବା ଅନୁସାରେ,ହତ୍ୟା ଅଭିଯୁକ୍ତଜଣକ ପରିବାରର ସଦସ୍ୟ ହୋଇଥିବା ବେଳେ ଦୀର୍ଘ ଦିନ ହେବ ମାନସିକ ରୋଗରେ ପୀଡ଼ିତ ଥିଲେ। ହେଲେ କିଛି ଦିନ ତଳେ ଅଭିଯୁକ୍ତର ବାହାଘର ହୋଇଥିବା ବେଳେ ବାହାହେବା ପରେ ତା'ର ପାଗଳାମି ବଢି ଯାଇଥିଲା । ସେଥିପାଇଁ ସେ ଏମିତି ନିଜ ପରିବାର ଲୋକଙ୍କୁ ହତ୍ୟା କରିଥିବା ସନ୍ଦେହ କରାଯାଉଛି ।