ଭୁବନେଶ୍ୱର, ୨୯/୦୯: ଆନ୍ଧ୍ରରୁ ଆସିଥିଲା କ୍ଷୀର ବୋଝେଇ କଣ୍ଟେନର୍ । ଡ୍ରାଇଭରର ଆଖିଲାଗି ଗଛ ଏବଂ ଲାଇଟ୍ ଖୁଣ୍ଟ ଭାଙ୍ଗି ଫୁଟପାଥ ଉପରେ ଥିବା ଏକାଧିକ ଦୋକାନ ଉପରେ ଚଢ଼ିଗଲା ଗାଡି । ଗାଡିରେ ଥିବା ୪ଜଣଙ୍କ ମଧ୍ୟରୁ ୩ଜଣ ଆହତ ହୋଇଥିବାବେଳେ ଭୁବନେଶ୍ୱରର ଚନ୍ଦ୍ରଶେଖରପୁରର ବୁଦ୍ଧ ପାର୍କ ନିକଟରେ ଏଭଳି ଘଟଣା ଘଟିଛି ।

ସୂଚନା ମୁତାବକ, ଆନ୍ଧ୍ରରୁ ଭୁବନେଶ୍ୱର ଆସିଥିଲା କ୍ଷୀର ବୋଝେଇ କଣ୍ଟେନର୍ । ବିଭିନ୍ନ ଜାଗାରେ କ୍ଷୀର ସପ୍ଲାଏ କରି ଚନ୍ଦ୍ରଶେଖରପୁରରୁ ଫେରୁଥିବା ବେଳେ ବୁଦ୍ଧ ପାର୍କ ପାଖରେ ଡ୍ରାଇଭରଙ୍କ ଆଖି ଲାଗି ଯାଇଥିବାରୁ ହଠାତ୍ ଷ୍ଟିୟରିଂ ମୋଡ଼ି ଦେଇଥିଲେ । ଫଳରେ ଗାଡ଼ିଟି ଗୋଟିଏ ଗଛ ଏବଂ ଲାଇଟ୍ ଖୁଣ୍ଟିକୁ ଭାଙ୍ଗିବା ସହ ଫୁଟପାଥ ଉପରେ ଥିବା ଏକାଧିକ ଦୋକାନ ଉପରେ ଚଢ଼ି ଯାଇଥିଲା । ଏହି ଦୁର୍ଘଟଣାରେ ଗାଡିରେ ଥିବା ଚାରି ଜଣଙ୍କ ମଧ୍ୟରୁ ତିନିଜଣ ଆହତ ହୋଇଛନ୍ତି । ଏହା ଦେଖି ସ୍ଥାନୀୟଲୋକେ ପୋଲିସକୁ ଖବର ଦେଇଥିଲେ । ଖବର ପାଇ ଘଟଣାସ୍ଥଳରେ ଚନ୍ଦ୍ରଶେଖରପୁର ପୋଲିସ ପହଞ୍ଚି ଆହତଙ୍କୁ ଉଦ୍ଧାର କରି ନିକଟସ୍ଥ ମେଡିକାଲରେ ଚିକିତ୍ସା ପାଇଁ ଭର୍ତ୍ତି କରିଛି ।