ଭୁବନେଶ୍ୱର,୨୯/୦୯: ରାଜଧାନୀରେ ବ୍ଲକିଂଚେକିଂ ବେଳେ ବ୍ୟାରିକେଡ଼ ଭାଙ୍ଗି ଖସି ଯାଉଥିଲା ସ୍କୋଡା କାର୍‌ । ଗୋଡାଇ ଗୋଡାଇ ଧରିଲା ପୋଲିସ । ଗାଡିରୁ ମିଳିଲା ୪ ଲକ୍ଷ ୭୭ ହଜାର ନଗଦ ଟଙ୍କା । ଚାଳକ ସହ ଗାଡି ଜବତ କଲା କମିଶନରେଟ୍ ପୋଲିସ । ରାଜଧାନୀ ଭୁବନେଶ୍ୱରରେ ଏଭଳି ଘଟଣା ଦେଖିବାକୁ ମିଳିଛି । 

ସୂଚନା ମୁତାବକ, ରାଜଧାନୀର ୨୬ଟି ଥାନା ଅଞ୍ଚଳରେ ପୋଲିସ ଏବଂ ଟ୍ରାଫିକ ପକ୍ଷରୁ ଚାଲିଛି ନାଇଟ ବ୍ଲକିଂଚେକିଂ ଏବଂ ଡ୍ରଙ୍କେନ୍ ଡ୍ରାଇଭ୍ ଚେକିଂ ।  ଅମାନିଆଙ୍କୁ କାବୁ କରିବାକୁ ଚେଷ୍ଟା ଚଳାଇଛି ପୋଲିସ । ବିଶେଷ କରି ଶନିବାର ଏବଂ ରବିବାର ରାତିରେ ଅଧିକାଂଶ ସ୍ଥାନରେ ଚେକିଂ କରାଯାଉଛି । ତେବେ ଗତକାଲି ଅର୍ଥାତ ଶନିବାର ବିଳମ୍ୱିତ ରାତିରେ ସବୁ ଜୋନ୍ ଏସିପି ସମେତ ଥାନା ଅଧିକାରୀ ଓ ପୋଲିସ କର୍ମଚାରୀ ଚେକିଂ କରିଥିଲେ । ଏହି ସମୟରେ ହଠାତ୍ ଏକ ସ୍କୋଡ଼ା କାର୍ ଦ୍ରୁତ ଗତିରେ ଚାଲି ଆସୁଥିବା ଦେଖି ଚେକ୍ ପୋଷ୍ଟରେ ଥିବା ପୋଲିସ ରହିବାକୁ କହିଥିଲେ । କିନ୍ତୁ ଚାଳକ ଜଣକ ବ୍ୟାରିକେଡ଼ ଭାଙ୍ଗି ରିଭର୍ସ ରାଇଡ୍ କରିଥିଲେ । ସେଠାରେ ଥିବା ପୋଲିସ କର୍ମଚାରୀ ମାନେ ଗୋଡ଼ାଇ ଗୋଡ଼ାଇ କାର୍ ଅଟକାଇ ଥିଲେ । ଚେକିଂ କରିବାରୁ ଚାଳକ ଜଣକ ପ୍ରଚୁର ମଦ୍ୟ ପାନ କରିଥବା ବ୍ରିଦ୍ ଅନାଲାଇଜରରେ ଜଣାପଡ଼ିଛି । ସେପଟେ ଗାଡ଼ି ଯାଞ୍ଚ ବେଳେ ଗାଡିରୁ ୪ ଲକ୍ଷ ୭୭ ହଜାର ନଗଦ ଟଙ୍କା ମିଳିଛି । ଚାଳକ ସମେତ ଜବତ ଗାଡ଼ି ଏବଂ ଟଙ୍କା ଥାନାରେ ଥିବାବେଳେ, ଏ ଟଙ୍କା କାହାର କେଉଁଠୁ କୁଆଡେ ଯାଉଥିଲା ପୋଲିସ ତାହାର ତଦନ୍ତ କରୁଛି । ଏନେଇ ଟୁଇନ୍ ସିଟି ପୋଲିସ କମିସନର ସଞ୍ଜୀବ ପଣ୍ଡା ସୂଚନା ଦେଇଛନ୍ତି ।